Angaramɔ

Angaramɔ

(Genèse)

Bebe wen hazu takarata Angaramɔ

Ling Genèse ngo mɔ tɔ nde: «angaramɔ». Takarata ɛngɛ osi nɛ angara dea mɔ fɛt ka dung hazu nzan: Angara dea nzan, goto hio wi hinɛ kandɔ pɛ Sɔ. A ngoy mɔ osi goto tɛa pɛ sɛmbɔ hinɛ bɔnɛ ha nzan . Sɔ gɔna nu hazu gdangamɔ, maa wɛnɛ kio wal kpo mɔ ku hio wi penɛ ha pɛtɛ wa.

Takarata mɔ angara mɔ gɔna soko bwa:

Hazang angara bosimɔ (1.1–11.32), Sɔ dea nzan, hio sari nɛ hio wi. Mɔ fɛt ka Sɔ dea nɛ dedea, maa hio bosi wi Adam hinɛ Ɛvɛ kafa nû Sɔ. Hio wi ngimɔ nɛ ngimɔ tɛ bo nɛ gdanga. Maa Sɔ dea mɔ gdangsi nzan nɛ wal mbeng li. Hio wi mɔ zunu fɛt feya ka nɛ Noe hinɛ hio bem pɛa ha bhɔn nɛ zutunɔ. Bin hio wi be yɛbhi nɛ mbwa be ba zunu, maa dɔka ha soko mbwa lɛm mɔ lukisi wen pɛ Sɔ na.

Olo takarata (12.1–50.26) tɔ nɛ kasi wen pɛ hio kotowi mɔ hio wi mɔ le Israel. Abraham, bosi kotowi mɛ hio wi mɔ Israel, a mɛkara Sɔ nɛ sila wa nɛ yuo ke Sɔ. Sɔ sangala wɛnɛ gde hazu kandɔ mɔ Israel. Sɔ baa hanu ha wɛnɛ nde ɛ be wol dedewen hazu pɛlnam pɛa hazu nu fɛt. Kasi pɛ Abraham naka pata hio kasi pɛ bem pɛa Izaak nɛ be ata pɛa Zakob (ka ɛ saa fin nde Israel). Bin hio bem bhukɔ zanga bwa pɛ Zakob be dung nɛ hio kandɔ bhukɔ zanga bwa mɔ Israel.

Ha kpogio takarata ɛngɛ nam pɛ Zakob tɛ bo ha Ezipte. Ma bewei pɛ Zakob ndang, Zozɛf tɛ bo nɛ ngaya Gofɔrɔma hazang gɔngɛnɛ le ɛngi. Ngase gasa foto teka mamɔ ndang tɛ gan nam pɛa na. Zakob feya. Zozɛf fin gbɛla. Wɛnɛ tɔa ha nam pɛa nde: (50.24 Ma swe ndang, Zozɛf tɔa ha hio ya wa nde:

«Mi befe, maa mi ingo nde Sɔ begbakiri ɛnɛ. Wɛnɛ beku ɛnɛ gbonɛ ha le Ezipte yunɛ, nɛ wɛnɛ beku ɛnɛ sinɛ ha le ka wɛnɛ bagɔn nu wa ha Abraham, Izaak banɛ Zakob.» (50.24)

Hio mɔ ngaya mɔ takarata ɛngɛ

Sɔ dea nzan nɛ hio wi (1.1–2.25)

Sɛmbɔ nɛ bɔnɛ tɛa ha zunu (3.1-24)

Kasi pɛ Adam gboa pɛ Noe (4.1–5.32)

Noe nɛ gasa mbeng li (6.1–9.29)

Kandɔ kiforo sila nɛ mbwa bɛa kin mɔ Babɛl (10.1–11.32)

Hio kotowi: Abraham, Izaak, Zakob (12.1–35.29)

Hio pɛlnam pɛ Ezau (36.1-43)

Zozɛf nɛ hio ya wa (37.1–50.26)