Acaki 21

Nywalo Icaka

1Rwot dok olimo Cara kit ma con owaco, ci otime kit mayam ociko kwede. 21Cara ogamo ic, ci onywalo latin laco ki Abraim, ma kun en dong otii woko, ikare mayam Lubanga otite pireni. 3Abraim ocako nying latin ma Cara aye onywaloni, ni Icaka. 42Abraim oliro wode Icaka madong oromo nino aboro me dite, kit mayam Lubanga ocike kwede. 5Abraim onongo dong mwaka me dite romo miya acel, ka dong kinywalo wode Icaka. 6Cara owaco ni, “Lubanga dong omiya anyero; wa ngat ma biwinyo bene binyero kacel kweda.” 7Ci owaco ni, “anga ma kono ceng owaco ki Abraim ni wang mo Cara bidoto latin? Nen man dong anywale awobi madong en otii oloc woko.”

Kiryemo Agar ki Icmael woko

8Latin odongo, ci kikwanye woko ki i cak; Abraim otedo karama madit inino ma kikwanyo Icaka ki i cak. 9Ento ka Cara oneno wod pa Agar ma anyira Ejipt, mayam onywal ki Abraim, ka tuku ki latine Icaka, 103en owaco bot Abraim ni, “Ryem angeca man ki wode, wek gucit woko, pien wod pa angeca man pe bibedo laleyo kacel ki woda Icaka.” 11Lok meno ocwero cwiny Abraim matek, pi wodenu. 124Ento Lubanga owaco ki Abraim ni, “Pe cwinyi ocwer pi latin ki pi angecani; gin ducu ma Cara owaco ni, tim kit ma en otiti, pien lutino pa Icaka aye kibilwongogi ni likwayu. 13Dok abimiyo wod pa angeca bene doko rok, pien en latini.” 14Abraim opuk odiko con, okwanyo mugati ki opiru pii, omiyo Agar, olwoke otere i yo, ci ongabo jami ki latine iwi gwoke, ocwale kwede woko. Dako meno ocito gire, obedo ka lak ata i tim me Beer-ceba.

15Ikare ma pii ma i opiru otum woko, ci opyelo latine piny ite yat bunga mo. 16Ci oweko latine, ocito obedo cen kama bore rom ki kama ka kibayo atero ci gik iye; pien owaco ni, “Pe myero anen kit ma latina to kwede,” ci latin odange ki koko. 17Lubanga owinyo koko pa latin, lamalaika pa Rwot ocako lwongo Agar ki i polo, kun wace ni, “Man lok ango Agar? Pe dong ilwor, pien Lubanga dong otyeko winyo dwon koko pa latin ki kama ipyele iyeni. 18Dong ia malo, ci imak cinge latin wek itinge malo, pien abimiyo en doko rok madit.” 19Ka Lubanga oyabo wang Agar, ci neno wang it; ci ocito otwomo pii, opiko i opiru pyen pong, ka omiyo wode omato. 20Lubanga obedo ki latin meno; odongo, obedo i tim, odoko ladwar matek ki atero. 21Obedo i tim Paran; mine onyome nya jo Ejipt.

Gicike ikin Abraim ki Abimelek

225

Ikare meno Abimelek ki ladit wi monye Pikol guwaco bot Abraim ni, “Lubanga tye kwedi i gin ducu ma itiyo. 23Kombedi dong ikwong kwong kweda i nying Lubangani, ni pe ibiumu wanga ki tim buya, kadi wa lutinona ki likwaya bene; kit macalo an bene atimi beri, in bene ibitima ber, ki lobona ma kombedi in labedo iyeni.” 24Abraim ogamo ni, “Abikwongo.”

25Ikare ma Abraim okelo kokone bot Abimelek pi wang pii mo ma onongo lutice gucere woko kome. 26Abimelek ogamo ni, “An pe amedo ki ngeyo ngat mo ma otimo lakit lok meno; in bene pe imedo ki tita loke. Pe amedo ki winyo lok meno nio wa tin!” 27Lacen Abraim okwanyo romi ki twoni, omiyogi bot Abimelek, ci gin jo aryo guketo gicike ikin gi. 28Abraim oyero bwongi romi abiro, oketogi pat. 29Abimelek owaco ki Abraim ni, “Bwongi romi abiro ma iketo pati kono pingo?” 30Abraim ogamo ni, “Bwongi romi magi abiro ma ibigamogi ki i cingani, ibiketogi pi bedo cadena ma nyutu ni, an aye yam akwinyo wang pii man.” 31Ma omiyo kabedo meno kilwongo ni Beer-ceba, pien onongo gin aryo ducu gukwonge iye ki kwong, 32Kitmeno guketo gicike i Beer-ceba. Ka dong Abimelek ki Pikol ladit lawi monye gua, gudok i lobo pa jo Piliciti. 33Abraim opito yat kituba i Beer-ceba, ci oworo iye Lubanga, Lubanga Mabedo Nakanaka. 34Abraim orii calo labedo i lobo pa jo Piliciti pi kare malac.