Faarotikaa Maxaafa

Faarotikaa Maxaafa

E'yichchoo

Faarotik maxaafi woyyichchi maxaafi giddo hedheeke maxaafuwwa duuchchanaa'ni qeeredheeken. Tinni faaruwwa mitte manjinni yookaan mittoomik faarsendaaxxe yookaan haassessendaaxeran.

Konne maxaafi giddo dhibbanna onde tomme faaruwwa afendaan. Tenne faaruwwanaa'n bira saxxaaxxa borreeseek moyanjo Daawwititen. Qeerake baro'ninna bukki assendeexxi Isira'eelike ardixxe magenoofachchotixxe aada'a umoke kadde. Mitte mitte faaruwwa hitta hedheeka faarotika miyanna hitta hedheeka meella hordofa hassissaaxxa faarsaleeyyetik sooreessa akeekaan. Fakkeennakee faaroo shoolenna faaro shoole tommenna onde uudi. Saadinoo, galataa, amanaa, addee, cubbotixxee hangulli hiyyaa, Duuchchi Woddike Goottixxa xuurameessummanna isika gargaarsa fakkaataakiir umi woyyichchi maxaafik yaaduwwi tennee faaruwwa giddo borreeseme'een.

Tennee faaruwwa'a umoke kadeeki oddichchi yaadi Duuchchi Woddike Gootta'ni addataten. Faaruwwa tennek borreessanjuwwi Duuchchi Woddika Gootta galateefatat yookaan ifi ifixxa rakko ifisat dhugaatixxa ifixxa ko'o shiqisaan.

Olmik Isira'eelik ardi tennee faaruwwa gargar gargar hedheeke jeeji giddo la'oofataamman. Tnninna:

1. Faaroo 105 diiri Duuchchi Widdika Gootta galateefatatee'e.

2. Faaroo 13 siiri yaaddo leellishatee'e.

3. Faaroo 1 teeri barachchiisatee'e.

4. Faaroo 72 miiri Isira'eelik moyanjuwwi toggitte murte muraashsha soodatatee'e.

5. Faaroo 47 niiri Duuchchi Woddiki Gootti ifixxe dada duuchcha'n afeeka baallooma ege'nishatee'e.

6. Faaroo 122 miiri Iyyerusaalemi'a jaalala leellishatee'e.

7. Faaroo 126 niiri ayyaannuwwa ulfeesateeraten.

Dhuggaaten, heddo faaruwwa mitte yaadi iimi darre afa dandeetaani. Gootti no'ok Yessuusi Kirstoosi lallabaamma woddanna barachchiisaamma wodda heddo yaanna tennee faaruwwa giddii'n la'onfataamman. Haaroxxe kakok borreessalluwwinna yanna yanna'ninni faarotike Maxaafanaa'ni kula'emman. Olmixxi Kirstoositonna Yessuusi Kirstoosi darree'ni Duuchchi Woddiki Gootti asseexxa eloxxa yaane magenooffachchotee'e tennee faaruwwa la'oofanfante'een. Fakkeennakee'e faarotika Maxaafa 118 giddo afemaak 22 laakkoossi haaroxxe kako giddo jaanele kuleme'een.

Konne Maxaafi Giddo Hexxeexxa Yaanuwwa

Kunni Faafotik maxaafi onde shiixaramma kutuwwa'n qoodemaan: siretixxenna langaxxe kutuwwa giddii'n bira saxxaaxxi borreesende'eek moyanjo Daawwitinniten. Sakkaxxe kutaxxi faaroor borreesende'eek Asaafinniten, yookaan Qorxe oosennite.

Faaro 120—134 ayyaanuwwa ulfeesatixxe aadaxxe faaruwwaan; konneechchinni butta iitti onde shiixaramma kutuwwa shiqqe'een:

Taakkaka Maxaafa

Langaka Maxaafa

Sakkaka Maxaafa

Sholgaka Maxaafa

Ondika Maxaafa