Acaki 29

Yakobo i ot pa Laban

1Yakobo dok omede ki wote, ci oo i lobo pa jo ma tung kunyango. 2Ci nen, wange ocob iwang pii matye i dye olet, ki lwak romi ma gubutu piny i dul adek ma gicok inget wang pii; pien romi gimato pii iwang it meno, matye ki got madit idoge. 3Ka romi ducu dong gugure, gucoke kunu, ci lukwat gitore, gingilo got woko cen ki i dog wang pii, ka gimiyo romi gimato, ka dok gingilo got, gidwoko cen, kiumu ki dog wang pii kakare.

4Ci Yakobo openyogi ni, “Utmegina, wun wua ki kwene?” Gugamo ni, “Wan waa ki i Karan.” 5En openyogi ni, “Wun mono wungeyo Laban wod pa Nakor?” Gugamo ni, “Wangeyo en.” 6Ci dok openyogi dok ni, “En tye maber mono?” Gugamo ni, “En tye maber gire. Nen, nyare Lakeri tye kabino ki romigi ca!” 7Yakobo owacigi ni, “Nen, tipu peya oloke do, man peya kare me guru lee kacel; pingo pe wumii pii ki romi, wek dok wudwogi cen kacam i olet?” 8Ento gin gutite ni, “Wan pe watwero miyogi, wang ma lee ducu gucoke, gugure kacel, ka dong wangilo got woko cen ki iwang pii, ka dong wamiyo ki romi pii.”

9Ka onongo en pud tye kalok kwedgi, ci Lakeri ocoro ki romi pa wone, ma onongo kwayogi. 10Ka Yakobo oneno Lakeri nya pa Laban, nya pa omin mine, ki romi pa nerone Laban, Yakobo okato ci ongilo got woko cen ki iwang pii, ka ocako miyo romi pa nerone Laban gumato pii. 11Ci Yakobo onoto lem Lakeri, kun kok matek. 12Yakobo otito ki Lakeri ni, en ebedo wat pa wone kikome, dok en e wod pa Labeka; ci Lakeri oringo, ocito otito ki wone.

13Ikare ma Laban owinyo lok kom Yakobo wod pa lamine, ci oringo ocito kangolo wiye; okwako kore, onoto leme bene, ka ocako tere wa i ode. Yakobo otito lok magi ducu kore kikore bot Laban, 14ka Laban owace ni, “In ada i cogona dok i ringo koma bene!” Ci obedo kwede dwe acel.

Yakobo otiyo pi nyomo Lakeri ki Lea

15Laban ocako waco bot Yakobo ni, “Pien in i wata, dong ibitina tic nono bo? Ber itita, i mito aculi ki gin ango?” 16Laban onongo tye ki anyirane aryo; nying nyare madite Lea, ki nying matidine Lakeri. 17Lea onongo wange kingicngic, ento Lakeri nen mwonya mulinge. 18Yakobo onongo maro Lakeri: ci owaco ni, “Abitini tic mwaka abiro pi Lakeri, nyari matidini.” 19Laban ogamo ni, “Bedo ber mada ka amiyo en boti, makato ka amiye bot dano mukene; bed bota.” 20Yakobo otiyo pi Lakeri mwaka abiro; kare meno obedo macalo nino manok mo keken ki bot Yakobo, pien onongo iye omaro Lakeri mada.

21Yakobo openyo Laban ni, “Dong imiya dakona wek abed kwede, pien kare dong oromo.” 22Ci Laban otedo karama ci olwongo iye dano ducu ma gitye ikabedo meno. 23Ci okelo nyare Lea bot Yakobo otyeno, ci obutu kwede. 24Laban omiyo angecane Jilpa bot nyare Lea wek okonye. 25Odiko con ma piny oru, aye Yakobo oniang ni kara kimiye Lea aye. Yakobo owaco ki Laban ni, “Itima kuman pingo? Onongo pe abedo katic boti pi Lakeri? Ibwola kuman pingo?” 26Ento Laban ogamo ni, “Pe gitimo kitmeno i lobo tuwa kany, pe kimiyo nyako matidi aye kwongo ger ki madite. 27Kong i kur wangma ityeko kwero cabit me nyom piman, ci dok wabimiyi giri Lakeri bene, ka ibitina tic pi mwaka abiro mukene.” 28Ci Yakobo otimo kitmeno; ocobo cabit pa Lea, ka Laban omiye nyare Lakeri me bedo dakone. 29Laban dok omiyo angecane Bila bot nyare Lakeri wek okonye. 30Yakobo ocako bedo ki Lakeri bene; cwinye omaro Lakeri makato Lea, dok omede otiyo tic bot Laban mwaka abiro mukene.

Lutino ma kinywalo ki Yakobo

31Ma Rwot oneno ni gidag Lea, ci omiye nyodo; ento Lakeri ocung ma pe nywal. 32Lea ogamo ic, onywalo latin laco, ci ocako nyinge Reuben, kun waco ni, “Pien Rwot oneno aromana; koni olo dong cwara bimara.” 33Dok ogamo ic, ci onywalo latin laco, owaco ni, “Pien Rwot owinyo ni kidaga, omiyo dok omiya latin man bene,” ci ocako nyinge ni Cimeon. 34Lacen dok ogamo ic, onywalo latin laco, owaco ni, “Cwara dong bidwogo ikoma, pien dong anywale awobe adek kulu,” ma omiyo kicako nying latin nu Levi. 35Dok ogamo ic, onywalo latin laco, owaco ni, “Man aye kare ma abipako iye Rwot,” ma omiyo ocako nying latin Juda; ci kong ocung woko.