Acaki 28

1Ka Icaka olwongo Yakobo, ci olame gum, ka ocike ni, “In dong pe inyom dako mo ki ikin anyira me Kanaan. 2Ber ia, icit Paddan-aram i ot pa kwaru Becweri ma won meni; en aye inyom iye nya pa Laban ma omin meni kikome. 3Lubanga Matwero ducu omini gum, owek inya mapol, wek ibed lwak rok mapol. 41Dok omii gum pa Abraim opot ikomi, ki ikom likwayi, wek icam lobo ma ibedo iyeni macalo welo, mayam Lubanga omiyo ki Abraim!” 5Kitmeno Icaka ocwalo Yakobo, ocito i Paddan-aram bot Laban, wod pa Becweri me Aram, ma omin Labeka ma min Yakobo ki Ecau.

Ecau dok onyomo dako mukene

6Ecau oneno ni Icaka dong otyeko lamo gum ikom Yakobo, ka dok ocwale wa i Paddan-aram wek onyom dako ki kunu, dok ikare ma olame gum ocike ni, “In pe inyom nyako mo ki ikin Lukanaan,” 7dok Yakobo bene oworo dog wone ki mine, ci ocito i Paddan-aram. 8Ci ma Ecau oneno ni kit pa anyira Kanaan pe yomo cwiny wone Icaka, 9ci ocito bot jo Icmael, onyomo iye dako, omedo ikom mere ma con ca. Onyomo Makalat ma nya pa Icmael wod pa Abraim, ma lamin Nebaiot.

Lek obino iwi Yakobo i Betel

10Yakobo oa ki, Beer-ceba, ci odok tung Karan. 11Ka oo ikabedo mo, obutu kenyo idyewor meno, pien onongo ceng dong opoto woko. Ka otingo got acel mo ki ikin wadi, opyelo piny, oteno ki wiye, ci onino woko ikabedo meno. 122Lek obino iwiye, kun neno rwom ma kijengo tere ocung piny i ngom, ento wiye kijengo oo wa i polo; kun neno lumalaika pa Lubanga kun gilor piny, ka dok giito gidok malo. 133Ci oneno Rwot ocung tung ka wiye malo, kun wace ni, “An a Rwot, Lubanga pa kwaru Abraim, ki Lubanga pa Icaka; abimiyi lobo ma ibutu iyeni, abimiyo boti ki bot likwayi; 144dok likwayi gibibedo marom ki apwa me lobo, dok wubimede wuromo tung kupotoceng ki tung kunyango, ki tung kumalo ki tung kupiny bene; dok ikom in ki ikom likwayi en aye kaka ducu ma wi lobo bilimo iye gumgi. 15Nen, an atye kwedi, abigwoki kama ibiwoto iye ducu, dok abidwoki cen wa i lobo man; pe abiweki ata nio wang ma acobo gin ma atyeko lokone botini.” 16Ka Yakobo oco woko ki iwang nino, ci owaco ni, “Rwot tye ikabedoni ada; onongo an kara pe angeyo.” 17Ci lworo ocako make, kun waconi, “Kabedo man kara kabedo me awora kuman! Man ot pa Lubanga kikome, man aye dogcel me polo kikome.”

18Yakobo oa malo odiko con, otingo got ma oteno ki wiyeni, ci ocibo wek obed wir, ka oonyo moo iwiye. 19Ocako nying kabedo meno ni Betel5; ento nia wa con onongo nying kabedo meno gilwongo ni Luj. 20Ci Yakobo okwongo kwong kun waco ni, “Ka Lubanga bibedo kweda, kun gwoka i yo man ma awoto iyeni, ka dok bimiya kwon me acama, ki bongi me aruka, 21kace abidwogo wa i ot pa wora ki kuc, ci Rwot dong bibedo Lubangana. 22Dok kabedo man bene, ma acibo iye gotti, bidoko Ot pa Lubanga: ki gin ducu ma ibimiina, an bene abimini dul acel me apare.”