Angaramɔ 27

Izaak wola dede wen ha zu Zakob

1Izaak tɛ bo nɛ gbɛla, nɛ lî wa zɔk fin mɔ nɛ nyɛa na. Mɛgi, a saa Ezau, kay bem pɛa, nɛ a tɔa ha wɛnɛ: «Bem pɔm!» Ezau kiforo wen: «Mi ka!» 2Izaak kuo fin wen nɛ tɔ: «Mi gbɛla, mi ing yala fio pɔm na. 3Mɛgi, ku hio wi mɔ gbɛ nɛ sari pɛ mɛ, ngobho-kula hinɛ hio kundu pɛ mɛ, mɛ nɛ ha kumbɔ, nɛ mɛ gbɛ sari tɛ̂ nɛ̂ ha mi. 4Gi ma dede yɔngamɔ ha mi, mi ayɔng kade mi awol dede wen ha zu mɛ Sɔngsi nde mi afe.

5Ha ngimɔ ka Izaak bhɔna ha tɔa wen ha bem pɛa Ezau, Rebeka dungɔ ha zea wena. Ezau pena ha kumbɔ ha kio sari, mɔ ku yo pe nɛ̂ . 6Mɛgi Rebeka tɔa ha bem pɛa Zakob: «Ze mɔ ka mi zea. Izaak, bafa mɛ dungɔ ha tɔa ha ya mɛ Ezau nde: 7“Ki sari kumbɔ tɛ̂ nɛ̂ ha mi, nɛ mɛ gi ma dede yɔngamɔ ha mi, mi ayɔng, kade mi awol dede wen ha zu mɛ ha lî Wankpoo Sɔngsi nde mi afe.” 8Sising, bem pɔm, mɛ ze mi nɛ dedea, nɛ mɛ de mɔ ka mi beha nû ha mɛ mɔ de. 9Mɛ nɛ̂ ha bhandi pam zugili namdalɛ, mɛ ku hio dede bebafambu mbori bwa tɛ̂ nɛ̂ ha mi. Mi begi ma dede yɔngamɔ ka bafa mɛ ngoya pentɛ ha wɛnɛ. 10Mɛ beku yo nɛ̂ nɛ̂ ha bafa mɛ kade wɛnɛ awol dede wen ha zu mɛ Sɔngsi nde wɛnɛ afe.»

11Zakob kiforo wen ha nana wa Rebeka nde: «Ɛy, ya mi Ezau nɛ bumɔtɛ ufɛfɛ, maa mi, mi bo pɔm nɛ bumɔtɛ na. 12Mana bafa mi betam tɛ mi, wɛnɛ bezɔk mi tuka wan-osirimɔ ha li wa. Mɛgi, mi bede nde fomi atek ha zu mi, nɛ mi lɛm kpa dede wen ha zu mi na.» 13Nana wa tɔa ha wɛnɛ nde: «Lɛma nde fomi ɛngi atek ha zu mi, bem pɔm! Ze Sɔna nɛ̂ wen ka mi tɔ ha mɛ, mɛ nɛ̂ nɛ ku hio dede bebafambu mbori ndɔng tɛ̂ nɛ̂ ha mi.»

14Zakob nɛa nɛ ku hio mbori ndɔng tɛ̂ nɛ̂ ha nana wa, nɛ nana wa gio dede yɔngamɔ ka bafa wa Zakob ngoya pentɛ. 15Hapata, Rebeka kuo hio dede la pɛ Ezau, bosi bem pɛa, ka dungɔ ha kɔ̂ wa ha twa, a yola yo ha tɛ Zakob, kpogio bem pɛa. 16Rebeka kuo hio bumɔtɛ bembori ndɔng gdɔki nɛ hio kɔ̂ wa, nɛ gɛl wa ka bumɔtɛ bo ang na. 17Hapata, a kuo dede yɔngamɔ hinɛ mampa ka wɛnɛ bhɔngara gde ha kɔ̂ bewei pɛa Zakob. 18Bem ɛngɛ nɛa ha pɛ bafa wa, nɛ a tɔa: «Bafa mi!» Izaak tɔa: «Mi ka! Mɛ nɛ̂ o, bewei pɔm?» 19Zakob kiforo wen ha bafa wa: «Mi nɛ̂ Ezau, bosi bem pɛ mɛ. Mi dea mɔ ka mɛ ana ha mi mɔ de. Mi baa nanga mɛ, mɛ gu tɛ, mɛ dung nu, nɛ mɛ yɔng sari kumbɔ ka mi gio, kade mɛ wantɛ, awol dede wen ha zu mi.» 20Izaak tɔa ha bem pɛa: «Bem pɔm, mɛ dea mɛng kpa nɛ sari kumbɔ ɛngɛ nɛ hasa kɛ nde? Zakob kiforo wen nde: «Wankpoo, Sɔ pɛ mɛ ha de nde sari kombɔa atɛ nɛ wal pɔm.»

