Acaki 20

Abraim ki Abimelek

1Ci Abraim ocako wot me cito i lobo Negeb matye ikin Kadec ki Cur, obedo i Gerar, kama otiro iye macalo labedo. 21Abraim ocako lok ikom dakone Cara ni, “En lamera.” Ci Abimelek rwot me Gerar ocwalo jone guomo Cara. 3Ento Lubanga obino bote iwang lek dyewor, pi lok kom Cara, dako pa Abraim kun wace ni, “Nen, in i dano ma lato, pien dako ma in iomoni dako ma cware tye.” 4Abimelek onongo peya obutu kwede; ci en ogamo ni, “Rwot, in mono ibineko rok mo ma pe obalo? 5Pe Abraim aye gire otita kun waca ni, ‘Dakoni lamera?’ Dako kikome bene owaco ni, ‘En omera.’ Atimo man ma cwinya leng, ki cinga bene pe obalo gin mo.” 6Lubanga dok owace iwang lek ni, “Eyo, angeyo ni itimo kumeno ma cwinyi leng, ci onongo an aye abedo ka ngetgi, oweko pe itimo bal mo inyima; ma omiyo pe aye in igudu kome. 7Dong idwok dakoni bot cware gire; pien en lanebi, en bilego piri, ci ibikwo. Ento ka ikwero dwoko dakonu bot cware, ber inge ni ibito woko ada, in ki jo ma i paconi ducu.”

8Oruune odiko con Abimelek oa malo, olwongo lutice ducu, ci otito botgi lok meno ducu, ci gubedo ki lworo madwong. 9Ci Abimelek olwongo Abraim bote, owace ni, “Itimowa kuman pingo? Abali gin ango, ma omiyo in ikelo bal madit ikoma ki ikom kera? In itimo gin ma pe myero atiya ikom dano.” 10Ka dok Abimelek owaco bot Abraim ni, “Onongo mono itamo ningo, ma omiyo itimo kit man?” 11Abraim ogamo ni, “Atimo kit man, pien onongo atamo ni, jo ma ikabedo man pe gilworo Lubanga, gibineka woko pi dakona. 12Ada mere lamera kikome, nya pa wora, ento pe latin pa maa kikome, ci anyome odoko dakona. 13Ikare ma Lubanga okwanya woko ki i ot pa wora, ma abedo kawot kun adonyo i lobo ma woko mapatpat, acako waco bot Cara ni, ‘Pi kicani myero itima kit man: ikabedo ducu ma wabio iye, ibinyuta ni, Man omera.’”

14Ci Abimelek okelo romi ki twoni ki lwak opii ki lwak angeca, omiyogi bot Abraim, ci odwoko dakone Cara bote. 15Abimelek owaco ki Abraim ni, “Nen, lobona tye inyimi en; bed kama i mito.” 16Ka dok en owaco bot Cara ni, “Nen, atyeko miyo ki omeru cekel me ryal maromo alip acel, pi waro kop woko ki ikomi iwang dano ducu ma ibedo kwedgi, wek ibed labongo bal mo ikomi.” 17Ka Abraim olego Lubanga, ci Lubanga ocango Abimelek ki dakone bene, ki lwak angecane, ci gucako nywalo lutino; 18pien onongo Rwot ogengo nyodo woko i ot pa Abimelek pi lok kom Cara, dako pa Abraim.