Acaki 19

Tim cilo pa jo Codom ki Gomora

1Lumalaika aryo gubino i Codom otyeno; gunongo Lot obedo piny i dog gang me Codom. Ka Lot onenogi, ci oa malo, ocito kajologi, oryebe, okulu wiye piny i ngom, 2kun waco ni, “Luditona, alegowu, wuloke, wudwog kany, wudony i oda an laticwu, wulwok tyenwu, wubut wor acel, ci dong wubia giwu odiko con, wucito i yo wotwu.” Ci gugamo ni, “Pe, wan wabibutu i dye bar me taun man.” 3Ento en odiyogi ki tek mada, ci guloke, gudonyo i ode; Lot otedo ki gin cam maber, ki mugati ma pe kirubu ki tobi, en aye gucamo.

4Ento ma pud peya gubutu, lwak co ma i taun meno, jo me Codom, awobe wa ki ludito bene, gutenge woko ducu, gubino, gurumu ot woko. 51Gulwongo Lot, gupenye ni, “Co ma gubino boti otyenoni gitye kwene? Kelgi woko botwa kany, wek wabut kwedgi.”

6Lot okato woko, ocito botgi, ci oloro dogola woko cut ki ingeye, 7kun waco ni, “Alegowu, utmega, pe wutim tim aranyi. 8Wunen, an atye kany ki anyirana aryo ma pud peya gungene ki co. Wek akel gin aye botwu, wek wutimgi giwu kit ma wumito; ento pe wutim gin mo ikom co man, pien gin dong gutyeko donyo woko i oda.” 9Ento gin guwaco ni, “Nyik cen!” Ka dong guwaco ni “Nye man obino kany macalo adonyi, dok mito doko langolkop kany ce? Wan koni dong wabitimi marac makato gin.” Ci gucoro Lot cen, kun gitware ginyiko katuru kika. 10Ento co aryo maca gucwalo cinggi, ci guywayo Lot gudwoke cen i ot botgi, ci guloro dogola woko. 112 Ci gucwalo to wang ma ocoro wang dano ma gudile i dogolani woko, ludito ki awobe bene, wangi ocor woko, gubedo kapange ata kayenyo dogola, ci guol woko ata.

12Co aryo meno gucako waco ki Lot ni, “In itye ki jo mukene ma watwu kany bene? Macalo cog anyirani, ki lutino awobe ki anyiragi, nyo ki ngat mo matye i taun kany. Kwanygi wek wua woko ki ikabedo man; 13pien wayube me tyeko taun man kun waneko woko libok. Pien koko ma ikom jo ma gitye iye dong gudoko dit ma pe tite inyim Rwot, piman Rwot ocwalowa ni dong wabin, watyek kun waneko woko libok.” 14Ma omiyo Lot okato ocito, olwongo cog anyirane, ma onongo nene gimito nyomo anyirane ni, kun waco ki gin ni, “Wua woko ki ikabedo man, pien Rwot obityeko gang man woko.” Ento cog anyirane guwinyo calo lok oree.

15Kwar piny, ma piny dong bino ka ruu, Lumalaika guruyu Lot, kun giwace ni, “A woko oyotoyot, icit ki dakoni ki anyirani aryo ma gitye kwedi kanyi, wek pe ginekgi i can ma gibimiyo ikom taun man.” 163Ento en obedo ka junge, ma omiyo jo meno gumako cinggi, gupeyogi woko, en ki dakone ki anyirane aryo; Rwot obedo ki kica ikomgi, gucwalogi woko cen ki i taun meno. 17Ka dong gukelogi woko, ci gucikogi ni, “Wuring wular kwowu; pe wuloke wunen ngewu, pe wugik i yo kamo i nota, wuring wular godi, wek pe kinekwu.” 18Lot owaco ki gin ni, “Pe wuwek obed kumeno luditona. 19Nen, an dong gum okaya ki botwu, dok wunyutu ikoma kica madwong pi Laro kwo na; ento pe atwero ringo nio wa i godi, miyo gin marac dok poto ikoma, ci neka woko. 20Nen, gang macoke loka ca, ma aromo ringo alaro iye, dok gange tidi mo. Wek aring alar kunu; pe gange nen tidi tutwal? Wek alar kwo na do!” 21En owace ni, “Nen, gum meno dok amiyi bene aye; pe dong abibalo taun ma iloko pireni. 22Dong irune oyoto, ilar kunu; peya atwero timo gin mo nio ka io kunu.” Ma omiyo nying taun meno gucako ni Joar.4 23Ceng otuc ma onongo Lot donyo i Joar. 245

Ci Rwot ocwalo gweng calfa ma lyel mac ma mac oliyo woko, ocwer piny nia ki i polo, ocore ikom Codom ki Gomora, 25obalo gang meno ci oneko woko libok, ki notane ducu, ki lwak jo ducu ma gibedo i gangi meno, ki gin ducu ma gidongo i ngom. 266Ento dako pa Lot mudong cen angeci, oloke oneno ngeye, ci oloke odoko wir kado cut. 27Abraim oa odiko con, ci ocito ikabedo mayam kong ocung iye inyim Rwoti. 28Ci obolo wange oneno yo tung Codom ki Gomora, ki tung lobo ducu ma i notanu, ci oneno yito ma duny i lobonu, macalo ruk mac mukur.

29Kitmeno Rwot otyeko taun ducu ma i nota inino meno, Lubanga opo pi Abraim, omiyo okwanyo Lot woko, wek can pe opot ikome, ikare ma obalo taun mayam Lot obedo iye woko.

Kwaro pa jo Moab ki jo Amon

30Lot oa woko ki i Joar, ocito obedo i godi, kacel ki anyirane aryonu, pien onongo lworo bedo i Joar, ci odonyo obedo i boro, kacel ki anyirane aryonu. 31Nyare me kayone ocako waco bot lamine matidi ni, “Wonwa dong oteggi woko, pe tye laco mo iwi lobo ma bibino botwa ka nyomowa me bedo kwedwa ikit pa dano ma wi loboni. 32Bin, wek wamii ki wonwa kongo bwino, wek omat, ci wabibutu kwede, wek wanong nyodo, wonwa aye onywal kwedwa.” 33Ci gumiyo won gi omato kongo idyewor meno, cut latin kayone ocito, obutu ki wone, ma kun pe ngeyo ka nyare obutu kwede, ki kare ma nyare oa kwede malo. 34Orwone latin kayone dok owaco bot matidine ni, “Nen, tin dyewor dong atyeko butu ki wora; wek dok wamiye omat kongo tin dyewor bene, wek in dok icit ibut kwede, wek wanong nyodo, wonwa aye onywal kwedwa.” 35Dok gumiyo won gi kongo omato idyewor meno; ci nyare matidini dok oa, ocito obutu kwede; en pe ongeyo kare ma nyare obutu kwede, ki kare ma nyare oa kwede malo. 36Kitmeno anyira pa Lot aryonu ducu gunywal ki won gi. 37Kayone onywalo latin laco, ocako nyinge Moab; en aye odoko kwaro jo Moab nio wa kombedi. 38Nyare matidine bene dok onywalo latin laco, ci ocako nyinge Ben-ammi; en aye odoko kwaro jo Ammon wa kombedi.