Acaki 24

Kinyomo dako ki Icaka

1Ikare ma Abraim dong otii, ma mwaka me dite dong dwong, dok onongo Lubanga dong otyeko miyo gum ki Abraim i gin ducu. 2Ci Abraim owaco ki latice matye i ode, ma onongo loyo jamine ducu, ma oteggi ikin gi ni, “Rwak cingi odony piny ikin ema. 3Amitoni ikwong kwong ki nying Rwot, Lubanga me polo ki lobo ni, pe ibinyomo nyako mo ki woda ma ikin anyira Kanaan, ma abedo i kingini. 4Ento ibicito i lobo tuwa, i kakawa; en aye ibinyomo iye dako ki woda Icaka.” 5Latice ogamo ni, “Gwok nyo dako aye pe biye bino kweda wa i lobo man; omyero an aye adok ki wodi i lobo tuwu mayam i a ki iyeni ba?” 6Abraim owace ni, “Nen maber ni, pe icito ki woda me dwoke cen kunu. 7Rwot Lubanga me polo mayam okwanyo an ki i paco pa worani, ki i lobo ma ginywala iyeni, mayam oloko kweda kun kwonga kwong, ni; ‘Abimiyo lobo man bot likwayi,’ en bicwalo lamalaikane inyimi, ci ibinyomo dako ki woda nia ki kunu. 8Ento ka dako aye pe oye bino kwedi, ci kwonga man ma akwongoni pe bimaki; ento pe myero idwok woda cen kunu.” 9Kitmeno latice orwako cinge, odonyo piny ikin em rwode Abraim, ci okwongo kwong ikom lok meno.

10Latice okwanyo kinaga pa rwode maromo apar, ka ocako wot, kun otero bene jami mabeco mapatpat; ci oa me wot me cito i Mecopotamia, i taun mayam Nakor obedo iye. 11En omiyo kinaga orumu conggi piny inge gang macok ki wang pii ikin otyeno abwora, ikare ma mon gicito iye ka twomo pii. 12Ci olego ni, “Ai Rwot, Lubanga pa rwoda Abraim, mii lok ducu owota maber tin. Alegi inyut mar meri ma pe loke ikom rwoda Abraim. 13Nen, acung inget wang pii en, kama anyira ma i gang man gubebino bene ka twomo pii. 14Nyako mo ma abilege pii amata, ni; ‘Kong icib aguluni piny, wek imiya pii amati,’ ci nyako ma biwaco gire kene ni, ‘Kong imati, ka dong abimiyo kinagani bene gimato,’ wek en aye obed nyako ma iyero pi latici Icaka. Kitmeno bimiyo angeyo ni; in dong inyutu ki rwoda mar meri ma pe lokeni.”

15Ma pud peya otyeko loke, ci nen, Labeka, nya pa Becweri, wod pa Milka, dako pa Nakor, ma omin Abraim, otuc iwang pii ki agulu piine ma obolo iwi gwoke. 16Nyakone onongo nen mwonya tutwal, nyako ma peya ngeyo laco dok ngat mo peya omako cinge. Ci nyako meno olor, odonyo iwang pii, otwomo pii opongo agulu piine, ka odwogo, okati kwede woko. 17Latic meno oringo, ongole inyime, ci owace ni, “Alegi ba, kong imiya pii ma i aguluni amati.” 18Ci nyakonu ogamo ni, “Kong imat ladita,” en otugi tingo agulu piine i cinge, omiye omato. 19Ka otyeko, ci owaco gire kene ni, “Abitwomo pii, amiyo ki kinagani bene, nio ka gumato pii oromogi.” 20Oyotoyot oonyo pii i wee, ci oringo odok ka twomo pii iwang it, otwomo pii nio ka oromo kinaga ducu. 21Laco meno ociko wange ikome laling, wek eniang ka Rwot otyeko miyo luguma okaye i yo woteni, nyo pe.

