Acaki 4

Kain ki Abel

1Adam obedo ki dakone Kawa, ci dakone ogamo ic, onywalo Kain ci owaco ni, “Dong atyeko nongo latin laco ma Rwot okonya kwede.” 2Ka dok onywalo omine Abel. Abel obedo lakwat romi, Kain obedo lapur poto. 3Ka kare mo okato, Kain okelo cam ma oceko i potone, otyero bot Rwot. 41Abel okelo mere lutino kayo romi ki dwologi.2 Ci Rwot ojolo Abel ki gityere, 5ento pe ojolo Kain ki gityere; omiyo Kain okeco, ma wange ocido ki akemo madit. 6Ci Rwot owaco ki Kain ni, “Ikeco pingo ka? Wangi ocido pingo ka? 7Ka itimo gin maber ci pe kijoli ce? Ento pien pe itimo gin maber, nen bal obutu i dogolani me loyo in; ento omyero iloye.” 83

Kain owaco ki omine Abel ni, “Wacit i poto.” Ma guo i poto, Kain ocako lweny ikom omine Abel, ci oneko woko. 9Lacen Lubanga openyo Kain ni, “Omeru Abel tye kwene?” En ogamo ni, “Pe angeyo; an aye abedo lagwok omera bo?” 104 Ci Rwot owace ni, “Man dong itimo tim marac kuman pingo? Nen, remo pa omeru tye kakok inyima, winye kun a ki i ngom. 11Kombedi dong kiceni woko, pe dok ibipuru lobo ma ongamo doge me mato remo pa omeru ma ioyoni. 12Ka ipuru poto, pe biceki cam ki teke ducu; i bibedo lamalgang kun imal ata i lobo.” 13Ci Kain owaco ki Rwot ni, “Twon can ma imiyani dong dit obwoyo koma woko do. 14Nen, tin dong iryema woko ki i poto, wa ki inyimi bene. Abibedo lamalgang kun amal ata i lobo, dok ngat mo keken ma binonga, bitwero neka woko.” 15Rwot owace ni, “Pe kumeno! Ka ngat mo bineko Kain, kibiculu kwor ikome ki kwo pa dano abiro kulu.” Rwot oketo lanyut mo ikom Kain, wek jo ma binonge pe guneke. 16Ci Kain ocako a woko ki inyim Rwot, ocito obedo i lobo Nod, tung kunyango me Eden.

Likwayo pa Kain

17Kain obedo ki dakone, ci dakone ogamo ic, ci onywalo Enoka. Lacen Kain ogero gang madit, ci ocako nying gang meno macalo nying wode, ni Enoka. 18Enoka onywalo Irad, Irad onywalo Mekujael, Mekujael onywalo Metucael, Metucael onywalo Lamek. 19Lamek onyomo mon aryo; nying dako acel Ada, ki nying mukene Jilla. 20Ada onywalo Jabal; en aye nene won jo ma gibedo i kema, ki wegi lim makwo. 21Nying omine Jubal, en aye nene won jo ma gigoyo opuk ki lukut nyamulere. 22Jilla onywalo Tubal-kain; en aye nene latet kit kwa jami tic ducu me mola ki nyonyo bronze. Lamin Tubal-kain nyinge Naama. 23Lamek owaco bot mone ni,

“Ada ki Jilla, wuwiny;

wun mon pa Lamek, wuwiny lok ma awaciwu:

Atyeko neko dano ma omiya ret,

aneko awobi mo ma ogoyani. 245

Ka kibiculu kwor pa Kain ki kwo pa dano abiro,

Lamek kibiculu kwore ki kwo pa dano pyere abiro wiye abiro kulu.”

Ceji gin ki Enoci

25Adam dok obedo ki dakone, ci dakone onywalo latin laco, ci ocako nyinge Ceji, pien owaco ni, “Lubanga dok omiya latin mukene ma oleyo ka Abel, mayam Kain onekoni.” 26Ceji bene onywalo latin awobi, ocako nyinge Enoci. Ikare meno en aye dano gucako lwongo iye nying Rwot.