Acaki 27

Icaka olamo gum ki Yakobo

1Ka Icaka dong otii, ki wange bene dong ocido woko madong pe neno piny, ci olwongo latin kayone Ecau, owace ni, “Latina.” En ogamo ni, “Ana ene.” 2Ci Icaka owace ni, “Nen, an dong atii woko, pe angeyo nino ma abito iye. 3Dong ikwany jami dwari, jurani ki atummi, wek icit idwara lee, 4wek icela ringo makur, kit ma amaroni, ci ikela, wek dong acam cingi, ka dong alami gum ma peya ato.”

5Ikare ma Icaka tye kalok ki wode Ecau, onongo Labeka bene winyo. Ci Ecau okato ocito i tim ka dwaro lee, wek ekel ringone. 6Ci Labeka owaco ki wode Yakobo ni, “Abedo kawinyo woru ka loko ki omeru ni, 7‘Cit ikela ringo lee, wek icela makur, wek dong acam cingi, ka dong alami gum inyim Rwot ma peya ato.’ 8Ma omiyo latina, winy doga malube ki lok ma abicikini. 9A icit ikin dyegi, icit ikela lutino dyegi aryo ma komgi bulubulu. Wek an ayub ringone makur ki woru, kit ma en maroni, 10wek iter ki woru ocam cingi, wek olami gum ma peya oto.” 11Ento Yakobo ogamo dog mine kun wace ni “Nen ba, omera Ecau kome ki yer, ento an koma pwot. 12Gwok nyo ka wora bibonga, ci abinen macalo acito ka nyware, miyo bicena, pe bilama gum.” 13Ento mine ogamo doge kun waco ni, “Wek ceni opot ikoma, latina; winy doga keken, kat icit, icikelgi bota.” 14Ci en ocito, okelogi bot mine, ci mine ocelo ringo makur, kit ma wone maroni. 15Ka Labeka okwanyo ginaruka pa wode Ecau, ma en yam ruku mabereni, ma nongo tye i ot bot mine, ci oruku ki Yakobo wode matidini. 16Ka oboyo laa lutino dyeginu ki bade ducu, ki ngute bene kama yer pe iye; 17ka otingo ringo ma ocelo makuri, ki kwon ma omyeno, omiyo i cing wode Yakobo.

18Ci Yakobo odonyo kwede bot wone, kun wace ni, “Aba,” en oye ni, “An atye en do latina; in anga ce?” 19Yakobo ogamo dog wone ni, “An Ecau, latin kayoni. Atyeko timo kit ma nakanen ititani; dong i cukke, ia malo wek icam cinga, ka dong ilama gum.” 20Icaka owaco ki wode ni, “In inongo ringo oyotoyot marom man ningning, latina?” En ogamo ni, “Pien Rwot Lubangani omiyo gum okaya oyot.” 21Dok Icaka owaco bot Yakobo ni, “Kong inyik cok bota kany, wek abong komi latina, wek ange ka in latina Ecau kikome ada nyo pe.” 22Ci Yakobo onyiko cok bot wone Icaka; obongo kome, ci owaco ni, “Dwoni dwon Yakobo, ento badi en aye bad Ecau.” 23Ci dong pe omedo kingene, pien onongo bade ki yer macalo bad omine Ecau. Ka dong oye lame gum, ci openye ni, 24“In ada latina Ecau kikome?” En odok iye ni, “An kikoma.” 25Ci Icaka owace ni, “Kel cam bota cok, wek dong acam cing latina, ka dong alami gum.” Ci oketo cam inyime, ka ocamo; dok okele kongo bwino, omato bene. 26Ka dong wone Icaka owace ni, “Bin cok, wek inot lema, latina.” 271Ci Yakobo onyiko cok bote, ka onoto leme; ci wone ongweyo ngwec ginarukane, ka omiye gum, kun wace ni,

“Nen, ngwec kom woda kur

macalo poto ma Rwot omiyo gum ikome!