22Ka kinaga gutyeko mato pii, laco meno okwanyo atego um me jabu ma peke romo nucu cekel, ki atego jabu aryo me ngut cing ma pekgi rom ki cekel apar me jabu, omiyo ki nyako meno 23kun penye ni, “In mono i nya pa nga? Kabutu mo twero nonge pirwa i gang pa woru?” 24En ogamo ni, “An anya pa Becweri ma wod pa Milka, ma onywalo ki Nakor.” 25Dok otite ni, “Watye bene ki reng kal ki cam maromo kinaga, wa kabutu bene nonge.” 26Laco meno okulu wiye piny, ci oworo Rwot, 27kun waco ni, “Kipak Rwot, Lubanga pa rwoda Abraim, ma pe oweko mar mere ma pe loke, ki adane, ikom rwoda. An bene, Rwot dong otyeko telo wiya, okela wa i ot ma i kaka pa rwoda kikome.”

28Ci anyakanu oringo otito lok ma otime ducu bot jo matye i ot pa mine. 29Labeka onongo tye ki omine ma nyinge Laban. Ci Laban oringo ocito bot laco meno, wa iwang it. 30Ka oneno atego um, ki atego i ngut cing lamine, ki pi winyo lok pa lamine Labeka ni, “laconi oloko bota kit man,” ci ocito bot laconu, ci nen, onongo ocung cok ki kinagane inget wang it. 31Laban owace ni, “Bin wa i ot, pien Rwot otyeko miyi gum; pingo dok icung ki woko kany? Pien dong atyeko yubu ot wa ki kabutu pa kinaga bene.” 32Laconi obino, odonyo i ot; ka Laban ocako gonyo del woko ki ikom kinaga, omiyo reng kal ki cam bot kinaga, okelo pii lalwok tyene ki tyen jo ma owoto kwede. 33Ka kikelo cam kicibo inyime wek ocam; ento en owaco ni, “An peya abicam, nio ka atito kit kwena ma kiora kwede.” Ci ogamo ni, “Tit do.”

34Ci en otito ni, “An latic pa Abraim. 35Rwot otyeko miyo gum madit omako rwoda, dong odoko dano madit, omiyo en olimo lim makwo, dyegi ki dyangi, ryal ki jabu, lwak opii ki lwak angeca, kinaga mapol, ki lwak kana. 36Ikare ma rwoda dong oteggi, ci Cara dakone onywalo latin laco, en aye kimiye oleyo lim ducu ma en tye kwede. 37Rwoda omiya akwongo kwong, kun owaca ni, ‘Pe ibinyomo nyako mo ki woda ki ikin anyira Kanaan, i lobo ma abedo iyeni. 38Ento ibicito i ot pa wora, ki ikin lutuwa, en aye icit inyom iye dako ki woda.’ 39Ci agamo dog ladita ni, ‘Gwok nyo dako pe biye bino kweda kono.’ 40Ento en odoka iye ni, ‘Rwot ma abedo kalubu cikeni bicwalo lamalaikane nywako kwedi yo, ci luguma bikayi i yo woti; in ibinyomo dako ki woda nia i ot pa wora kikome. 41Ci kwonga dong pe bimaki, ka dong icito bot lutuwa; kace gin aye pe gumiyi nyako, ci kwonga dong pe bimaki.’

42Tin ka ao iwang pii, ci alego ni, ‘Ai Rwot, Lubanga pa rwoda Abraim, ka tin ibimiyo luguma kaya i wota man ma awoto iyeni, 43ci nen, acung inget wang pii en; nyako mo ma bibino ka twomo pii, an abiwace ni, alegi ba, miya pii mo ki aguluni amati.’ 44Nyako ma bigamo ni, ‘Kong imati, dok abitwomo mukene pi kinagani bene,’ en aye obed dako ma Rwot oyero me bedo dako pa wod pa ladita.

