Acaki 30

1Ikare ma Lakeri oneno ni peya enywalo latin mo ki Yakobo, ci nyeko omake ikom lamine. Oweko owaco bot Yakobo ni, “Miya lutino; ka pe, ci ato woko.” 2Ci kiniga omako Yakobo ikom Lakeri, kun wace ni, “Iketa adoko Lubanga bo, ma en ogengi nywali?” 3Ci Lakeri ogamo ni, “Angecana Bila en do, dong icit ibut kwede, wek onywal latin mo me kakara, wek an bene anong lutino mogo ki tung bote.” 4Ci omiyo angecane obedo dakone, Yakobo obutu kwede. 5Ci Bila ogamo ic, onywalo latin laco ki Yakobo. 6Lakeri owaco ni, “Lubanga otyeko ngola kop, owinyo ki dwona bene, ci omiya gira latin laco,” omiyo ocako nyinge Dan. 7Bila angeca pa Lakeri dok ogamo ic, onywalo latin laco ki Yakobo me aryone. 8Ci Lakeri dok owaco ni, “Ka me lweny dong alwenyo matek wan ki lamera, ci aloye,” ma omiyo ocako nying latin Naputali.

9Ka Lea bene oneno ni dong ecung woko, ma pe enywalo lutino, ci okwanyo angecane Jilpa, omiyo ki Yakobo wek obed dakone. 10Ci Angeca pa Lea bene onywalo latin laco ki Yakobo. 11Lea owaco ni, “Gum maber okaya!” Ma omiyo ocako nyinge Gad. 12Jilpa angeca pa Lea dok onywalo latin laco ki Yakobo me aryone, 13Omiyo Lea owaco ni, “An koma gum! Pien mon gibilwonga ni lagumkom”; ma omiyo en ocako nying latin ni Acer.

14Ikare me kayo ngano, Reuben ocito i poto, ci onongo iye yat nyodo, ci okelogi wa bot mine Lea. Ci Lakeri olego Lea ni, “Alegi, imiya yat nyodo pa wodi mogo do.” 15Ento Lea ogamo ni, “In imayo cwara woko ki bota, itamo ni loke tidi ce? Man dok i mito ni ikwany yat nyodo pa woda woko bene?” Lakeri ogamo ni, “En tin obut kwedi dyewor me ka yat nyodo pa wodini.” 16Ikare ma Yakobo odwogo nia ki i tim otyeno, Lea okato ocito kangolo wiye i yo, ci owace ni, “Myero tin idony i oda; pien atyeko wilo in woko ki yat nyodo pa woda.” Ci ocito obutu ki Lea idyewor meno. 17Lubanga owinyo lega pa Lea, ci ogamo ic, onywalo latin laco me abice ki Yakobo. 18Ci Lea owaco ni, “Lubanga dong oculu wang miyo angecana bot cwara,” ma omiyo ocako nyinge Icakar. 19Lea dok ogamo ic ci onywalo latin me abicele ki Yakobo. 20Omiyo Lea dok owaco ni, “Lubanga dong omiya mot mabeco mupore; cwara dong biwora, pien dong atyeko nywale lutino co abicel kulu,” ma omiyo ocako nyinge Jabulon. 21Lacen dok onywalo nyare, ci ocako nyinge Dina.

22Lubanga dong ocako po ikom Lakeri, dok owinyo legane bene, ka omiye nyodo. 23Ci ogamo ic, onywalo latin laco, kun waco ni, “Lubanga otyeko kwanyo lewic woko ki ikoma,” 24ci ocako nyinge Yucepu, kun waco ni, “Myero Rwot dok omeda latin laco mo acel!”

Lok ma Yakobo oyubu ki Laban kom mucarane

25Ikare ma Lakeri otyeko nywalo Yucepu, ci Yakobo owaco bot Laban ni, “Dong icwala wek adok paco i lobo tuwa. 26Miya monna ki lutinona mayam atiyo pirgi botini, wek dong aciti; in bene ingeyo tic ma atiyo boti do.” 27Laban ogamo ni, “Ka iye, ci wek awaci lok mo kong; atyeto tyet ci aniang ni Rwot omiya gum pi in. 28Ber itita wel ma i mito amini me mucarani, ci abimini.” 29Ci Yakobo owace ni, “In ki komi ingeyo kit ma atiyo ki tici, ki kit ma agwoko kwede limi makwo. 30Pien yam ma peya abino onongo limi makwo nok mo, nen dong gumede madwong mukato; Rwot obedo ka mini gum kama adok iye ducu. Ento an dong abicako gwoko jo oda awene?”

31Ci Laban openye ni, “Gin ango ma abimini?” Yakobo ogamo ni, “Pe amito kit cul mo wa ki acel. Ka ibiye, tima gin macalo man, ci an abimede ka kwayo limi, ki gwokogi bene: 32wek tin acit awot ikin limi makwo ducu, wek ayer ki ikin gi romi ma komgi opajupaju ki ma abacabac, ki lutino romi macol ducu, kacel ki dyegi ma gubedo abacabac ki ma opajupaju; meno gin aye gibibedo mucarana. 33Kitmeno leng cwinya binen lacen, ka ibibino ka ngiyo kom mucarana. Ka ibinongo dyegi ma komgi pe opajupaju ki abacabac, ki lutino romi ma pe gicol gitye ikin mega, meno kibikwano ni kikwalo akwala.” 34Ci Laban ogamo ni, “Ber, wek obed kit ma iwaconi.” 35Ento inino meno Laban okoyo nyogi dyegi ma gubedo ma oceruceru, ki ma abacabac, ki megi dyegi ma komgi opajupaju ki abacabac, ma kitartar ducu, ki lutino romi ducu macol, oketo i cing awobene. 36Opoko kin gi woko ki Yakobo ma bore romo wot me nino adek kulu; Yakobo odong ka kwayo lee pa Laban mudonge. 37Yakobo ocako jako jang pobo madyak ki yaa ki ogali, ci ongweko pokgi, wek kom kedi onen ma oceruceru ma kitartar. 38Ci okwanyo kedi ma ongweko komgini, ci opyelogi inyim romi i wee pii, kama gionyo iye pii, kama lee cito iye kamato pii, pien nyogine giyito megine ka gibino kamato pii. 39Ka kiyitogi inyim kedi, miyo ginywalo lutino ma akolakol, ki ma aciriaciri ki ma abacabac. 40Yakobo dok opoko lutino romi pat, oloko wang lee maneno gin ma akolakol ki lwak lee pa Laban macole ducu, ka opoko dul lee pat kun pe dok ribogi ki pa Laban. 41Ikare ma nyogi yito megine matego, ci Yakobo pyelo kedi i wee pii inyim romi, wek guyite inyim kedi. 42Ento ka megine magorogoro aye kiyitogi, en pe pyelo kedi inyimgi; pimeno lee magoro ducu pa Laban, mategone ducu pa Yakobo. 43Kitmeno Yakobo odoko lalonyo matek, matye ki lwak lee, ki lwak angeca ki lwak opiine, ki lwak kinaga ki kana.