Acaki 18

Lubanga ocike me miyo ki Abraim latin laco

1Rwot dok onen bot Abraim ite kworo matye i Mamre, ma onongo obedo i dog kemane ikare ma piny lyet. 21 Abraim oilo wange malo, ci oneno co adek gucung inyime. Ka onenogi, oringo nia ki i dog kema, ocito kangolo wigi, ci oryebe piny i ngom, 3kun waco ni, “Luditona, ka gum okaya inyimwu, pe wukat an latici akata. 4Wek kong kikel pii mo matitidi, wek wulwok ki tyenwu, ka dong wuywe ite yat man. 5Dok abicito kaomo mugati mo manok wek wubwol ki dogwu, ka dong wucak kato giwu me cito, kit macalo dong wubino botani.” Ci gin gugamo ni, “Citim kit ma iwaconi.” 6Abraim orune ocito bot Cara i kema, owace ni, “Job moko mapwote maromo adita adek, inywang, wek ited mugatimo.” 7Abraim oringo i idwol, okwanyo wod twon ma ringone pud yom mamit, omiyo bot awobine, ci oyubu oyotoyot. 8Ka okelo cak lukulu ki cak malibo, ki dek ringo ma gitedo, oketo inyimgi; en obedo kangetgi ka kurugi ite yat, kun gicamo.

9Ci gin gupenye ni, “Dakoni Cara kono tye kwene?” En ogamo ni, “En tye i kema.” 102 Ci ngat acel ki ikin co adeki owace ni, “Abidwogo boti ikare macalo man, ma nongo dakoni Cara dong tye ki wode.” Cara onongo tye ki ingeye i dog kema, kun winyo lokgi. 11Ikare meno onongo Abraim ki Cara mwaka me ditogi dong dwong: dok Cara onongo dong pe neno dwe macalo mon wadigi. 123 Ma omiyo Cara onyere kekene, kun waco ni, “Ma dong atii woko likong, ki cwara bene dong otii woko likong, dong abinongo miti mo me co ningo?” 13Rwot owaco bot Abraim ni, “Cara onyero mono pirngo kun waco ni, ‘An mono dok abinywalo latin, ma kombedi dong atii wokoni?’ 144Tye gin mo matek maloyo Rwot? Ka kare oromo kit ma awaconi, ci abidwogo dok kany, ikare macalo man, ma nongo Cara dong tye ki wode.” 15Ento Cara pi lworo opyem woko kun waco ni, “An pe anyero gira.” Ogamo doge ni, “Pe, ento me nyero aye inyero gire.”

Abraim olego pi Codom

16Ka jo meno gucako a woko ki kunu, ci guneno yo tung Codom; ci Abraim olwokogi i yo. 17Rwot openye kekene ni, “Myero akano gin ma acito katiyone woko ki bot Abraim, 18kun Abraim bidoko rok madit ki matek, ma rok ducu ma iwi lobo gibilimo gum ki ikome? 19Pe; an dong atyeko yero en, wek ocik lutinone ki jo ma i ode wek gulub yo pa Rwot ma gitiyo gin matye atir dok me ada; wek lacen Rwot omii ki Abraim gin mayam otyeko cike kwedeni.” 20Ka dong Rwot owace ni, “Pien koko ikom Codom ki Gomora dong okato kare woko, ki balgi dong dwong tutwal, 21abicito botgi wek acit anen ka ada gitye katiyo kit ma koko ikomgi owinye kwede botani; ka pe, ci abingeyo.”

22Kitmeno guloke, gucako wot me kemo i Codom; ento Abraim pud ocung inyim Rwot aye. 23Lacen Abraim onyiko bote cok, owaco ni, “In ada ibityeko jo ma kitgi atir kacel ki jo ma kitgi racu? 24Ka gwok nyo jo ma kitgi atir binonge pyere abic i gang meno, ci ibityeko kabedo meno woko, pe ibijalo gang meno pi jo pyere abic ma kitgi atir ma gitye iyeni? 25Pe kumeno! In pe myero inek jo ma kitgi atir kacel ki jo ma kitgi racu, kun imiyo jo ma kitgi atir bene bedo rom ki jo ma kitgi racu. In langolkop me lobo ducu mono pe ibitimo gin manen atir, bo?” 26Ci Rwot ogamo ni, “Ka anongo i Codom jo ma kitgi atir pyere abic matye i gang meno, ci abitimo kica i kabedo meno ducu pirgi.” 27Abraim ogamo dok ni, “Nen, an dong adyere me lok kwedi, in Rwot, an mera apwa ki buru mamwa. 28Gwok nyo kace birem jo abic me romo jo pyere abic? Ci ibityeko gang meno ducu woko pi jo abic muremi?”

Ci Rwot ogamo ni, “An pe abityekone kace anongo kunu jo pyere angwen wiye abic.”

29Abraim dok onwoyo aye, owaco ni, “Ce ka ibinongo kunu jo pyere angwen keken kono?”

Ci Rwot ogamo ni, “Pi jo pyerangweni pe abitimo iye gin mo.”

30Abraim dok owaco ni, “Pe kiniga omaki, in Rwot, an abilok doki. Kace binonge kunu jo pyere adek kono?”

Ci Rwot ogamo ni, “Pe abitimo ce abinongo kunu jo pyere adek.” 31Abraim dok owaco ni, “Nen, an dong adyere me lok kwedi, in Rwot. Gwok nyo jo pyere aryo binonge kunu kono?”

Ci Rwot ogamo ni, “Pi jo pyeraryonu pe abityeko gang.” 32Abraim dok onwoyo aye ni, “Pe kiniga omaki, in Rwot, an abilok doki tyen acel keken. Gwok ka ibinongo kunu jo apar keken kono?”

Ci Rwot ogamo ni, “Pi jo aparni pe abityekone.” 33Ci dong Rwot ocako cito, ka dong otyeko lok ki Abraim; ci Abraim odok gire ikabedone.