Gedeo Bible
Faarotikaa Maxaafa 41
Elagonpheti Woddixxa Soodachcho
Faarsaleeyetike Sooresi'a Daawwitixxa Faaro.
Hiyyeeyyetee'e hedaake manjixxa wodo;
rakko dagaa woddanna Duuchchi Woddik Gootti isoo fulchaan.
Duuchchi Woddik Gootti isoo heqaan; hedhotinna isoo uggaan;
bogi giddonna isoo eebisaan;
isike naaphixxe halcha'aanna isoo sa'isse uwwabaan.
Elagophe'e diipheexxe taqe hana Duuchchi Woddik Gootti isoo gargaaraan;
fayyiseexxe dhibotixxe taqena'ninna isoo ke'issaan.
Aninna, «Ee, Duuchchi Woddike Goottaa! Ani'a o'wi;
atee'e balleesseennen anee fayyisi» hiyyenne.
Naaphi anki elobaaxxa ani'a haaso'a'ni,
«Isi haano reya? Summi isikinna haano dedhema?» hiyyaan.
Anee'e laqo'a dagaakiir
godobi giddo fuggoxxa ca'ma'ni sobee'e aninni haaso'aan;
fule me'enna iseenni odeessa.
Naaphi anki duuchchi mitteba anxee weli hashashaan;
ani'aanna elobaaxxa heda'ni hiyyaa qici,
«Fuggoke dhukuba isoo abide'een;
yoona diiphebaa'ni higge ke'abaan.»
Aninni ite'eek,
addata'eneek lubbotik ank jaali midde
ane'ni naaphake kadee ke'een.1
Ee, Duuchchi Woddike Goottaa! Ati kinni ani'a marar;
anke naapha'ninna bado hiisedhonna'a dhibetenaa'ni anee ke'issi.
Naaphi ane'ni geerarebaan,
anee eettettexxa tenne'n ege'nenne.
Balleessa afa gopheennaxxee kiphphe anee abide'eeten;
ati eddonna duuchchi woddi'a hedhissatton.
Isira'eelik Mageni Duuchchi Woddik Gootti
duuchchi woddanaa'n duuchchi woddi'a saademowwaal.2
Hamiin! Hamiin!
Source notes (2)
- Cross-reference Mat. 26:23; Mar. 14:18; Luq. 22:21; Yoh. 13:18.
- Cross-reference Far. 106:48.
Gedeo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.