Acaki 3

Acaki bal

11

Twol yam onongo ryek makato lee tim ducu ma Rwot Lubanga ocweyo. En owaco ki dako ni, “Lubanga mono owaco ada ni, ‘Pe wucam yat ducu matye i potoni’?” 2Dako otito ki twol ni, “Watwero camo nyig yadi ducu matye i potoni, 3ento Lubanga ociko ni, ‘Pe wubicamo nyig yat matye i dye poto, pe wugud kome bene, wek pe wuto.’” 4Ci twol owaco ki dako ni, “Pe wubito wa ki acel. 5Lubanga owaco kitmeno pien en ngeyo ni ka wucamo, ci wangwu biyabe woko, ci wubidoko calo Lubanga, miyo wungeyo gin maber ki marac.” 6Ka dako oneno ni yate ber me acama, dok nen mwonya bene, dok yat meno ber, ci cwiny dako opyete ikome, pien miyo gidoko ryek, ci opwono nyige, ocamo; omiyo mogo bot cware, ci ocamo. 7Gin aryo ducu wanggi oyabe woko, gucako ngeyo ni kara gitye munero, ci gukwoyo pot olam guruku ipyergi.

8Ma guwinyo Rwot Lubanga woto i poto ikare ma ceng okwe, ci dano ki dakone gukane woko cen ki inyim Rwot Lubanga ikin yadi matye i poto. 9Ci Rwot Lubanga olwongo laco kun penye ni, “In mono itye kwene ka?” 10En ogamo ni, “Awinyo ka iwoto i poto, ci lworo omaka, pien atye munero, akane woko.” 11Dok openye aye ni, “anga madong otiti ni itye munero? Dong ityeko camo nyig yat ma onongo aciki ni pe i cammi ce?” 12Ci laco ogamo ni, “Dako ma imiya ni obed kwedani aye omiya nyig yat meno, ci acamo.” 132Rwot Lubanga openyo dako ni, “Man kono itimo tim ma kit man pingo?” Dako ogamo ni, “Twol aye obwola, omiyo acamo.”

Lubanga ongolo kop

14Ci Rwot Lubanga owaco bot twol ni, “Pien in aye itimo man, kiceno in keni ki ikin lee ducu. Ibilak, ibiywane piny ki ii, dok ibicamo apwa ikare me kwoni ducu. 153Abiketo mone ikin in ki dako, ki ikin likwayi ki likwaye; en bigoyo wii, in ibitongo opunye.”

16Ki bot dako owace ni, “Abimedi arem matek ikare me nyodo; ibinywalo lutino ki arem, cwinyi bipyete ikom cwari dok en aye biloyi.” 174Ki bot Adam owace ni, “Pien in aye iwinyo dog dakoni, ci icamo nyig yat ma aciki iye ni, ‘Pe icam,’ kiceno lobo piri: ibicam ki aroma madit ikare me kwoni ducu. 18Loboni biceko okutu ki ocok, ibicamo pot dek ma i tim. 19Ibicamo kwon ki kwok ma cwer ki itur nyimi, nio ka ibidok i ngom, kit ma con kikwanyi ki iye; in apwa, dok bene ibidok i apwa.”

20Adam ocako nying dakone ni Kawa, pien en aye megi jo ducu makwo. 21Ci Rwot Lubanga oyubu laa aruka, ka omiyo Adam ki dakone guruku.

Kiryemo Adam gin ki Kawa woko ki i poto

225

Ci Rwot Lubanga owaco ni, “Nen, dano dong odoko rom ki ngat acel ikinwa, en dong ngeyo gin maber ki gin marac woko. Omyero pe dong wawek ocam nyig yat me kwo, miyo en dong bibedo makwo nakanaka.” 23Ma omiyo Rwot Lubanga oryeme woko ki i poto Eden, wek odok opur gire ngom mayam kikwanye ki iyeni. 24Ci oketo lukerubi tung kunyango me poto Eden, ki pala lucwan ma lyel mac, ma wire tungi ki tungi me gwoko yoo ma cito ikom yat me kwo.