Gedeo Bible
Faarotikaa Maxaafa 64
Gargaarsakee'e Soodatendeexxa Soodachcho
Faarsaleeyyetike Sooresi'a Daawwitixxa Faaro.
Ee, Magenoo! Rakkateexxi atiba'aa soodatanno wodda laqi;
naaphi anki anee sodaachchise'eeni anee heqqi.
Fuggaaleeyyetixxe fuggooxxe mari'enaa'ninna fuggoxxa asso'a bukki hiyyeemmake mannanaa'n anee gatisi.
Insa'nek arrabi wolaantichchiinsha qare'eeken;
manjo iddaaka haaso'anna gabetishsha darbinaan.
Insa'ne'e golanteexxi balleessa afebaa manjo
soda'a belo dedhanga iddinaan.
Hendeemmaka fuggoka yaada bakka geessinso'a mari'antaan;
fonxoro insa'neexxa haba ugginaaxanna hendaan;
insa'nenna tennee duuchcha assinaa wodda, «Ayyinna no'oo afaaki hedhebaan» hina'neeten.
Insa'ne fuggoxxa assino'aa hende;
«Godobi giddonna mancira hiyyendaaxxa fuggoxxa yaane assinnannon!» hine;
Kunni manjiinki yaadinna hedumi isik
fuggoxxenni wo'meeke kadeexxa ege'nishaan.
Mageni kinni gabe ifixxa insa'ne'n darbaan; insa'nenna dedhange'n madoonnaan.
Mageni afo'o insa'neekenaa'n fuldeemmanxi insa'neenni wirri hite'e balleessitashsha assaan;
insa'nee uudeek duuchchinna geeqishsha'ni umo insa'ne'ni le'misaan.
Manji duuchchi sodataan; Mageniinxa huje lalaba'n asseexxa yaanenna hedaan.
Qulliyye Duuchchi Woddike Gootta'n gammaddowwaal;
isoo gollake assexxowwaal;
qajeeli manni duuchchinna isoo saadowwaal.
Gedeo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.