Angaramɔ 25

Fio pɛ Abraham

1Abraham kuo fin ma bhoko ka ling wa nde Ketura. 2Bhokoa bhɛa hio bem ha wɛnɛ: Zimram, Yoksan, Medan, Madian, Isebak, nɛ Sua. 3Yoksan bhɛa Saba hinɛ Dedan. Hio bezang Dedan nɛ̂ hio wi mɔ kandɔ Asur, Letus nɛ Leum. 4Hio bewei pɛ Madian nɛ̂ Efa, Efer, Henok, Abida nɛ Elda. Hio bem ndɔng fɛt nɛ̂ hio bewei pɛ Ketura.

5Abraham haa hio wi mɔ pɛa fɛt ha Izaak. 6Ka bo nɛ̂ pɛ hio bem ka hio wanza pɛa bhɛa ha wɛnɛ, a haa hio ma dasi ha mbwa, nɛ ha ngimɔ ka wɛnɛ bhɔna nɛ zutunɔ, a tomsa mbwa nɛ nyɛa yu nɛ̂ ha pɛtɛ bewei pɛa Izaak, ha wal gutɛ-swe mɔ le mɔ wal gutɛ-swe. 7Bɛlɛ ka Abraham dea ha zu nu fɛt nɛ̂ gɔmmay ndang nɛ bhukɔa mɔrkɔ zubhuzebwa zanga mɔrkɔ (175). 8Ha gdonga, tunɔ pɛ Abraham kara. A Fea ha gdɔng dede ngimɔ gbɛla, wɛnɛ dungɔ nɛ dɔka bɛlɛ, nɛ wɛnɛ nɛa ha wesara may hinɛ hio ngbabafa wa ka Fea. 9Izaak hinɛ Ismael gunɔ wɛnɛ ha zang lokta ha Makpela ha zang fɔ pɛ Efron, bem pɛ Soar, wi mɔ kandɔ Heth. Fɔa tan may hinɛ le Mamre. 10Yo dungɔ nɛ̂ fɔ ka Abraham bahɛ ha kɔ̂ hio wi mɔ Heth. Yo nɛ̂ bhandi ka ɛ gunɔ Abraham hinɛ ko pɛa Sara. 11Hapata fio pɛ Abraham, Sɔ wola dede wen ha zu bewei pɛa Izaak ka dungɔ ha ɔa sanga ha pɛtɛ kɔli mɔ Lahai-roi.

Kasiwen pɛ Ismael hinɛ hio nam pɛa

12Ɛngɛ nɛ̂ hio bezang Ismael, bem pɛ Abraham ka Agar, bebhoko mɔ le Ezipte, wantom pɛ Sara bhɛa. 13Ɛngɛ nɛ̂ ling hio bewei pɛ Ismael hinɛ ling hio pɛlnam pɛ mbwa: Nebayot nɛ bosi bem pɛ Ismael, Kedar, Adbeel, Mibsam, 14Misma, Duma, Massa, 15Hadad, Tema, Yetur, Nafis, nɛ Kedma. 16Ɛngi dungɔ nɛ̂ ling hio bem pɛ Ismael bhukɔ gbala bwa: Wi ndang ndang nɛ̂ wanle ha nûgala pɛa. Mbwa haa nɛ̂ ling mbwa ha zu hio le hinɛ nûgala pɛ mbwa. 17Ismael Fea ha ngimɔ ka wɛnɛ dungɔ nɛ bɛlɛ gɔmmay ndang nɛ bhukɔa tar zanga mɔrkɔ gbala bwa (137). A laka zunu gde, nɛ a nɛa nɛ wesiri may hinɛ hio ngbabafa wa ka Fea. 18Hio bezang Ismael dele angiri ha soko Havila gbo ha Sur ka dung sanga nɛ Ezipte, mɔ nɛ̂ ha wal Assirie. Ismael dele tan nɛ may hinɛ hio ya wa.

