Gedeo Bible
Faarotikaa Maxaafa 130
Duuchchi Woddike Goottike Gargaarsi'a Shiqqeexxa Soodachcho
Tsiyoonixxe Koobaaba'aa Alalle Meati woddixxa Faaro
Ee, Duuchchi Woddike Goottaa! Dhi'mo giddo hedhee atiba'a raara'eennen.
Ee, Dada Duuchchike Goottaa! Haafura anka laqi;
mansha atixxinna soodachcho anxa caqassowwaal.
Ee, Duuchchi Woddike Gootta ati cubbo no'oxxa hordofeettele
Ee, Dada Duuchchik Gootta
ayyete ati edo dandeexxi uurrammaa?
Yane kinni atee sodantannoshsha
ati cubbo no'oxxa gattowwaali hitatton.
Ani Duuchchi Woddika Goottaa heqqedhannon; lubbo anxinna isoo heqqexxaan;
hiyyichcho isikanna addeti heqqedhannon.
Hashshik heqqanjuwwi bogiinxa sooda heqqedhamma caala
eetti hashshik heqqanjuwwi bogiinxa sooda heqqedhamma caala
lubbo anxi Dada Duuchchika Gootta heqqexxaan.
Tee Isira'eel! Duuchchi Woddike Goottixxi jaalala duuchchi woddixxe kaddeemmaxxeenna
manna wodatee'e affe'eexxe lumoxxe hunnaxxee'e
Duuchchi Woddika Gootta addatti.
Isinna Isira'eelii'i
cubbo duuchchanaa'ni wodaan.1
Source notes (1)
- Cross-reference Mat. 1:21; Tit. 2:14.
Gedeo Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.