Angaramɔ 26

Izaak nɛa ha le pɛ hio wi mɔ Filisti

1Foto dungɔ ha lea pen mɔ Sɔngsi ka dungɔ ha ngimɔ pɛ Abraham, nɛ Izaak nɛa ha pɛ Abimelɛk, kongapora pɛ hio wi mɔ Filisti ha Gerar. 2Wankpoo gbasa tɛ ha wɛnɛ, nɛ a tɔa: «Ka mɛ zil nɛ̂ ha Ezipte na. Mɛ bhɔn ha le ka mi be osi ha mɛ. 3De le haki. Mi hinɛ mɛ, nɛ mi bewol dede wen ha zu mɛ, hazu yo bedung ha mɛ hinɛ hio bezang mɛ ka mi beha hio nu ndɔng fɛt. Nɛ mi bede mɔ lɛm nɛ wen nû mi ka mi bagɔn ha bafa mɛ, Abraham. 4Mi bede nde hio bezang mɛ ayɛbhi tuka hio Sɔla ha li swe. Mi beha ha hio bezang mɛ hio nu ndɔng fɛt. Ɛ bewol dede wen ha zu hio wi mɔ zunu fɛt ha wen zu hio bezang mɛ.

5Kpasawen Abraham zea nû mi, a dea mɔ lɛm nɛ haanû pɔm, hio mbonga pɔm, hio osamɔ pɔm.»

6Mɛgi, Izaak bhɔna ha Gerar. 7Ka hio wi mɔ bhandia ana mɔ ha zu ko pɛa, wɛnɛ tɔa: «Yo nɛ̂ ya mi bebhoko.» A yuo nɛ̂ ke mɔ tɔ nde yo nɛ̂ ko pɛa, hazu wi mɔ bhandia benɛ gbɛ wɛnɛ, hazu Rebeka dungɔ nɛ lɔka pentɛ.

8Izaak dungɔ haki pata nyɛa kari. Ma swe, Abimelɛk, kongapora pɛ hio wi mɔ le Filisti ha zɔka mɔ ha tolo-zɔkmɔ ha dɛl, a zɔka Izaak ha dea saka bhoko nɛ wei hinɛ ko pɛa Rebeka. 9Abimelɛk saa Izaak, nɛ a tɔa ha wɛnɛ nde: ‹‹Mɛgi yo nɛ̂ ko mɛ! Mɛ dea mɛng tɔ nɛ nde: «Yo nɛ̂ ya mɛ bebhoko?» Izaak kiforo wen ha wɛnɛ: «Mi tɔa mɛgi hazu mi benɛ fe ha wen zu wa.» 10Abimelɛk tɔa ha wɛnɛ: «Ge ka mɛ dea nɛ ɔ ge nde?» Bhɔna tikiring nde ma wi mɔ le ɛngɛ aki ko mɛ, nɛ mɛ be gde wena ha zu ɔ.»

11Mɛgi, Abimelɛk heambela nde: «Wi ka beba tɛ wei ɛngɛ hinɛ ko pɛa, bekpa fio.»

12Izaak gunɔ hio kpalmɔ ha lea, nɛ ha bɛlɛ ɛngɛ, a gbɛa yɔng ze gɔmmay ndang pen mɔ Sɔngsi ka wɛnɛ gunɔ, hazu Wankpoo wola dede wen ha zu wa. 13Wei ɛngɛ tɛ bo nɛ̂ wan-kpamɔ pentɛ. Hio mɔ pɛa ha kpɔa tɛ dung kanɛ̂, nɛ a tɛ bo nɛ̂ ma gasa wan-kpamɔ pentɛ. 14Wɛnɛ dungɔ nɛ ma zugili bebe namdalɛ, nɛ hio dɔka wantom pɛa.

Izaak dea mbon hinɛ Abimelɛk

Fin hio wi mɔ Filisti tɛ bo ha dea silamɔ ha tɛ wa. 15Hio kɔli fɛt ka hio wantom pɛ bafa wa zaa, ha ngimɔ pɛ Abraham, hio wi mɔ Filisti gdɔka hio kɔlia fɛt nɛ nu. 16Mɛgi, Abimelɛk tɔa ha Izaak: «Gu tɛ mɛ ha le pɔ, mɛ pen, hazu mɛ nɛ ngaya pen ɔ.»

17Izaak guo tɛ haki, nɛ a pena nɛ̂ ha dea le ha soko ngari mɔ Gerar ha bhandi ka wɛnɛ dungɔ ha ɔa ang. 18Izaak zaa fin nɛ mbinga hio kɔli ka ɛ baza ha ngimɔ pɛ bafa wa, nɛ ka hio wi mɔ Filisti gdɔka yo ha pata fio pɛ Abraham.

