Gedeo Bible
Faarotikaa Maxaafa 86
Gargaarsakee Soodatendeexxa Soodachcho
Daawwitixxa Soodachcho.
Ee Duuchchi Woddike Goottaa! Ani hiyyeesakenna rakkichchake kadennaxxee
soodachcho anxa laqqee heeyyi.
Ani xuurameesa atike kadennaxxee hedho anxa heqqi;
ati anke Magenon; ate'n addata'eenneka garbichcha atika anee anjir.
Barra duuchcha atibaa soodata'eennen,
Ee Dada Duuchchike Goottaa! Ani'a o'wi.
Ee Dada Duuchchike Goottaa! Lubbo anxa ate'ni uwwedha'eennen,
anee'e atike garbichchixxa lubbo gammachchiis.
Ee Dada Duuchchike Goottaa! Ati elokenna aaraarendattoken;
atee ye'edhaake duuchchi'aanna, jaalala atixxi gabala affeexxebaan.
Ee Duuchchi Woddike Goottaa! Soodachcho anxa caqasi;
anxe kadhaxxa oodhishshanna laqi.
Ati ani'a hee hitataxxee
rakkotixxa barra atete ye'edhannon.
Ee Dada Duuchchike Goottaa! Magenuwwi giddii'n atishsha hedheek hedheebaan;
atixxe hujenni weli qixxootaaxxi huje hexxebaan.
Ee Dada Duuchchike Goottaa! Ati daddeteke gosa gosaki ardi duuhchi
dageexxi ati'a kumbu hiyyaan;
summa atikanna ulfeessaan.1
Ati lumoke kaddetaxxee mambe'a yaanuwwa assittatton;
atinni calli Magenoken.
Ee Duuchchi Woddike Goottaa! Ora atika anee barachchiis;
Dhugaa atixxe'ninna me'annon;
summa atikanna sodaatonna'a mitte godobike manjo anee assi.
Ee Dada Duuchchike Gootta, anke Magenoo! Mitte godobinni atee saadannon;
summa atikanna duuchchi wodda ulfeessannon.
Ani'a affeetexxi jaalala jabaxxen,
lubbo anxa hundike hirreesi gidii'n fulchitteten.
Ee Magenoo! Hollaameeyye ane'n qophphi hite kexxeen;
sannachchi mararte afebaak lubbo anxa balleesso'a hasa'neen;
insa'ne atee mittelchchonna geessinsebaan.
Ee Dada Duuchchike Goottaa!
Ati kinni araarendatokinna o'wittatok Mageni,
mufe dandeettatoke, ossa atixxinna xuurameessumma atixxi bira saxxe'eeken.
Anibaa wirri hite'e ani'a araaremi;
hunna atixxa anee garbichcha atikee uwwi;
atixxe garbiteka belto anee anjir.
Naaphi ank uudeexxi sodataka
atixxe elleka beessisa ani'a assi;
Ee Duuchchi Woddike Goottaa! Ati anee gargaarte'eten; jajjabeessite'eten.
Source notes (1)
- Cross-reference Wal. 15:4.
Gedeo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.