Acaki 26

Icaka i Gerar ki i Beer-ceba

1Kec dok opoto i lobo aye, ma pat ki kec mayam kong opoto ikare pa Abraim ca. Ka Icaka ocito i Gerar, bot Abimelek rwot Piliciti. 2Ci Rwot onen bote kun wace ni, “Pe icit i lobo Ejipt; ber ibed i lobo ma abititi. 31Kong ibed i lobo man calo adonyi, an bene abibedo kwedi, abimiyi gum; pien lobo man ducu abimiyo boti ki bot likwayi, dok abicobo kwong mayam akwongo bot woru Abraim. 4Abimiyo likwayi nya mapol macalo lwak lakalatwe me polo, abimiyo ki likwayi lobo man ducu; dok rok ducu ma iwi lobo gibilimo gumgi ki ikomgi. 5Pien yam Abraim oworo doga, kun cobo cika ki gin ma aciko ducu.”

6Ci Icaka obedo i Gerar. 72 Ma jo kunu gupenye lok kom dakone, en ogamo ni, “En lamera,” pien olworo waco ni, “Dakona,” kun tamo ni, “Wek wegi lobo pe guneka woko pi Labeka,” pien en onongo mwonya mada. 8Ikare madong odike kunu, ci Abimelek rwot pa jo Piliciti oneno Icaka ki iwang dirica ka obedo katuku ki dakone Labeka. 9Abimelek olwongo Icaka ci owace ni, “Nen, man dakoni; pingo in kono nene iwaco ni, ‘En lamera’?” Icaka odoke iye ni, “Pien onongo atamo ni, nyo koni kitwero neka woko pire.” 10Abimelek ogamo ni, “Itimowa kuman pingo? Ka nene dano mo obutu ki dakoni, kono ikelo bal ikomwa nonono.” 11Abimelek ocako juku lwake ducu, kun waco ni, “Ka dano mo otero laco man nyo dakone marac, ci kibineke woko.”

12Ci Icaka ocoyo kodi i poto i lobo meno; ci okayo cam ma dodo tyen miya i mwakanu. Rwot aye omiye gum, 13omiyo danoni odoko lalonyo, obedo ka mede ki limo jami, nio ka odoko twon lalonyo. 14Olimo lim madwong makwo, dyangi ki dyegi, ci gange opong ki lwak dano, omiyo nyeko omako jo Piliciti ikome.

15Piman jo Piliciti gujuku wang it mayam con lutic gukwinyo ma wone Abraim pud kwo. 16Ci Abimelek owaco ki Icaka ni, “A woko ki botwa, pien in dong idoko tek ikatowa woko.”

17Ci Icaka oa woko ki botgi, ocito, otiro i nota me Gerar, kama ogony ci obedo iye. 18Icaka dok ogolo wang pii mayam kikwinyo ikare pa wone Abraim; pien yam kong jo Piliciti gujukugi woko ikare madong wone Abraim oto wokoni; ci dok olwongo nyinggi kit mayam wone, olwongogi kwede. 19Ento ma lutic pa Icaka gutyeko kwinyo wang it i notanu, ci gunongo iye wang it malongo. 20Lukwat pa jo Gerar gucako da ki lukwat pa Icaka, kun giwaco ni, “Pii man mewa.” Ma omiyo en ocako nying wang pii meno ni Ecek,3 ni pien gubedo ka daa kwede. 21Ka dong okwinyo wang it mukene, dok gucako daa pi eno bene; ma omiyo olwongo ni Citna.4 22Icaka dok oa woko ki kunu, okwinyo wang it mukene dok aye. Pe dong daa obedo tye pimeno; ma omiyo olwongo nyinge ni Rekobot,5 kun waco ni, “Pien tin dong Rwot oyabo ki wan kabedo malac, dong wabinya i loboni.”

23Lacen Icaka oa woko ki kunu odak i Beer-ceba. 24Rwot dok onen bote idyewor meno, kun wace ni, “An Lubanga pa woru Abraim; pe ilwor, pien atye kwedi, abimiyi gum, dok abimiyo likwayi nya mapol pi gicikena bot latica Abraim.” 25Ci Icaka ocano keno tyer pi Rwot kunu, ci oworo iye Lubanga; ci oguro kemane kunu. Lutic pa Icaka dok gukwinyo wang it kunu.

Cike ikin Icaka ki Abimelek

266

Abimelek ocito bote, oa ki i Gerar, kacel ki Akujat lamii tam, ki Pikol ladit lawimony mere. 27Ci Icaka owaco botgi ni, “Wun wubino bota pi lok ango, ma wun wudaga, dok yam dong wuryema woko ki i lobowu?” 28Gin gugamo ni, “Wan waneno atir ni Lubanga tye kwedi, ma omiyo wawaco ni, wek kwong obed ikin in ki wan, wek waket gicike ki in, 29wek pe ibitimwa marac, kit macalo wan bene yam pe wagud komi, pe bene watimo gin mo marac ikomi, ento tim mabere keken, dok bene waryemi woko ia ki ikinwa ki kuc. Kombedi in aye ngat ma Rwot omiyo gum ikome.” 30Ci otedigi karama, ka gucamo, gumato. 31Gua malo odiko con, ci gukwongo kwong ngat man ki lawote; ka dong Icaka olwokogi i yo tugi, gua, gupoke kwede ki kuc. 32Inino meno bene kikome en aye lutic pa Icaka gubino bote, gutite lok kom wang it ma gityeko kwinyone, kun giwace ni, “Watyeko nongo pii.” 33En ocako nyinge ni Ciba, ma omiyo nying gang meno kilwongo ni Beer-ceba nio wa onyo.

34Ka Ecau dong dite romo mwaka pyere angwen, ci onyomo mone, Judit nya pa Beeri, jo Kit, ki Bacemat nya pa Elon, jo Kit bene. 35Mon magi gumiyo cwercwiny madwong bot Icaka ki Labeka.