Angaramɔ 24

Sio may pɛ Izaak hinɛ Rebeka

1Abraham tɛ bo nɛ gbɛla pentɛ, nɛ Wankpoo wola dede wen ha zu wa ha zang mɔ fɛt ka wɛnɛ dea. 2Abraham tɔa ha ma kotowi ha soko hio wantom pɛa ka dea tom ha kɔ̂ wa pata nyɛa, ka zɔk hio wi mɔ pɛa nde: «Mɛ gde kɔ̂ mɛ ha si ku mi, 3nɛ mi bede nde mɛ akan tɛ mɛ nɛ ling Wankpoo, Sɔ mɔ gɔn nɛ nu, nde mɛ lɛm si ma bebhoko ha soko hio bebhoko mɔ Kanaan ka mi ɔ ha soko mbwa, ha bewei pɔm na. 4Maa, mɛ benɛ ha le pɔm, nɛ ha soko hio nam pɔm mɔ si ma bhoko ha bem pɔm Izaac. 5Wantom pɛa kiforo wen ha wɛnɛ: «Mana, bhokoa bekafi tɛa ha gdong mi hakɛ, mɛgi, mi aku bem pɛ mɛ nɛ̂ nɛ̂ ha le ka mɛ gu tɛ ang tɛ̂ nɛ̂ nde?» 6Abraham kiforo wen ha wɛnɛ: «Ka mɛ kifiri nɛ bewei pɔm haki na. 7Wankpoo, Sɔ mɔ ngɔn ka dea nde mi a i tɛ ha twa pɛ bafa mi, nɛ le pɔm pen, tɔa wen ha mi, nɛ wɛnɛ gɔna nû ha mi mɔ ha le ɛngi ha hio bezang mi, nɛ wɛnɛ nɛ tɛ wa betomsi ma telenge ha Sɔngsi mɛ, nɛ yo bedung haki ka mɛ besi ma bhoko ha bewei pɔm. 8Ka bhokoa ngoy naka pata mɛ na, mɛ begbo ha zang gɔna nû pɛ mɛ. Sɔna, mɛ lɛm kifiri nɛ bewei pɔm haki na.» 9Wantoma gdea kɔ̂ ha si ku Abraham, nɛ wɛnɛ gɔna nû ha zu mɔ ɛngi.

10Wantoma kuo zambala bhukɔ ha soko hio zambala pɛ wan pɛa, nɛ wɛnɛ pena, nɛ wɛnɛ dungɔ nɛ hio kpaamɔ fɛt pɛ wan pɛa. Wɛnɛ guo tɛ nɛ̂ ha le Mezopotamii, ha zang le mɔ Nahɔr.

11A gdea hio zambala ndɔng ha ɔma tɛ ha gdong lea, sanga nɛ ma kɔli, nɛ ha ngimɔ kahio bhoko a nea gduo li.

12Hapata, a tɔa: «Wankpoo, Sɔ pɛ gasawan pɔm Abraham, mi baa nanga mɛ, de nde mi akpa mɔ ka mi ha kio mɛsɛ. Mɛ de dede sila ha tɛ wan pɔm Abraham! 13Zɔk, mi ha pɛtɛ kɔli, nɛ hio bebhoko pɛ hio wi mɔ lea ha tɛa gduo li. 14Bebhoko ka mi be ani wɛnɛ nde: “Mi baa nanga mɛ, gɛngili nû kpana pɛ mɛ, mi anɔ ma li, nɛ ka wɛnɛ bekifiri wen ha mi nde: Nɔ li, nɛ mi beha ma li fin ha hio zambala pɛ mɛ nde mbwa anɔ.” Bebhoko ɛngi bedung nɛ bhoko ka mɛ weka ha wantom pɛ mɛ Izaak. Mɛgi, mi be ing nde mɛ dea dede sila ha tɛ wan pɔm.»

15Wantom pɛ Abraham tɛ̂ karsi ka wolamɔ pɛa na, lɛm nɛ Rebeka ha gboa, nɛ kpana ha zubhaka wa. Rebeka nɛ̂ bebhoko pɛ Betuel ka dung nɛ̂ bewei pɛ Milka, ko pɛ Nahor, ya mɛ Abraham. 16Yo dungɔ nɛ̂ ma lɔka bebhoko pentɛ. Wɛnɛ tɛ̂ ing ka wei seana. Wɛnɛ zilo nɛ̂ ha wal kɔli, nɛ a gduo li don kpana pɛa, nɛ a danga.

