Acaki 1

Lubanga ocweyo polo ki lobo

1I acaki Lubanga ocweyo polo ki lobo. 2Lobo onongo tye nono, onyobe woko atata, piny macol ocido wi kut matut, kun Cwiny pa Lubanga twago wi pii. 31

Ci Lubanga owaco ni, “Wek dero obed tye,” ci dero obedo tye. 4Lubanga oneno dero ni ber; Lubanga opoko kin dero ki colpiny. 5Lubanga olwongo dero ni Dyeceng, ki colpiny olwongo ni Dyewor. Piny oyutu dok piny oru, meno nino me acel. 62

Ci Lubanga owaco ni, “Wek pete orine ikin pii, me poko kin pii ki pii wadi.” 7Ci Lubanga oyubu pete me poko pii matye piny ite pete ki pii matye malo iwi pete; ci otime kitmeno. 8Lubanga olwongo dan pete ni polo, piny oyutu dok piny oru, meno nino me aryone.

9Ci Lubanga owaco ni, “Wek pii matye ite polo ocoke, ogure ikabedo acel, wek piny ma otwo onen.” Ci otime kitmeno. 10Lubanga olwongo piny ma otwo ni Lobo, ki pii ma ocoke, ogure kaceli ni Nam; ci Lubanga oneno ni ber. 11Ci Lubanga owaco ni, “Wek gin malot ducu ma a ki i ngom otwi iwi lobo, ki ginapita ma nyako nyiggi, ki yadi ma nyako nyiggi ma kodi tye i igi, ki kit kwayigi ducu.” Ci otime kitmeno. 12Kitmeno gin malot ducu ocako twi iwi lobo, ki ginapita ma nyako nyiggi ikit kwayigi ki acel acel, ki yadi ma nyako nyiggi ma kodi tye i igi, ikit kwayigi ducu. Ci Lubanga oneno ni ber. 13Piny oyutu dok piny oru, meno nino me adeke.

14Ci Lubanga owaco ni, “Wek gin maryeny obed ikom pete me polo me poko dyeceng ki dyewor, ki me bedo ginanena ma nyutu kare ki nino ki mwaka, 15wek guryeny ikom pete me polo ma menyo lobo.” Ci otime kitmeno. 16Ci Lubanga ocweyo gin madito aryo ma giryeny, wek maryeny madite aye oloo dyeceng, ki maryeny matidine oloo dyewor; dok ocweyo lwak lakalatwe bene. 17Lubanga oketogi ikom pete me polo me menyo lobo, 18me loyo dyeceng ki dyewor, ki me poko kin dero ki colpiny. Ci Lubanga oneno ni ber. 19Piny oyutu dok piny oru, meno nino me angwene.

20Ci Lubanga owaco ni, “Wek pii onywal gin makwo ma gicore limuk, ki winyo bene gutuk lamal iwi lobo i dan pete me polo.” 21Lubanga ocweyo nyang madongo i nam, ki kwayi gin makwo ducu mapatpat ma gimol, ma gicore limuk i pii, ikit kwayigi ducu mapatpat, ki winyi ma gituk ki bwomgi, ikit kwayigi ducu mapatpat. Ci Lubanga oneno ni ber. 22Lubanga omiyogi gum kun waco ni, “Wunywal, wunya, wupong pii ki nam, winyo bene gunya iwi lobo.” 23Piny oyutu dok piny oru, meno nino me abice.

24Ci Lubanga owaco ni, “Wek lobo onywal lee makwo ikit kwayigi ducu: lee ma paco, ki gin ma lak alaka piny i ngom ki lee me tim madongo ki matino ikit kwayigi ducu mapatpat.” Ci otime kitmeno. 25Lubanga ocweyo lee tim ikit kwayigi ducu mapatpat, ki lee ma paco ikit kwayigi ducu mapatpat, ki gin ma lak alaka piny i ngom, ikit kwayigi ducu mapatpat. Ci Lubanga oneno ni ber. 263

Ci Lubanga owaco ni, “Weku wacweyu dano ma gical ki wan; wek gin aye gulo rec ma i nam, ki winyi me polo, ki lee ma paco, ki ma iwi lobo ducu, gulo bene gin ducu ma lak alaka iwi lobo.” 2745 Ci Lubanga ocweyo dano ikit calle kikome; en ocweyogi laco ki dako. 28Lubanga omiyogi gum kun waco botgi ni, “Wunywal, wunya, wupong lobo, wulo bene; dok wulo wa rec ma i nam, ki winyi me polo, ki gigu ducu makwo ma giwoto iwi lobo.” 29Ci Lubanga owaco ni, “Nenu, amiyowu ginapita ducu ma nyako nyiggi matye iwi lobo ducu, ki yadi ducu ma nyako nyiggi ma kodi tye i igi; wubicamogi. 30Dok lee ducu me tim, ki winyi ducu me polo, ki gin ducu ma lak alaka wi lobo, ma gitye ki kwo, amiyo botgi ginapita ducu madyak me bedo camgi.” Ci otime kitmeno. 31Lubanga oneno gin madong en ocweyo ducu, ci nen, tye mabeco tutwal. Piny oyutu dok piny oru, meno nino me abicele.