21Izaak tɔa ha Zakob: «Mɛgi mɛ tiki tɛ̂, nɛ mi atam tɛ mɛ, bem pɔm, mɔ ing nde mɛ nɛ̂ bem pɔm Ezau tɛwen, mana mɛ nɛ̂ ma wi nɛtɛ.» 22Zakob tiko tɛ̂ ha pɛtɛ bafa wa Izaak. Bafa wa tama tɛ wa, nɛ a tɔa: «Gɛl wolamɔ ɛngɛ nɛ̂ gɛl Zakob, maa hio kɔ̂ nɛ̂ hio kɔ̂ Ezau.» 23A ing nde yo nɛ̂ Zakob na, hazu hio kɔ̂ wa dungɔ nɛ bumɔ nɛ dɔka tuka pɛ Ezau, nɛ a wola dede wen ha zu wa. 24A ana wɛnɛ: «Kpasawen nde yo nɛ̂ mɛ bem pɔm Ezau nde?» Zakob kiforo wen: «Ɛy!»

25Izaak tɔa: «Ha mi yɔngamɔ ka mi ayɔng sari kumbɔ pɛ bem pɔm kade mi awol dede wen ha zu wa nɛ tɛ mi.» Zakob haa yɔngamɔ ha Izaak, nɛ wɛnɛ yɔnga. A kuo fin gbɛlî dɔkɔ ha wɛnɛ, nɛ a nɔa. 26Mɛgi Izaak tɔa ha Zakob: «Tiki tɛ̂ ha pɛtɛ mi, nɛ mɛ zɔbhi nû mi, bem pɔm.» 27Zakob tiko tɛ̂ ha pɛtɛ bafa wa, nɛ a zɔbha nû wa. Izaak zea pɛl hio la pɛa, wɛnɛ wola dede wen ha zu wa mɛgi:

«Tɛwen, pɛltɛ bem pɔm dung tuka

pɛl fɔ ka Wankpoo wola dede wen ha zua.

28Lɛma nde Sɔ aha mɛ mbɛng mɔ ngɔn hinɛ hio yɔng mɔ nu,

ble hinɛ mbombe gbɛlî dɔkɔ nɛ dɔka pentɛ.

29Lɛma nde hio kandɔ ade tom ha si mɛ,

hio wi mɔ hio le nɛtɛ nɛtɛ angbi zigolo ha si mɛ!

Mɛ dung wanle pɛ hio ya mɛ,

nɛ hio ya mɛ angbi zigolo ha si mɛ!

Fomi atek ha zu wi ka befom mɛ!

Dede wen adung ha zu wi ka wol dede wen ha zu mɛ!»

Izaak bo fin nɛ ma dede wen mɔ wɔl ha zu Ezau na

30Isaak karsa wola dede wen ha zu Zakob, ka Zakob ha laka bafa wa gde pen, tikiring ha pata, ya wa Ezau pea ha wal dea omba. 31Wɛnɛ gio fin dede yɔngamɔ tɛ̂ nɛ̂ ha bafa wa. A tɔa ha bafa wa nde: «Bafa mi, lɛma nde mɛ agu tɛ, nɛ mɛ ayɔng sari kumbɔ pɛ bewei pɛ mɛ kade mɛ awol dede wen ha zu mi nɛ tɛ mɛ.» 32Bafa wa Izaak ana wɛnɛ: «Mɛ nɛ̂ o?» A kiforo wen nde: «Mi nɛ̂ kay bem pɛ mɛ, Ezau.»