17Wantom Sɔa wi nɛ kpa wɛnɛ, nɛ a tɔa ha wɛnɛ nde: «Mi baa nanga mɛ, ha ma li mɔ kpana pɛ mɛ kɛ ha mi anɔ.» 18Wɛnɛ kiforo wen: «Nɔ, gasawan pɔm!» Nɛ hasa, a gɛngala nû kpana pɛa mɔ ha li ha wantom ɛngɛ nɔ. 19Ka wɛnɛ karsa haa li ha wɛnɛ nɔ, a tɔa nde: «Mi begdu fin ma lia ha hio zambala pɛ mɛ fɛt.» 20Wɛnɛ gɔsa li mɔ zang kpana nɛ hasa ha zang kpogi li pɛ hio zambala ndɔng, nɛ a Sɔa wi nɛ̂ ha gduo li fin ha kɔli mɔ ha yo ha hio zambala fɛt. 21Wei kɛ dungɔ sɛm ha ana tɛ wa ha wen pɛa wantɛ mɔ ing mana Wankpoo ha dea nde nanganɔ pɛa adung nɛ dedea, mana nɛ gdanga.

22Ka hio zambala nɔa li kari, wei kɛ kuo ma konga mɔ bhanzakɔ̂ mɔ ɔr ka zio lɛma mana gram mɔrkɔ zanga ndang, nɛ hio ma konga mɔ gɛlkɔ̂ bwa ka ɛ dea nɛ ɔr fin, zio konga mɔ gɛlkɔ̂ ndang lɛma gram gɔmmay ndang, nɛ wɛnɛ haa yo ha bebhoko kɛ. 23Hapata, a ana wɛnɛ nde: «Mɛ nɛ̂ bem pɛ o? Gbasi yo ha mi, mi baa nanga mɛ. Ma bhandi ang ha twa pɛ bafa mɛ kade ɔ a ɔ nu ang nde?» 24Bebhokoa kiforo wen: «Mi nɛ̂ bem pɛ Betuel, bewei ka Milka bhɛa ha Nahor.» 25A tɔa fin nde: «Ha pɛ ɔ, hio bɛlɛ hinɛ yɔngamɔ pɛ hio sari ha yo pentɛ, nɛ bhandi mɔ ɔnu fin ha yo.»

26Mɛgi, a hilo nɛ mɛndi nɛ gɔm zu ha nu ha lî Wankpoo, 27nɛ tɔ: «Oeba ha Wankpoo, Sɔ pɛ gasawan pɔm Abraham, ka lakgde dea dedemɔ hinɛ mboazu ha tɛ wan pɔm na. Wankpoo osa lîwal ha mi teee gbo ha twa pɛ hio ya mɛ Wankpoo pɔm.»

28Zunga bhoko ɛngɛ Sɔa wi nɛ̂ ha pɛ nana wa ha tɔa pata hio wi mɔ fɛt ha wɛnɛ. 29Rebeka dungɔ nɛ ma ya wa mɔ bewei ka ling wa nde Laban. Laban Sɔa wi gbo ha dɛl mɔ nɛ̂ ha pɛ wantom pɛ Abraham ha pɛtɛ kɔli. 30Wɛnɛ zɔka konga mɔ bhanzakɔ hinɛ hio konga mɔ gɛlkɔ ha kɔ̂ ya wa, nɛ a zea wen pɛ ya wa Rebeka ka dungɔ ha tɔa nde: «Wei kɛ tɔa ha mi mɛgi.» A nɛa ha pɛ wei ɛngi ka dungɔ ha pɛtɛ hio zambala ha nû kɔli. 31Laban tɔa ha wantoma nde: «Tɛ̂, mɛ ka Wankpoo wola dede wen ha zu mɛ! Mɛ bhɔn ha dɛl ha wen zu ge? Mi bhɔngara zang twa hinɛ bhandi pɛ hio zambala pɛ mɛ.»

32Weia lea ha zang twa. Laban zilso hio toy ha zu hio zambala gde ha nu, nɛ wɛnɛ haa bɛlɛ hinɛ yɔngamɔ ha mbwa mɔ yɔng. A haa li mɔ fal nanga ha wei ɛngɛ hinɛ hio wi ka tɛa hinɛ wɛnɛ. 33Hapata, ɛ gdea yɔngamɔ ha lî wa. Maa, a tɔa nde: «Mi lɛm yɔng mɔ Sɔngsi nde mi atɔ wen ka mi nɛ yo mɔ tɔ na.» Laban tɔa: «Wol mɔ!»

