Angaramɔ 14

Abram wan-gan bulo ha zu hio kongapora

1Ha ngimɔ pɛ Amrafel kongapora mɔ le Sinear, Aryok kongapora mɔ le Elazar, Kedorlaomer kongapora mɔ le Elam, nɛ Tidal kongapora mɔ le Goyim, 2hio kongapora ndɔng ha ma ngimɔ ha bio bulo sungiri nɛ Bera kongapora mɔ Sodome, Birsa, kongapora mɔ Gomore, Sineab kongapora mɔ Adma, Semeber kongapora mɔ Seboim, hinɛ Soar kongapora mɔ Bela ka dung nɛ̂ Soar. 3Mbwa fɛt wesara may ha soko gbongo ngarî mɔ Sidim, ka dung nɛ̂ nana-litɔng mɔ Dɔka-tɔng. 4Mbwa dungɔ nɛ̂ hio wantom ha si kɔmandema pɛ Kedor-laomer, ha zang bɛlɛ bhukɔ gbala bwa. Ka hɔa ha bɛlɛ bhukɔ gbala tara, mbwa guo tɛ nɛ ngambi sungiri nɛ wɛnɛ. 5Maa, ha bhukɔ gbala nar bɛlɛa, Kedor-laomer hinɛ hio kongapora ka dungɔ hinɛ wɛnɛ hɔa, nɛ mbwa bio bulo sungiri nɛ hio wi mɔ le Refai, nɛ mbwa pena zu mbwa ha le Asteri-Karnaim; mbwa pena zu hio wi mɔ le Zuzi ha Ham. Mbwa pena zu hio wi mɔ le Emi ha kpɛmyɛkɛ bɛlɛ mɔ Save-Kiriataim. 6Mbwa pena fin zu hio wi mɔ le Hori ha hio zu ngari mɔ Seir gbo ha hio te Sene mɔ El-Paran, ka dung sanga nɛ kpɛngɛ nu. 7Hapata, mbwa nduko ha Eyn-Misepat ka ɛ sa nde Kades, nɛ mbwa pena zu hio wi mɔ Amalek ha zang le pɛ mbwa fɛt, hinɛ hio wi mɔ le Amori ka dungɔ ha Hatsatson-Tamar. 8Mɛgi, hio kongapora mɔ Sodome hinɛ Gomore, mɔ Adma, mɔ Seboim, nɛ mɔ Bela, ka ɛ sa nde Soar, mbwa fɛt bhɔngara tɛ mbwa mɔ bi bulo ha soko hio gbongo ngari 9sungiri nɛ kongapora Kedor-Laomer mɔ Elam, sungiri nɛ kongapora Tidal mɔ Goyim, sungiri nɛ Amrafel mɔ Sinear, nɛ Aryok mɔ Elazar: hio kongapora nar sungiri hio kongapora mɔrkɔ. 10Gbongo ngari mɔ Sidim dona nɛ hio kɔ zu ndong mɔ gudron; kongapora mɔ Sodome hinɛ mɔ Gomore teka ha zang hio gbongokɔ ndɔng ha yuomɔ pɛ mbwa. Hio olo wi yuomɔ nɛ̂ ha zu ngari. 11Hio wan ngaya kuo hio wi mɔ pɛ Sodome hinɛ Gomore, nɛ hio yɔngamɔ ka mbwa pama, pen nɛ yo. 12Mbwa kuo Lot, bem pɛ ya mɛ Abram, ka dungɔ ha dea le ha Sodome pen nɛ̂, nɛ hio wi mɔ pɛa fɛt. 13Ma wi ka yuo mɔ ha kɔ̂ mbwa Sɔa wi tɛ̂ tɛ tɔ wena ha Abram ka dung nɛ̂ kandɔ mɔ Hebro, wɛnɛ dungɔ ha ɔa ha pɛtɛ hio te Sene pɛ Mamre, ma wi mɔ Amori. Mamre nɛ̂ ya mɛ Eskol hinɛ Aner ka mbwa bade mbon hinɛ Abram. 14Ka Abram zea nde ɛ kuo Lot, bem pɛ ya wa, pen nɛ̂, a kuo hio wi pɛa gɔmmay tar nɛ bhukɔ zanga mɔrkɔ gbala tar, ka ɛ bhɛa mbwa ha zang twa pɛa. Wɛnɛ naka pata hio wi ndɔng ka kuo Lot pen nɛ̂ teee gbo ha Dan. 15A kɛtana soko hio wi pɛa kade mbwa abi bulo sungiri hio ngana pɛ mbwa nɛ zɛ, wɛnɛ hinɛ hio wantom pɛa. A pena zu mbwa nɛ ngaya, nɛ wɛnɛ kuto mbwa teee gbo ha Hoba ha wal kala-swe mɔ Damas. 16Wɛnɛ kuo hio toy fɛt, a kuo Lot, bem pɛ ya wa, nɛ hio toy pɛa fɛt, hinɛ hio bhoko nɛ hio wi fɛt ka nɛa hinɛ wɛnɛ nduki nɛ̂.

Melsisedek

17Hapata ɛngɛ ka Abram pena zu Kedor-Laomer nɛ ngaya hinɛ hio kongapora ka dungɔ hapɛtɛ wa, ha nduko pɛa, kongapora mɔ Sodome hɔa tɛ kpa may hinɛ wɛnɛ ha gbongo ngari mɔ Save ka dung nɛ̂ Gbongo ngari pɛ Kongapora.

18Melsisedek, kongapora mɔ Salem, kuo mampa nɛ gbɛlî dɔkɔ tɛ̂ nɛ̂: wɛnɛ dungɔ nɛ̂ wan-hasadaka pɛ Sɔ ha Kuso-Ngɔn. 19Wɛnɛ wola dede wen ha zu Abram, nɛ a tɔa:

«Abram, Sɔ ha Kuso-Ngɔn ka dung Wan

ha zu hio wi mɔ fɛt awol dede wen ha zu mɛ!

20Dede wen ha zu Sɔ ha Kuso-Ngɔn,

Wɛnɛ ka dea nde hio ngana pɛ mɛ atek ha kɔ̂ mɛ!»

Nɛ Abram haa dim mɔ hio wi mɔ pɛa fɛt ka wɛnɛ dungɔ nɛ yo ha wɛnɛ.

21Kongapora mɔ Sodome tɔa ha Abram: «Haa ha mi nɛ̂ hio wi, nɛ mɛ ku pɛ mɛ nɛ̂ hio toy.» 22Abram kiforo wen ha kongapora mɔ Sodome nde: «Mi guo kɔ̂ mi ha ngɔn ha Wankpoo, Sɔ ha Kuso-Ngɔn ka dung Wan ha zu ngɔn nɛ nu. 23Mi lɛm ku ma mɔ pɛ mɛ ndang na, mana ma pɛl-nakala pɛ mɛ ndang na. Hazu mɛ benɛ tɔ nde: «Mi ha de nde Abram adung nɛ̂ wan-kpaamɔ.» 24Mi ngoy ma mɔ ndang na, Sɔna kanɛ̂ mɔ ka hio pɔlɔmbɔ pɔm yɔnga, nɛ bhalmɔ pɛ hio wi ka nɛa hinɛ mi, Aner, Eskol hinɛ Mamre. Mbwa beku hio wi mɔ pɛ mbwa gele.