33Izaak tɛ bo kelewele, nɛ tɛ wa fɛt ha yaka tututu. A tɔa nde: «Yo nɛ̂ o ha nɛ ha kumbɔ, nɛ ku nɛ sari tɛ̂ nɛ̂ ha mi o nde? Mi yɔnga yo Sɔngsi nde mɛ tɛ, nɛ mi wola dede wen ha zu wa kari, nɛ yo bebhɔn ha zu wa.»

34Ka Ezau zea wen ka bafa wa tɔa, a gdɔra nɛ nga gɛl, nɛ ngambi, nɛ a tɔa ha bafa wa nde: «Bafa mi, wol fin dede wen ha zu mi wa!» 35Izaak kiforo wen ha wɛnɛ: «Ya mɛ tɛa hakɛ tɛ osiri mi, nɛ a zuo dede wen ka mi tɔa nde mi awol ha zu mɛ.» 36Ezau tɔa: «Hazu yo nɛ̂ ɛngɛ ka ling wa nde Zakob1ha wɛnɛ ku nɛ bhandi pɔm zebwa nɛ wal osara wi kɛ nde? A kuo bhandi pɔm mɔ kay bem, nɛ mɔ sising, a zuo bhandi dede wen pɔm. Mɛ tɛ pam ma dede wen ha zu mi na nde?» 37Izaak kiforo wen ha Ezau nde: «Zɔk! Mi dea nde wɛnɛ adung nɛ̂ wan ha zu mɛ, nɛ mi kuo hio ya wa fɛt haa mbwa ha wɛnɛ tuka wantom pɛa, nɛ mi haa hio gbala ble hinɛ mbombe gbɛlî dɔkɔ ha wɛnɛ. Bem pɔm, ge mi lɛma de fin ha zu mɛ ge nde?» 38Ezau tɔa ha bafa wa nde: «Tɛ kpogio dede wen nɛ̂ ɛngi Sɔna nde?» Ezau gdea tɛ ha hea kwa nɛ ngaya2. 39Bafa wa Izaak kiforo wen ha wɛnɛ:

«Zɔk, bhandi ka mɛ be ɔ ang

hio yɔng lɛm kpɔ tɛ pɛntɛ na,

nɛ mbɛng mɔ ngɔn lɛm dung ang na.

40Mɛ bedung nɛ dedea nɛ wal gbapa pɛ mɛ,

nɛ mɛ bedung nɛ̂ wantom pɛ ya mɛ.

Maa, mɛ benɛ ha bhandi nɛtum.

Mɛ begbin ziomɔ ka wɛnɛ gdea ha zugɛl mɛ.»

Yuomɔ pɛ Zakob ha pɛ yangwa Laban

41Ezau gdea Zakob ha sila hazu dede wen ka bafa wa wola ha zu Zakob. A tɔa ha sila wa nde: «Yala fio pɛ bafa mi tɛ bo sanga, nɛ mi begbɛ ya mi Zakob.» 42Ɛ nɛa nɛ tɔ ha Rebeka pata wen ka Ezau, kay bem pɛa tɔa. Mɛgi, a saa Zakob, kpogio bem pɛa, nɛ a tɔa ha wɛnɛ: «Zɔk, ya mɛ Ezau ngoy mɔ gbɛ mɛ, ha wen zu hio wi mɔ ka mɛ dea ha tɛ wa.» 43Sising, bem pɔm, mɛ ze wen ka mi ha tɔa ha mɛ. Gu tɛ, mɛ nɛ̂ nɛ wusi tɛ mɛ ha pɛ ya mi Laban ha Haran. 44Mɛ bedung hinɛ wɛnɛ gbo ha ma ngimɔ ka ngambi pɛ ya mɛ bega . 45Ka ngambi pɛ ya mɛ kara ha tɛ mɛ, nɛ ka tazu wa biso nɛ mɔ ka mɛ dea ha tɛ wa, mɛgi, mi bede nde mɛ anduki. Hazu ge ka mi bekɔpi hio bewei pɔm bwa ha ndangatɛ swe mɛgi ge nde?»

46Rebeka tɔa ha Izaak: «Hɛl mɔ zunu gboa ha sila mi kari ha wen zu hio bebhoko mɔ Het. Ka Zakob sio ma bebhoko mɔ lea, mi bebhɔn ha dungɔ nɛ zutunɔ ha wen zu ge?»