34Mɛgi a tɔa: «Mi nɛ̂ wantom pɛ Abraham.» 35Wankpoo wola dede wen pentɛ ha zu gasawan pɔm, nɛ a tɛ bo nɛ̂ ziowi. Wankpoo haa hio sami, hio mbori, hio nday, hio mbɔli, hio or, hio wantom mɔ wei nɛ mɔ bhoko, hio zambala, nɛ toyfok ha wɛnɛ. 36Sara, ko pɛ wan pɔm ha zang gbɛl pɛa bhɛa ma bewei ha wan pɔm. Yo nɛ̂ ha bem ɛngi ka wan pɛ ɛnɛ haa hio wi mɔ pɛa fɛt ha wɛnɛ. 37Wankpoo pɔm dea nde mi akan tɛ mi nde: «Mɛ lɛm mɔ ku ma bhoko ha soko hio bebhoko pɛ hio wi mɔ le Kanaan ka mi ɔ ang, ha bem pɔm mɔ si na. 38Maa, mɛ benɛ ha zang nam pɔm, nɛ ha nûgala pɔm, nɛ ku bhoko ha yo ha bem pɔm mɔ si.» 39Mɛgi, mi kiforo wen ha wan pɔm nɛ a tɔa nde: “Mana bhokoa bekafi tɛa ha pata mi.” 40Wɛnɛ kiforo wen ha mi: “Wankpoo ka mi nɛa nɔ ha lî wa betomsi telenge pɛa hinɛ mɛ, nɛ wɛnɛ bede nde nanganɔ pɛ mɛ abhɔk. Mɛ beku nɛ̂ bhoko mɔ nûgala pɔm, nɛ mɔ nam pɔm ha bem pɔm. 41Ka mɛ nɛa ha zang nam pɔm, mɛ begbo ha zang gɔnanû pɛ mɛ. Ngase ɛ haa bebhokoa ha mɛ na, mɛ begbo ha zang gɔnanû pɛ mɛ ka mi ana ha mɛ.” 42Mɛsɛ, mi hɔa sanga ha pɛtɛ kɔli, nɛ mi tɔa: “Wankpoo, Sɔ pɛ wan pɔm Abraham, ka mɛ dea nde nanganɔ pɔm ka mi ha nɛa abhɔk, 43zɔk, mi sanga ha pɛtɛ kɔli: Bebhoko ka betɛ ha gduo li nɛ ka mi betɔ ha wɛnɛ: Mi baa nanga mɛ, haa ma li mɔ kpana pɛ mɛ ha mi anɔ. 44Nɛ ka wɛnɛ kiforo wen ha mi nde mɛ nɔ nɛ tɛ mɛ, nɛ mi benɛ nɛ gdu li fin pɛ hio zambala! Lɛma nde bebhoko ɛngi adung nɛ̂ bhoko ka Wankpoo weka ha bem pɛ wan pɔm.” 45Sɔngsi nde mi akarsi wen ha sila mi, zɔk Rebeka ka gbo nɛ kpana ha zu bhaka wa. Wɛnɛ zilo ha kɔli nɛ a gduo li. Mi tɔa ha wɛnɛ: “Mi baa nanga mɛ, ha ma li ha mi anɔ!” 46Nɛ hasa, wɛnɛ gɛngala kpana li ka wɛnɛ toya, nɛ a tɔa: “Mɛ nɔ, nɛ mi beha fin li mɔ nɔ ha hio zambala pɛ mɛ.” Mi nɔa, nɛ wɛnɛ haa fin li ha hio zambala. 47Mi ana wɛnɛ: “Mɛ nɛ̂ bem pɛ o nde?” Wɛnɛ kiforo wen nde: “Mi nɛ̂ bebhoko pɛ Betuel, bewei ka Milka hinɛ Nahor bhɛa.” Mi gdea konga ha zɔ wa, nɛ hio konga ha gɛlkɔ wa. 48Hapata, mi ngbio zigolo, nɛ gɔm zu mi ha nu ha lî Wankpoo, nɛ mi wola dede wen ha zu Wankpoo, Sɔ pɛ wan pɔm Abraham ka ngbɔsa mi nɛ dedea nɛ̂ nɛ̂ mɔ si bebhoko pɛ ya mɛ wan pɔm Abraham mɔ ha bem pɛa. 49Sising, ka ɛnɛ ngoya dea dedemɔ, nɛ mboazu ha tɛ wan pɔm, ɛnɛ gbasi yo ha mi. Ka bo mɛgi na, ɛnɛ gbasi ha mi, nɛ mi benduki nɛ wal wekɔ̂, mana nɛ wal gare.»

