Angaramɔ 13

1Abram guo tɛ ha Ezipte nɛ̂ ha wal le Negeb, wɛnɛ hinɛ ko pɛa nɛ hio wi mɔ pɛa fɛt ka wɛnɛ dungɔ nɛ yo. Lot nɛa hinɛ wɛnɛ.

Kɛtana soko pɛ Abram hinɛ Lot

2Abram dungɔ nɛ̂ wan-kpaamɔ pentɛ. Wɛnɛ nɛ hio namdalɛ, nɛ mbɔli, hinɛ ɔr. 3Wɛnɛ dungɔ ha nɛa bhandi nɛ bhandi, angiri ha Negeb gbo ha Betɛl, 4ha bhandi ka wɛnɛ babɛ go pɛa ang ha angari ha soko Betɛl hinɛ Ai, ha bhandi go ka wɛnɛ ba de Sɔngsi; nɛ haki, Abram sombala ling Wankpoo nɛ wal gɔa wɛnɛ.

5Lot, ka dungɔ ha nɛa hinɛ Abram, dungɔ fin nɛ hio bebe namdalɛ hinɛ gasa namdalɛ pɛa, nɛ hio go. 6Lea bo nɛ̂ gasa mɔ lɛm mbwa nde mbwa a dung mɔsoykisi na, hazu hio wi mɔ pɛ mbwa dungɔ nɛ dɔka pentɛ, lɛm nde mbwa a dung mɔsoykisi ha ndangatɛ bhandi na. 7Mɔya angara ha soko hio zaoro pɛ Abram hinɛ hio zaoro pɛ Lot. Hio wi mɔ le Kanaan hinɛ hio wi mɔ le Perezi dungɔ ha ɔa ha lea. 8Abram tɔa ha Lot: «Mi baa nanga mɛ, ka mɔya a dung ha soko mi hinɛ mɛ na, mana ha soko hio zaoro pɛ mɛ hinɛ hio zaoro pɔm na, hazu ɔ nɛ̂ hio gdiya. 9Lea fɛt ha dung ha lî mɛ ka. Mɛgi, ɔ kɛtini soko ɔ. Ka mɛ nɛa nɛ wal gare, mi benɛ nɛ wal wekɔ̂, ka mɛ nɛa nɛ wal wekɔ̂, mi benɛ nɛ wal gare.»

10Lot guo lî nɛ zɔk kpɛmyɛkɛ bɛlɛ mɔ Zurdain ka li ang nɛ dedea. Sɔngsi nde Wankpoo agdangsi hio le Sodome hinɛ Gomore, yo dungɔ nɛ̂ dede nu gbo ha Soar tuka fɔ pɛ Wankpoo, tuka le mɔ Ezipte. 11Mɛgi, Lot kuo pɛa nɛ̂ kpɛmyɛkɛ bɛlɛ fɛt mɔ Zurdain, nɛ a pena nɛ̂ ha wal gutɛ-swe. Yo dungɔ mɛgi ka mbwa kɛtana nɛ soko may. 12Abram ɔa pɛa ha le Kanaan. Nɛ Lot ɔa pɛa ha zang hio le mɔ kpɛmyɛkɛ bɛlɛ, nɛ a bɛa hio go pɛa nɛ wal Sodome. 13Hio wi mɔ Sodome dungɔ nɛ gdanga pentɛ, nɛ mbwa nɛ̂ hio wan-sɛmbɔ sungiri nɛ Wankpoo.

Gɔnanu pɛ Wankpoo

14Hapata kɛtana soko pɛ Lot hinɛ Abram, Wankpoo tɔa ha Abram nde: «Gu lî mɛ ha ngɔn mɛgi, nɛ̂ ha bhandi ka mɛ ang, zɔk mɔ ha wal kala nɛ ha wal gdɔk, nɛ wal gutɛ-swe hinɛ wal ɔnu-swe 15hazu le ka mɛ ha zɔka fɛt, mi be haa yo ha mɛ, ha mɛ hinɛ hio bezang mɛ, gogo nɛ gogo. 16Mi bede nde, hio bezang mɛ a dung tuka gbala-kɛsɛ, mɛgi ɛ lɛm tɔl mbwa na tuka gbala-kɛsɛ ka ɛ tɔl na. 17Gu tɛ, mɛ yal ha zang lea, mɛ zɔk bɔya nɛ pɛsaa, hazu mi behaa yo ha mɛ.»

18Abram bɛa hio go pɛa, nɛ wɛnɛ tɛa ha dea le ha bhandi ka hio te Sene mɔ Mamre dung ha yo hapɛtɛ le mɔ Hebron. Haki, a bɛa go ha Wankpoo.