Faarotikaa Maxaafa 98

Mageni Buttatike Galchallon

1Assemmaxxe manmbe'a yaanuwwaxxeenna jabbaxxe ifixxe hunnanni injifatemmaxxee'e Duuchchi Woddike Gootti'a haaroxxa faaro farse.

2Duuchchi Woddik Gootti ifixxi anjiralumma ege'nendaashsha asse;

qullumma ifixxanna gosa gosake arda'n leellishe.

3Isi Isira'eelike ardi'a afe'eexxa jaalalanna xuurameessumma dedhebaan; bogi bogik ardi duuchchi Mageni no'ok hitta injifate'eexxa uude'een.

4Buttate'n hexxineek ardi duuchchi Duuchchi Woddike Gootta gammashshoti faarse; faarotinna illilleeteti isoo galateeffatte.

5Bagank faarsitina'n Duuchchi Woddika Gootta galateffatte.

6Moyanjo no'oke Duuchchi Woddike Gootti'a suusu'letanna malagata ufuufina'n illillisse.

7Abbayyatinna ise giddo hexxineexxi daduwwa duuchcha hafuura ha'noka laqisse; buttatinna ise giddo hexxineek duuchchi faaro farse.

8Koo galaannuwwa anga calle; Tee koobuwwa Duuchchi Woddike Gootti edo illillisina'n mitteba faarse.

9Duuchchi Woddik Gootti buttate'ni muro'a dagammaxxee isi edo faaro faarsinowwaal; buttatike arda'ninna isi qullummati toggitte murte muraan.