50Laban hinɛ Betuel, kiforo wen mɛgi: «Mɔ ɛngɛ tɛ̂ nɛ wal pɛ Wankpoo. Ɔ bo nɛ ma wen mɔ tɔ ha mɛ nɛ dedea mana nɛ gdanga na. 51Rebeka ha dung ha lî mɛ ka, ku wɛnɛ, nɛ mɛ pen hinɛ wɛnɛ. Yo nɛ dedea nde, wɛnɛ adung ko pɛ bem pɛ wan pɛ mɛ tuka Wankpoo tɔa!»

52Ka wantom pɛ Abraham zea wen nû mbwa, wɛnɛ ngbio zugolo ha nu, nɛ a gɔma zu ha nu ha lî Wankpoo. 53Wantoma gbosasa hio wi mɔ ha zang hio toy ka ɛ doya nɛ bolo mboli, hio wi mɔ ɔr, nɛ hio la, ka wɛnɛ haa yo ha Rebeka. Wɛnɛ haa fin hio dedemɔ ha ya mɛ Rebeka hinɛ nana wa. 54Hapata hio wi mɔ ndɔng, wɛnɛ nɛ hio wi ka tɛa hinɛ wɛnɛ yɔnga mɔ nɛ nɔ mɔ, nɛ mbwa ɔa nu.

Nɛ sutole, ka mbwa guo tɛ, wantoma tɔa: «Gde mi anduki ha pɛ wan pɔm.» 55Ya mɛ Rebeka hinɛ nana wa tɔa: «Lɛma nde Rebeka abhɔn hinɛ ɔ tikiring, ha zang ma beyala bhukɔ mɛgi, hapata, mɛ lɛma nduki hinɛ wɛnɛ.» 56Wɛnɛ kiforo wen ha mbwa nde: «Ka ɛnɛ adol mi hakɛ pentɛ na, hazu Wankpoo dea nde nanganɔ pɔm abhɔk, ɛnɛ gde mi, mi asi ha pɛ wan pɔm.» 57Mɛgi mbwa kiforo wen: «Ɔ sa bebhokoa, nɛ ɔ ani wɛnɛ wantɛ.»

58Mbwa saa Rebeka, nɛ mbwa ana wɛnɛ: «Mɛ ngoy mɔ nɛ̂ hinɛ wei kɛ nde?» Wɛnɛ kiforo wen: «Ɛy mi ngoya!»

59Mɛgi mbwa gdea Rebeka pen hinɛ bhoko ka pam wɛnɛ, hinɛ wantom pɛ Abraham nɛ hio wi pɛa. 60Mbwa wola dede wen ha zu Rebeka, nɛ mbwa tɔa ha wɛnɛ:

«Mɛ ya ɔ, mɛ dung nɛ̂ nana mɛ hio wi tomay tomay!

Lɛma nde hio bezang mɛ

adung wan ha zu hio wi ka sɛm mɛ!»

61Rebeka guo tɛ hinɛ hio bebhoko wantom, mbwa danga ha zu hio zambala, nɛ mbwa nɛa ha pata wantom pɛ Abraham. Wantoma kuo Rebeka pen nɛ̂ .

62Ha ngimɔ ɛngi, Izaak gbinɔ le ha pɛtɛ kɔli mɔ Lahai-Roi, nɛ a te bo a ɔa le mɔ Negeb. 63Ha ma mbolo, Izaak gboa mɔ yal ha zang bɛlɛ, nɛ a dungɔ ha baa zu ha zu hio ma mɔ. Ka wɛnɛ guo lî, a zɔka hio zambala ha hɔa. 64Rebeka fin guo lî, a zɔka Izaak, wɛnɛ kpera ha zu zambara pɛa tek ha nu, 65Nɛ a tɔa ha wantom pɛ Abraham: «Ɛngɛ nɛ̂ ngetɛ wei ka tɛ ha kpaa may hinɛ ɔ ha zang bɛlɛ ka nde?» 66Wantoma kiforo wen: «Yo nɛ̂ wan pɔm!» Mɛgi a kuo ma la, gɔk nɛ lî. Wantoma tɔa pata hio wi mɔ fɛt ka wɛnɛ dea. 67Izaak kuo Rebeka nɛ̂ nɛ̂ ha twa pɛ nana wa Sara. A sio Rebeka, ka tɛ bo nɛ̂ ko pɛa nɛ Izaak ngoya wɛnɛ. Yo nɛ̂ ɛngi, ka sila Izaak gaa ha pata fio pɛ nana wa.