Gedeo Bible
Faarotikaa Maxaafa 62
Magenxe Heqqa'n Addata
Faarsaleeyyetike Sooresi'a Edotaami'a, Daawwitixxa Faaro.
Anee wodaak isonni callaa kadeemmaxxee'e
Mageno ossat heqqedhannon.
Iso callan anxi rassanna anee wodaak;
golla anke kademmaxxeenna haranga shokki hiyyabe'non.
Dooqeexxe gimoshshanna lele'meeke dalla'ishsha hunna afebaaka manjo, ha'no duuchiing isoo'o loldina'n haani qico'ni rakkissina'ni hexxina?
Insa'ne hansaachchi ulifinna isikenaa'n isoo'o salphisateeten; iso'ni dhara haaso'ate eenaan; afo'ik eebbinsa'nee godobi giddo kinni yowwinaan.
Anxe lubboo! Mageno calla sammi hite heqqedhi; isoo addatanna waalabe'no.
Anixxi rassanna anee wodaake
golla anke kademmaxxee haranga shokki hiyyabe'no.
Anee anjire'e ulfatannoshsha asseek Magenoken; Isi anxe rassanna anke gollan.
Koo ardaa! Mageno addatte; isi golla no'oke kadeemmaxxee ha'nooke godobika yaada duuchcha iso'n ku'le.
Manjiink belti diidallotishshaten;
manji duuchchi toliinken;
isi kiiloti hana uggeme kiilemeele
diidallotishshaa midde a'urabaan;
Saamik adhdhitineexxe yaane'n addatinnoqqe'e;
moodhitineexxe yaannenni ifi saadinnoqqe'e;
karra ha'nooxxi bira saxxoole midde ise'ni ille uggudhdhitinnoqqe'e.
Mageni mittele haaoso'eedheen
aninna lame yaane laqenne; hunna Mageniixxen,
Ee, Dada Duuchchike Goottaa duuchchi woddixxe jaalala atixxenni;
ati duuchchingee'e huje hujeshshanni hira uuttatton.1
Source notes (1)
- Cross-reference Iyo. 34:11; Erm. 17; 10; Mat. 16:27; Rom. 2:6; Wal. 2:23.
Gedeo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.