Angaramɔ 11

le hinɛ bhele bhele twa Babel

1Tangere hio wi mɔ zu nu fɛt tɔ nɛ̂ nûle ndang, hio wen mɔ nû mbwa fɛt nɛ̂ ndang. 2Mbwa nɛa ha wal gutɛ-swe, nɛ mbwa kpaa ma gasa gbongo ha le Sinear, nɛ mbwa dea le ang. 3Mbwa tɔa ha may nde: «Ɔ nɛ̂! Ɔ mɛl hio biriki, nɛ ɔ dɔ yo.» Mbwa kuo hio birikia tuka hio ta mɔ twa, nɛ mbwa bhɔngara mamɔ tuka kon ka mbwa gde ha soko hio biriki tuka bhɛlɛ mɔ ngasisi nɛ hio ngeng twa. 4Hapata, mbwa tɔa: «Ɔ nɛ̂! Ɔ de ma le, nɛ ma kuso twa ka lɛma ndɔ lîswe, nɛ kade ling ɔ aba bhandi fɛt mɔ tɔ nde ɔ akɛtini soko ɔ ha zu nu fɛt nɛ tum na. 5Wankpoo zilo tɛ̂ ha nu mɔ zɔk lea, hinɛ kuso twa ka ndɔ lîswe ka hio bem pɛ hio wi dea. 6Wankpoo tɔa: «Ɛnɛ zɔk! Mbwa nɛ̂ hio wi ndang! Mbwa tɔ nɛ̂ nûle ndang, nɛ ɛnɛ zɔk mɔ ka mbwa ngoya mɔ de! Sising, ma mɔ ka gdɔki lîwal ha mbwa ha mɔ ka mbwa ngoya dea bo fin na. 7Ɔ nɛ̂! Ɔ zil! Nɛ ɔ de nde hio nûle pɛ mbwa adung nɛtɛ nɛtɛ kade hio ma aze nûle pɛ hio ma mbinga na. 8Wankpoo kɛtana soko mbwa nɛ nyɛa ha zu nu fɛt. Nɛ mbwa gdea dea le ɛngi. 9Yo nɛ̂ ɛngi, ka ɛ sa nɛ ling bhandi ɛngi nde Babel, hazu yo dungɔ haki ka Wankpoo kɛtana nɛ hio nûle nɛtɛ nɛtɛ ha zu nu fɛt, nɛ yo dungɔ haki ka wɛnɛ kɛtana soko hio wi ha zu nu fɛt.

Kasiwen pɛ Sem hinɛ hio bezang wa

10Ɛngɛ nɛ̂ ling hio bezang Sem: Sem dungɔ nɛ bɛlɛ gɔmmay ndang ka wɛnɛ bhɛa nɛ Arpaksad, ha bwa bɛlɛ ha pata gasa mbengli. 11Sem ɔa ha zu nu nɛ̂ bɛlɛ gɔmmay mɔrkɔ ha pata bhɛ pɛ Arpaksad. Wɛnɛ bhɛa hio ma bewei nɛ hio ma bebhoko.

12Arpaksad dungɔ nɛ bɛlɛ bhukɔa tar zanga mɔrkɔ ka wɛnɛ bhɛa nɛ Sela. 13Arpaksad ɔa ha zu nu hapata bhɛ pɛ Sela nɛ̂ bɛlɛ gɔmmay nar gbala tar, nɛ a bhɛa hio bewei hinɛ bebhoko.

14Sela dungɔ nɛ bɛlɛ bhukɔa tar ka wɛnɛ bhɛa nɛ Heber. 15Sela ɔa ha zu nu hapata bhɛ pɛ Heber nɛ̂ bɛlɛ gɔmmay nar gbala tar, nɛ a bhɛa hio ma bewei hinɛ hio ma bebhoko.

16Heber dungɔ nɛ bɛlɛ bhukɔa tar gbala nar ka wɛnɛ bhɛa nɛ Peleg. 17Heber ɔa ha zu nu hapata bhɛ pɛ Peleg, nɛ̂ bɛlɛ gɔmmay nar nɛ bhukɔa tar, nɛ a bhɛa hio ma bewei hinɛ hio ma bebhoko.

18Peleg dungɔ nɛ bɛlɛ bhukɔa tar ka wɛnɛ bhɛa nɛ Reu. 19Peleg ɔa ha zu nu nɛ̂ bɛlɛ gɔmmay bwa zanga mɔrkɔ gbala nar, hapata bhɛ pɛ Reu, nɛ a bhɛa hio ma bewei hinɛ hio ma bebhoko.

20Reu dungɔ nɛ bɛlɛ bhukɔa tar gbala bwa ka wɛnɛ bhɛa nɛ Serug. 21Reu ɔa ha zu nu hapata bhɛ pɛ Serug nɛ̂ bɛlɛ gɔmmay bwa zanga mɔrkɔ gbala bwa, nɛ a bhɛa hio ma bewei hinɛ hio ma bebhoko.

22Serug dungɔ nɛ bɛlɛ bhukɔa tar ka wɛnɛ bhɛa nɛ Nahor 23Serug ɔa ha zu nu hapata bhɛ pɛ Nahor nɛ̂ bɛlɛ gɔmmay bwa, nɛ a bhɛa hio ma bewei hinɛ hio ma bebhoko.

24Nahor dungɔ nɛ bɛlɛ bhuzebwa zanga mɔrkɔ gbala nar ka wɛnɛ bhɛa nɛ Tera. 25Nahor ɔa ha zu nu hapata bhɛ pɛ Tera nɛ̂ bɛlɛ gɔmmay ndang nɛ bhukɔ zanga mɔrkɔ gbala nar, nɛ a bhɛa hio ma bewei hinɛ hio ma bebhoko.

26Tera dungɔ nɛ bɛlɛ bhukɔa mɔrkɔ zubhuzebwa ka wɛnɛ bhɛa nɛ Abram, Nahor, hinɛ Haran.

Kasiwen pɛ Tera hinɛ Abraham

27Ɛngɛ nɛ ling hio bezang Tera: Tera bhɛa Abram, Nahor hinɛ Haran. Haran bhɛa Lot. 28Haran kpaa fio Sɔngsi nɛ bafa wa, ha le ka ɛ bhɛa wɛnɛ ha yo, ha Or mɔ Saldee. 29Abram hinɛ Nahor sio hio bhoko. Ling ko pɛ Abram nɛ Sarai, nɛ ling ko pɛ Nahor nɛ Milka, bebhoko pɛ Haran. Haran dung fin nɛ̂ bafa mɛ Yiska. 30Sarai dungɔ nɛ̂ nakomba, nɛ a tɛ̂ dung nɛ bem na. 31Tera kuo Abram bem pɛa, nɛ bezang wa Lot, ka dungɔ nɛ̂ bewei pɛ Haran hinɛ koko wa Sarai, ko pɛ Abram bem pɛa, mbwa gboa ha gasa pɔsi mɔ Ur ka dung ha zang le mɔ Babiloni mɔ nɛ̂ ha le Kanaan. Mbwa hɔa ha le mɔ Haran, nɛ mbwa dea le haki. 32Tera dungɔ nɛ zutunɔ kanɛ̂ bɛlɛ gɔmmay bwa zanga mɔrkɔ (205), nɛ a kpaa fio ha le Haran.