Acaki 23

Cara oto ci Abraim owilo kabedo me yik

1Cara orii mwaka miya acel ki pyere aryo wiye abiro; meno aye wel mwaka me kwo pa Cara. 2Cara oto i Kiriat-arba, ma en aye Kebron, ma i lobo Kanaan; Abraim odonyo i ot okumu, okoko Cara ki pig wange. 3Lacen Abraim oa woko ki inyim lato, ocito owaco bot jo Kit ni, 41“An adonyi, madong atyeko bedo ikinwu; wumiya dul lobo mo ikinwu ma bibedo kabedo me yiko dano, wek ayik iye dakona wek oa woko ki i wanga.” 5Jo Kit gugamo dog Abraim ni, 6“Winy, laditwa; in laker madit ikinwa kany, yik kom latoni i lyel maber ma iyero ikin lwak lyel mewani: pe tye ngat mo ma ikinwa ma bitwoni bur lyele, nyo ma bigengi ni pe iyik latoni iye.”

7Abraim oa malo, ci oryebe inyim jo Kit, ma wegi lobonu, 8kun waco ki gin ni, “Ka onongo wumito ni ayik latona wek oa woko ki i wanga, wuwiny loka, wulega Epron ma wod pa Jokar, 9wek oye mina boro ma i Makpela, ma mereni, matye iwi agiki potone. Wek ongola wele kikome maromo wilone, omii bota inyimwu, wek odok mera me kabedo me yik.”

10Ikare meno onongo Epron bene tye, obedo ikin jo Kit, ci Epron Lakit ogamo dog Abraim, ma jo Kit ducu giwinyo, kacel ki lwak ducu ma gibedo i taun meno, 11kun waco ni, “Pe kumeno ladit, winy loka; amini poto, dok amiyi wa ki boro matye iyeni ki inyim lutuwa ducu; yik iye kom latoni.” 12Abraim dok oryebe inyim wegi lobonu, 13ka owaco ki Epron, ma wegi lobo ducu giwinyo ni, “Ento ka iye, ci winy loka, Abimiyi wel lawil poto, in ibigamo lim ki i cinga, wek ayik iye kom latona.” 14Epron owaco bot Abraim ni, 15“Ladita, winy loka ya; wel dul potonu romo cekel me ryal miya angwen, meno kono gin ango ki tung boti ki an bene? Yik iye kom latoni.” 16Ci Abraim owinyo dog Epron; ci opimo ki Epron wel ryal ma owaco inyim jo Kit, maromo cekel me ryal miya angwen kulu, kun pimo ki kidi mijan ma lucatwil gipimo kwedeni.

17Kitmeno poto pa Epron ma i Makpela, mayam tye tung kunyango me Mamre, poto kacel ki boro mayam tye i potonu, ki yadi ducu matye i potonanu, ma gurumu dyere ducu, kimiyogi, kimoko gin ducu 18me bedo pa Abraim, ki inyim jo Kit ducu, kacel ki inyim lwak ducu ma gubedo i kacoke meno. 19Ka lok meno otum, Abraim oyiko dakone Cara i boro matye i poto Makpela tung kunyango me Mamre, ma en aye Kebron, ma i lobo Kanaan. 20Lukit gumoko ni potonu, kacel ki boro matye iye, gubed pa Abraim me kabedo me yik.