28Lubanga omii ki in toyo ma luk ma a ki i polo,

ki lobo ma ceko cam mapek. 292

Wek lwak jo mapol gubed lutici,

ki rok mapol bene guryebe piny inyimi.

Wek in aye ibed ladit maloyo omegini,

wek lutino awobe pa meni ducu bene guryebe piny inyimi.

Cen obed ikom dano ducu ma biceni,

dok gum obed ikom jo ducu ma bilami gum!”

Ecau okok pi gum pa Yakobo

30Cutcut madong Icaka otyeko lamo gum ki Yakobo ma en pud okato akata woko nia ki inyim wone Icaka, ci omine Ecau bene otugi dwogo ki ka dware. 31En bene ocelo ringo makur, okelo bot wone. Owaco ki wone ni, “Wore, dong icuke, ia malo, wek icam cing latini, ka wek dong ilama gum.” 32Wone Icaka owace ni, “In anga doki?” En ogamo ni, “An a wodi do, latin kayoni, Ecau do.” 33Kom Icaka ocako myel matek licukcuk, kun waco ni, “anga ma nakanen kong odwaro lee, okelani, madong atyeko camone woko ducu, ma onongo peya idwogoni, dok atyeko lame gum woko do, gum dong bibedo gire ikome.” 34Ikare ma Ecau owinyo lok pa wone, ci otoke ki twon koko madit magwar bene, kun waco bot wone ni, “Lama gum bene do, aya aba na!” 35Icaka dok owace ni, “Omeru obino, obwola, ci dong otyeko buyu gumi woko.” 363Ecau owace ni, “Pe dong ineno, nyinge gire kicako kakare ni Yakobo? Pien nen, en dong obuya kun laro jamina kiryo kulu. Okwongo buyu dit anywalina, dok nen, tin bene dok otyeko buyu guma woko.” Dok omede ki waco lok ni, “In dong pe igwoko gum mo pira ce?” 37Ci Icaka ogamo dog Ecau ni, “Nen, dong atyeko keto en me bedo rwodi otum, ki omege ducu atyeko miyogi me bedo lutice; amiye wa kal ki kongo bwino ducu kubed me pito en. Gin ango ma dok abimini do, latina?” 384Ecau dok owaco bot wone ni, “Onongo itye ki gum acel keken bo, wora? Lama gum, lama gum mo bene do, ai abana.” Ecau oilo wiye malo kakoko. 395Ci Wone Icaka ocako gamo loke ni,

“Nen, i bibedo bor ki lobo ma ceko cam mapek iye,

dok i bibedo bor ki toyo ma luk ma a ki malo ipolo. 406

Ibikwo meri ki lak pala lucwani,

i bibedo latic pa omeru;

ento ikare ma ibijemo ikome,

ci i bituru rii okol ma oriyo ingutini woko.”

41Ecau ocako kwero omine pi gum ma wone olamo ikomeni. Ecau opiro lok i cwinye ni, “Kare me to pa wora dong onyiko cok; en aye abineko iye omera Yakobo bene.” 42Ento ka gitito ki Labeka lok pa latin kayone Ecau, en ocwalo dano, olwongo Yakobo wode matidine, kun wace ni, “Nen, omeru Ecau obedo ma cuko cwinye kun oyube me neki. 43Ma omiyo in iwor doga, latina; a malo, ilwii, iring woko bot omera Laban i Karan. 44Kong icibed kunu, nio wang ma kiniga pa omeru opye; 45wek wiye kong owil i gin mayam itimo ikomeni; ka dong abicwalo dano kaomi ki kunu. Bibedi ningning ka arwenyo wun aryo ducu woko lawangacel?”

Icaka ocwalo Yakobo i Karan

46Ci Labeka dok owaco ki Icaka ni, “An dong iya odak woko ki ikom mon kit pa Ecau ni pi yo kwogi. Ka dok Yakobo bene binyomo anyira Kit marom ki mon ma gitye i loboni, ci dong kwo na bikonyo ango?”