Acaki 25

Likwayo pa Abraim ma Ketura onywalo

(1 Tek 1:32-33)

1Abraim dok onyomo dako mukene, ma nyinge Ketura. 2En onywale Jimran, Yokocan, Medan, Midian, Icibak ki Cua. 3Yokocan onywalo Ceba ki Dedan; lutino awobe pa Dedan gin ene: Acurim, Letucim ki Leumim. 4Lutino awobe pa Midian gin aye Epa, Eper, Kanok, Abida ki Eldaa. Gin ducu likwayo pa Ketura. 5Abraim omiyo jamine ducu bot Icaka. 6Ento lutino awobe pa mone ma angeca Abraim opoko botgi mot bene, ikare ma pud en kwo; ci ocwalogi woko cen nia ki ka nget wode Icaka. Gudok tung kunyango i lobo mudok tung kunyango.

Abraim oto ci kiyike

7Man aye wel nino me kwo pa Abraim; oromo mwaka miya acel ki pyere abiro wiye abic. 8Abraim oomo cwinye me agikine, ci oto woko, ma mwakane dong dit, dano muteggi, madong otii, ci kiyike ikin lutugi. 9Awobene Icaka ki Icmael guyiko kome i boro lyel ma i Makpela, ma i poto pa Epron wod pa Jokar, ma Lakit, tung kunyango me Mamre, 101i poto mayam Abraim owilo ki bot jo Kit. Kiyiko Abraim kenyo, kacel ki dakone Cara. 11Lubanga omiyo gum ki Icaka ki inge to pa wone Abraim, ci Icaka ocako bedo i Beer-lakai-roi.

Likwayo pa Icmael

12Man aye likwayo pa Icmael wod pa Abraim, ma Agar angeca pa Cara, anyira Ejipt, onywalo ki Abraim. 13Man nying lutino awobe pa Icmael, kun lubu kit ma kinywalogi kwede: Nebaiot, en latin kayo pa Icmael; ki Kooar, Adbeel, Mibcam, 14Micima, Duma, Maca, 15Adad, Tema, Jetur, Napic ki Kedema. 16Man aye awobe pa Icmael, nyinggi ene, kun lubu gangigi, ki kabedogi; gin luker apar wiye aryo macalo rokgi tye. 17Icmael yam orii wi lobo mwaka miya acel ki pyere adek wiye abiro; ci oomo cwinye me agikine, oto woko, odok bot lutugi. 18Kabedogi yam ocake nia ki Kavila nio wa i Cur mukemo tung Ejipt ma dok tung Aciria; en obedo ikabedone pat kun pyem ki utmegine ducu.

Nywalo Ecau ki Yakobo

19Man aye likwayo pa Icaka, wod pa Abraim: Abraim onywalo Icaka, 20Icaka onyomo dakone Labeka kun onongo tye ki mwaka pyere angwen; Labeka yam nya pa Becweri ma jo Aram, ma i lobo Paddan-aram, lamin Laban ma jo Aram. 21Icaka ocako lego Lubanga pi dakone, pien onongo lalur; ci Rwot ocwako kor legane, ka dakone Labeka ogamo ic. 22Ikare ma lutino gubedo ka twome ki i iye, en owaco ni, “Kace gitime kitmeno, man nyutu gin ango?” Ci ocito ka penyo dog Rwot. 232Ka Rwot otite ni,

“Rok aryo aye gitye i ii;

Rok aryo meno ma ibinywaloni gibipoke woko.

Acel bibedo oteka makato lawote;

Latin kayo bibedo latic pa latin matidi.”

24Ka kare me gonyene oromo, ci en onywalo lutino rudi. 25Onywalo latin kayo ma kome kwar, kome ducu obedo ki yer calo bongo yer; omiyo kicako nyinge ni Ecau. 26Lacen dok kinywalo omine, kun cinge omako opuny tyen Ecau, omiyo kicako nyinge ni Yakobo. Ikare ma kinywalo lutinonu onongo Icaka dite dong romo mwaka pyere abicel.

Ecau ocato dit me anywaline woko

27Ma awobe meno gudongo, ci Ecau obedo oken makwiri, ladwar i tim, Yakobo obedo lamwolo, kun bedo mere i kema mot. 28Icaka yam maro mere Ecau, pien onongo bedo kacamo cinge; ento Labeka dok onongo maro mere Yakobo.

29Ikare ma Yakobo tye katedo dek ngor, ci Ecau oa ki i tim, odwogo ma kec obwoye woko. 30Ci Ecau olego Yakobo ni, “Miya dek ngor ma oboki wek acam, kec obwoya woko.” Pi lok meno omiyo kilwongo nyinge Ecau ni Edom3. 31Yakobo owace ni, “Kong icata dit me anywalini.” 32Ci Ecau ogamo ni, “An acok to woko; dit me anywalini kono konye tye kwene?” 334Yakobo ogamo ni; “Kong icak ki kwonga kwong.” Ma omiyo en okwonge kwong, ci ocato dit me anywaline woko bot Yakobo. 34Ka Yakobo ocako miye kwon ki dek ngor, ka ocamo, omato pii i wiye, ci oa malo, ocako wot ocito woko. Ecau ocayo dit me anywaline kitmeno.