Gedeo Bible
Faarotikaa Maxaafa 65
Mageno Saadanna Galateefataa
Faarsaleeyyetike Sooreesi'a Daawwitixxa Galatiinxa faaro.
Ee, Magenoo! Tsiyooni giddo atee'e saadonna'a, werreegenaka werreeganna ati'a uwwa hassissaan.
Ee, soodachcho laqqa'eetekee, manji duuchchi atibaa dagaan.
Cubbo no'o'n bira saxxeemman;
ati kinni balleessa no'oxxa duuchcha gattowwaali hittetten.
Fi'litetexxi atixxe woyyitte baxxe'n hedho'a ifibaa shikki assexxeteke mannixxa wodo;
no'onna atike minxe elollamma yaanuwwanna woyyitte atixxe bakkaxxe yaanen goddinannon.
Ee, Mageno no'oke anjiralloo
mambe'iinxe qullummatixxe atixxe hujenni hiissiichcho no'aa uuttatton;
bayyixxe abbaayya wido hedheekiirinna gatebaang buttatik ardi duuchchi ate'n addataan.
Jabeenne atikenni koobuwwa uurirseten;
hunnatanna oddo'wite'eeteken.
Abbaayyatike danbala'ika luuljonna danbala'iinxa dhuqqachcho sammi assittatton;
gosa gosake ardixxa weekenshanna ca'li assittatton.
Ati assittettexxa mambe'iinxa yaaaanuwwa buttatik ardi duuchchi sodataan;
buttatixxe gabalanaa'n buttatixxe gabala qico'n hedheek manni illillisaan.
Xeena gansiisati butta affeten;
buttina shaqqishatton;
Mageniinxe muummuwwa'n wodi'i wo'maken;
tenneenna assittettexxe mannakee midha uuttette.
Ko'emeeke fichchi'aa geyaaka xeena uuttatton;
isika dareera weli qixxeesittatton;
buttinakanna kiifoti shaqqishshatton;
mudhuwwikinna latee'e nophphaashsha assittatton.
Arjumma atixxenni wogga eebbatixxe assittatton;
ati saxxeetebi duuchchi goddaken.
Qiilla gammooje'ni bada'uwwatinna quffeen;
koobuwwatinna gammashsho oddo'wite.
Diiduwwa duuchcha'n hori bobba'ee wo'maan;
dhooquwwa duuchchi midha calla kaddaan;
kunniichchuwwi gammade illillisa'nee faarsaan.
Gedeo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.