19Ma swe, hio wantom pɛ Izaak kokili ma kɔli fin ha soko hio ngari, nɛ mbwa kpaa ma ngɛnza kɔli. 20Hio zaoro mɔ le Gerar kio nû hio zaoro pɛ Izaak, nɛ mbwa tɔa: «Li kɛ nɛ̂ pɛ ɔ.» Mɛgi, Izaak haa ling kɔlia nde Ezek1, hazu ɛ mɔnya hinɛ wɛnɛ ha wena. 21Hio wantom pɛ Izaak zaa fin ma kɔli nɛ mbinga, nɛ mbwa mɔnya fin ha wena. Izaak haa linga nde Sitna, yo ngɔy tɔ nde «Mɔnya, kionu.» 22Wɛnɛ guo tɛ ha bhandi ɛngi, nɛ a zaa ma mbing kɔli nɛtɛ. Mɔnya tɛbo ha wen zu kɔli ɛngi na. A saa linga nde Rehobot, yo ngoy tɔ nde: «Gbele bhandi.» A tɔa ha sila wa nde: «Sising, Wankpoo haa gasa bhandi ha ɔ. Hio mɔ fɛt bekpɔ tɛ nɛ dedea ha zang lea.

23Izaak guo tɛ hakɛ mɔ nɛ̂ ha Beer-Seba. 24Ha zɛ ɛngi, Wankpoo gbasa tɛ ha wɛnɛ, nɛ a tɔa: «Mi nɛ̂ Sɔ pɛ Abraham, bafa mɛ. De ke na, hazu mi hinɛ mɛ. Mi bewol dede wen ha zu mɛ, nɛ mi bede nde hio bezang mɛ ayɛbhi ha wen zu wantom pɔm Abraham. 25Izaak bhɔngara ma go ha Sɔ, nɛ wɛnɛ gɔa Wankpoo. Wɛnɛ bɛa go pɛa haki, nɛ hio wantom zaa ma kɔli haki fin.

26Abimelɛk guo tɛ ha Gerar hinɛ dan wa Ahuzat, nɛ Pikol kagama-bulo pɛa, mbwa nɛa ha zɔka Izaak. 27Izaak tɔa ha mbwa: «Ɛnɛ tɛ̂ ha zɔka mi ha wen zu ge? Ɛnɛ kafa mi, nɛ ɛnɛ yinɔ mi ha le pɛ ɛnɛ kari na nde? 28Mbwa kiforo wen: «Ɔ zɔka nde Wankpoo hinɛ mɛ. Yo nɛ̂ ɛngi, ɔ tɔa ha sila ɔ nde: «Lɛma nde ma gɔnanû adung ha soko ɔ, mɛ hinɛ ɔ ade ma mbon 29nde mɛ lɛm de gdangamɔ nɛ ɔ na, mɔsoykisi tuka ka ɔ tɛ̂ de gdangamɔ nɛ mɛ na, yo nɛ̂ ɛngi ka ɔ dea nɛ̂ dedemɔ nɛ mɛ, nɛ ɔ gdea mɛ, pen nɛ gaamɔ, mɛ ka kpaa sising dede wen pɛ Wankpoo.» 30Izaak bhɔngara ma gasa yɔngamɔ ha mbwa, mbwa yɔnga mɔ, nɛ mbwa nɔa mɔ. 31Hapata, mbwa guo tɛ nɛ sutole sut, nɛ mbwa gɔna nû ha mbwa. Izaak gdea mbwa ha lîwal mɔ nduki ha pɛ mbwa, nɛ mbwa sio nɛ gaamɔ.

32Ha ndangatɛ yalaa, hio wantom pɛ Izaak tɛa mɔ tɔ pata wen kɔli ka mbwa zaa ha wɛnɛ, nɛ mbwa tɔa wen mɛgi: «Ɔ kpaa li.» 33Izaak saa ling kɔlia nde Seba2. Yo nɛ̂ ɛngi ka ɛ haa nɛ ling lea nde Beer-Seba3 ka bhɔna gbo swe mɛsɛ.

Ezau sio bhoko

34Ezau dungɔ nɛ bɛlɛ bhukɔa nar ka wɛnɛ sio nɛ Zudit, bem pɛ Beeri, wi mɔ kandɔ pɛ Het, hinɛ Bazmat, bem pɛ Elon, wi mɔ kandɔ mɔ Het fin. 35Hio bhoko ndɔng bwa tɛ bo nɛ̂ hio wi ka gde ngɔtɛ ha sila Izaak hinɛ Rebeka.