ZAKOB

(25–36)

Ezau nɛ Zakob

19Ɛngɛ nɛ̂ hio bezang Izaak, bewei pɛ Abraham. Abraham bhɛa Izaak. 20Izaak dungɔ nɛ bɛlɛ bhukɔa nar ka wɛnɛ sio nɛ Rebeka, bem pɛ Betuel, wi mɔ le Aram mɔ kandɔnu Paddan-Aram, nɛ wɛnɛ nɛ̂ ya mɛ Laban mɔ le Aram. 21Izaak dungɔ ha sombala Wankpoo ha wen zu ko pɛa ka wɛnɛ nɛ̂ nakomba, nɛ Wankpoo zea gɔamɔ pɛa. Ko pɛa tɛ bo nɛ zang. 22Hio bem ha toa may ha zang wa, nɛ wɛnɛ tɔa: «Ngetɛ mɔ ha kpaa mi ge nde?» A pena nɛ̂ ha ana Wankpoo ha wena. 23Wankpoo tɔa ha wɛnɛ:

«Hio kandɔ bwa ha zang mɛ,

hio kandɔ bwa bekɛtini soko ha gboa pɛ mbwa ha zang mɛ.

Ma ndang bedung nɛ ngaya pen ma bhalkɔa.

Nɛ gasa wia bede tom ha si bebe ya wa.

24Ka ngimɔ mɔ bhɛ lɛma kari, ɛ zɔka nde yo nɛ̂ hio bedan ha dung ha zang wa. 25Bosi bem gboa, tɛ wa nɛ gbɛa harahɔrɔ tuka ma gasa latɛ mɔ bumɔtɛ. Nɛ ɛ haa ling wa nde Ezau. 26Hapata, ya wa gboa ha gdong wa, a baa tindi nanga Ezau, nɛ ɛ saa ling wa nde Zakob. Izaak dungɔ nɛ bɛlɛ bhukɔa mɔrkɔ zubhukɔ ka wɛnɛ bhɛa nɛ mbwa (60).

27Hio beweia gasa. Ezau tɛ bo nɛ̂ ma dede wan-deomba nɛ bɛlɛ nɛ̂ nɛ̂. Maa, Zakob nɛ̂ sɛm, nɛ wɛnɛ dung pɛa ha si go. 28Izaak ngoya Zakob pentɛ, hazu a ngoya yɔnga sari kumbɔ pentɛ. Nɛ Rebeka ngoya pɛa nɛ Zakob pentɛ.

29Ma swe, Zakob dungɔ ha gio kpangu. Ezau guo tɛ ha kumbɔ pe ha le nɛ tɛ̂ katatɛ. 30Ezau tɔa ha Zakob nde: «Mi baa nanga mɛ, gde mi a yɔng ma gbɛ li kpangu, ɛngɛ ka mɛ gio kɛ, hazu mi nɛ katatɛ. Yo nɛ̂ ɛngi ka ɛ haa nɛ ling Edom1 ha Ezau 31Zakob tɔa: «Gdongi ha mi bhandi pɛ mɛ mɔ kay bem mɛsɛ.» 32Ezau kiforo wen: «Zɔk mi tɛ bo sanga ha Fea, bhandi pɔm mɔ kay bem, de nɛ̂ ge ha mi ge nde?» 33Mɛgi Zakob tɔa: «Kan tɛ mɛ ha mi Sɔngsi.» Ezau gɔna nû ha Zakob, nɛ wɛnɛ gdonga bhandi pɛa mɔ kay bem ha Zakob. 34Mɛgi Zakob haa mampa hinɛ gbɛ li kpangu ka ɛ gio ha Ezau. Ezau yɔnga, nɛ a nɔa, hapata a guo tɛ, nɛ a pena. Yo dungɔ mɛgi ka Ezau bhesara nɛ bhandi mɔ kay pɛa.