45Ikare ma pud peya atyeko loko lok matye icwinya, ci nen, Labeka otuc, mubolo agulu piine iwi gwoke, ci olor odonyo iwang pii, ka otwomo pii. Ci alege ni ‘Miya pii amat ba!’ 46En otugi tingo agulu piine ki iwi gwoke kun waco ni, ‘Kong imati, ci abimiyo kinagani bene gimato.’ Ci an amato, ka en omiyo kinagana bene gumato. 47Dok apenye ni, ‘In kono i nya pa anga ka?’ En ogamo ni, ‘An anya pa Becweri ma wod pa Nakor, ma Milka aye onywalo.’ Kitmeno an acako keto agit i ume, ki atego jabu i ngut cinge ryoryo. 48Ka akulu wiya piny, aworo Rwot ci apwoyo Rwot, Lubanga pa rwoda Abraim, ma otela i yo maber, omiya anongo nya pa omin ladita me atera bot wode. 49Kombedi ka wubitic ki rwoda ki mar ki ada, wutita; ka pe bene wutita; wek aloke adok yo tung cing acuc nyo tung kumalo.”

50Laban ki Becweri gugamo ni, “Lok man oa ki bot Rwot; pe watwero dok iye marac nyo maber. 51Nen, en Labeka tye inyimi eno; in ikwany en, wuwot kwede, wek en ocit obed ciwod pa laditi, macalo Rwot dong otyeko wacone.”

52Ka latic pa Abraim owinyo lok meno, ci ocako ryebe piny i ngom inyim Rwot. 53Ci latic okwanyo lwak atego ryal ki atego jabu, ki lwak ginaruka, otingo omiyogi bot Labeka; ka dok omiyo ki omine ki bot mine jami me wel. 54En ki jo ma gitye kwede gucako camo cam ki mat, ci gubutu nino acel kunu. Ka gua malo odiko, ci olego ni, “Dong wucwala adok bot ladita.” 55Laban ki mine gugamo ni, “Wek kong anyaka obed kwedwa kare manok, maromo nino apar; lacen en dong bicito gire.” 56Ci latic pa Abraim ogamo kun waco botgi ni, “Pe wugal wiya; pien Rwot dong omiyo luguma okaya i wot man, wuwek dong acak wot, adok bot ladita.” 57Ci gin gugamo ni, “Kong walwong nyako, wapenye.” 58Ka kilwongo Labeka, gipenyo kun giwace ni “Ibiye wot ki laco man?” En ogamo ni “Abiwot.” 59Kitmeno gucako cwalo nyargi Labeka ki dako ma konye, kacel ki latic pa Abraim ki jone. 60Gulego gum ikom Labeka, kun giwace ni, “Laminwa, bed megi jo alip ki alip ma pe twero kwane; ki likwayi gulo gang pa lumerokgi!” 61Lacen Labeka ki lwak angecane gua, gucako wot, guito wi kinaga kun gilubu kor laco meno; kitmeno latic meno ocako wot ki Labeka, kun gidok i yo tugi.

62Icaka onongo obino oa ki Beerlakai-roi; ikare meno onongo en bedo i Negeb. 63Icaka ocito woko i bar kalwodo lok iwi otyeno; ci oilo wange malo, oneno kinaga ka tye kabino. 64Ikare ma Labeka oneno Icaka, ci olor woko ki iwi kinaga, opye piny. 65Ka openyo latic pa Abraim ni, “Meno laco mene ma loka ca, ma woto i bar kun bino ka romo kwedwani?” Latic ogamo ni. “En aye laditani.” Labeka okwanyo bongo oume kwede. 66Ci latic otito bot Icaka lok ducu ma otime. 67Icaka okelo Labeka i kema ma mine Cara onongo bedo iye, ci obedo kwede, odoko dakone, kun mare bene. Kitmeno cwiny Icaka ocako kwe ki inge to pa mine.