Angaramɔ 12

Hɔa pɛ Abram ha le Kanaan

1Wankpoo tɔa ha Abram: «Gu tɛ, mɛ lak le pɛ mɛ gde, nam pɛ mɛ, nɛ twa pɛ bafa mɛ, mɛ nɛ̂ ha le ka mi be osi ha mɛ. 2Mi bede nde ma gasa kandɔ azɔk dɛl nɛ wal mɛ, nɛ mi bewol dede wen ha zu mɛ, nɛ mi bede nde ling mɛ ahɔ ha hio bhandi fɛt. Mɛgi, mɛ nɛ̂ wi wol dede wen ha zu hio olo wi. 3Mi bewol dede wen ha zu hio wi ka bewol dede wen ha zu mɛ. Mi befom hio wi ka befom mɛ. Nɛ wal mɛ, ɛ bewol dede wen ha zu hio nam mɔ zu nu fɛt.»

4Abram pena tuka ka Wankpoo tɔa nɛ yo ha wɛnɛ, nɛ Lot pena hinɛ wɛnɛ. Abram dungɔ nɛ bɛlɛ bhukɔa mɔrkɔ zubhuzebwa zanga mɔrkɔ, ka wɛnɛ gboa nɛ̂ ha Haran. 5Abram kuo ko pɛa Sarai hinɛ Lot, bem pɛ ya wa, nɛ hio toy ka mbwa dungɔ nɛ yo, hinɛ hio wantom ka mbwa kpaa ha Haran. Mbwa gboa mɔ nɛ̂ ha le Kanaan. 6Abram pena ha zang lea hɔ ha bhandi ka ɛ sa nde Sisem, gbo ha hio gasa te mɔ Sene mɔ More. Hio wi mɔ le Kanaan dungɔ ha ɔa ha lea. 7Wankpoo osa tɛ ha Abram, nɛ a tɔa: «Mi behaa le ɛngɛ ha hio bezang mɛ.» Abram dea ma go ha Wankpoo ka osatɛ ha wɛnɛ. 8Hapata, a gbinɔ guru ha bhandi ɛngi mɔ nɛ̂ hazu hio ngarî, ha wal gutɛ-swe mɔ Betɛl; wɛnɛ bɛa go pɛa ha soko Betɛl ha wal ɔnu-swe nɛ Ai ha wal gutɛ-swe. Wɛnɛ dea ma go ha Wankpoo, nɛ wɛnɛ ha sombala ling wa nɛ wal gɔa Wankpoo. 9Abram guo tɛ pen, bhandi nɛ bhandi mɔ nɛ̂ nɛ̂ ha wal Negeb.

Abram ha le mɔ Ezipte

10Foto teka ha le ɛngi, nɛ Abram zilo, nɛ̂ ha Ezipte mɔ de le haki, hazu foto penatɛ ha le pɛa. 11Ha ngimɔ ka mbwa na tɛ bo sanga mɔ hɔ ha Ezipte, a tɔa ha ko pɛa Sarai nde: «Mi ingɔ nde mɛ nɛ̂ lɔka bhoko. 12Fin ka hio wi mɔ Ezipte bezɔk mɛ, mbwa betɔ: «Yo nɛ̂ ko pɛa! Mɛgi, mbwa begbɛ mi nɛ mbwa be gde mɛ nɛ zutunɔ. 13Mɛ betɔ nde mi nɛ̂ ya mi, kade mbwa ade dede mɔ ha tɛ mi nɛ wal mɛ, mɛgi, mi be dung nɛ zutunɔ.» 14Ka Abram hɔa ha Ezipte, hio wi mɔ Ezipte zɔka nde ko pɛa, Sarai dungɔ nɛ lɔka pentɛ. 15Hio wi mɔ si Faraon zɔka wɛnɛ fin nɛ lɔka, nɛ mbwa lukoso lɔka tɛ wa ha Faraon. Mɛgi, mbwa kuo bhokoa nɛ̂ nɛ̂ ha kin pɛ Faraon. 16Pɛ Abram, mbwa dea dede mɔ ha tɛ wa ha wen zu Sarai; nɛ Abram kpaa hio bebe namdalɛ nɛ hio gasa, hio bafambu toyfok nɛ hio nana mbwa, hio wantom mɔ wei hinɛ mɔ bhoko, nɛ ma hio zambala.

17Maa, Wankpoo mɛla Faraon hinɛ hio wi mɔ twa pɛa nɛ hio ma gasa zɛlɛ hazu Sarai, ko pɛ Abram. 18Mɛgi, Faraon saa Abram, nɛ a tɔa ha wɛnɛ: «Ge ka mɛ dea ha tɛ mi mɛgɛ ge? Hazu ge mɛ tɛ̂ gbasi ha mi nde yo dungɔ nɛ̂ ko pɛ mɛ na ge nde? 19Hazu ge, mɛ tɔa nde: «Yo nɛ̂ ya mɛ?» Mi kuo wɛnɛ fin tuka ko pɔm. Zɔk! Ko pɛ mɛ ka, ku wɛnɛ nɛ mɛ pen!» 20Faraon haa nû ha hio wi pɛa mɔ gde wɛnɛ apen, wɛnɛ hinɛ ko pɛa, nɛ hio wi mɔ pɛa fɛt ka wɛnɛ dungɔ nɛ yo.