Acaki 2

1Polo ki lobo yam cwece otum kitmeno, ki lwak mony matye iye ducu. 212Ma nino me abiro romoni onongo Lubanga dong otyeko tice mayam otiyo woko ducu; en oywe ikom nino me abiro ki i tice ducu mayam otiyo. 3Ci Lubanga omiyo gum ikom nino me abiro, olonyo obedo maleng, pien ikom nino meno en aye Lubanga yam oywe iye ki itice ducu ma en otiyo me cweyo polo ki lobo.

4Man aye acaki nya pa kwayi gigu ducu ma i polo ki i lobo ikare ma Rwot Lubanga ocweyogi kwede.

Poto me Eden

Inino meno ma Rwot Lubanga ocweyo iye polo ki loboni, 5yat mo me tim onongo peya tye iwi lobo, onongo doo mo pud pe ma otwi iwi lobo, onongo Rwot Lubanga peya omiyo kot ocwer i lobo, dok onongo peya tye dano mo ma puru lobo; 6ento lupuu onongo duny malo, ci bido lobo ducu. 73Ci Rwot Lubanga ocweyo dano ki apwa me ngom, ka yaka okutu aluu me kwo i ume, ci dano odoko gin makwo.

8Ci Rwot Lubanga oyubu poto i Eden, tung kunyango: ci oketo iye dano ma en ocweyoni. 94Dok Rwot Lubanga omiyo yadi gutwi i ngom, kwayi yadi ducu mamwonya manen maber, ki mabeco me acama. Yat me kwo onongo ocung i dye poto bene, ki yat mamiyo ngec me gin maber ki marac.

10Kulu yam onongo mol a ki i Eden, makelo pii i poto, iye opoke ki kunu, odoko kulu angwen. 11Nying kulu mukwongone Picon; en aye kulu mamol rumu lobo Kavila ducu, ma jabu nonge iye. 12Jabu matye i lobo meno beco; odok yat ma kilwongo ni bedola ki got onik tye kunu bene. 13Nying kulu me aryone Gikon, ma orumu lobo ducu me Kuc. 14Ki nying kulu me adeke Taigric; mol dok tung kunyango me Aciria. Ki kulu me angwene Euprate.

15Rwot Lubanga otero dano, oketo i poto Eden wek opur, dok ogwok bene. 16Ci Rwot Lubanga ociko dano ni, “Yadi ducu matye i poto, camgi kit ma i mito; 17ento yat mamiyo ngec me gin maber ki marac pe icam, pien inino ma ibicamo iye, en aye ibito iye bene.”

18Ka dok Rwot Lubanga owaco ni, “Pe ber dano obed kene; abiyubu lawote ma opore kwede wek obed lakony kore.” 19Ci Rwot Lubanga ocweyo lee tim ducu ki winyo ducu me polo, nia ki i ngom, okelogi bot dano me neno kit ma obicako ki nyinggi. Kit mayam dano ocako ki nying gin makwo acel acel ducu, en aye obedo nyinggi. 20Dano ocako nying lee ma paco ducu, ki winyo me polo, ki lee tim ducu; ento lakony pa dano ma opore kwede aye onongo pud pe onen. 21Rwot Lubanga omiyo nino madwong omako wang dano; ma en tye kanino, ci okwanyo cogo lakngete acel, omwono wange woko ki ringo. 22Ci cogo ma Rwot Lubanga okwanyoni ocweyo odoko dako, ka okelo bote. 23Dano owaco ni,

“Man aye cogo ma oa icogona kikome,

ki ringo bene ma oa ki i ringona kikome;

kibilwongo nyinge ni ‘dako,’

pien kikwanye ki ikom laco.” 245

Ma omiyo laco weko wone ki mine, ci moko ikom dakone liking, gin aryoni dong gidoko kom acel. 25Ikare meno laco ki dakone onongo pud gibedo munero ma lewic pe makogi.