Angaramɔ 23

Abraham hɛa ma bhandi mɔ kɔfio pɛ ko pɛa Sara

1Bɛlɛ ka Sara dea ha zu nu fɛt nɛ̂ bɛlɛ gɔmmay ndang nɛ bhuzebwa zanga mɔrkɔ gbala bwa (127). 2A Fea ha Kiriat-Arba, ka ɛ sa nde Hebron, ha le Kanaan. Abraham dea bhandi fio pɛ Sara, nɛ a hea ko pɛa. 3Hapata, Abraham guo tɛ ha bhandi ka wɔl ko pɛa ha yo, nɛ a tɔa wen ha hio wi mɔ kandɔ mɔ Heth mɛgi: 4«Mi nɛ̂ gɛnɛ, nɛ mi nɛ̂ gɛnɛ mɔ bebe ngimɔ ha pɛ ɛnɛ. Ɛnɛ ha ma bhandi gunwi ang ha mi kade mi agun ko mi, hazu gde wɛnɛ nɛ nyɛa nɛ mi. 5Hio wi mɔ kandɔ mɔ Heth kiforo wen ha wɛnɛ nde: 6«Ze ɔ, kongawan pɔm! Sɔ dea nde mɛ dung nɛ̂ bewan pɛ Sɔ ha soko ɔ. Gun ko mɛ ha ma kɔfio ndang ha soko hio oloa ka mɛ ngoya. Ma wi ndang ha soko ɔ lɛm dol mɛ nɛ yo na.»

7Abraham guo tɛ, nɛ a hilo nɛ gɔm zu wa ha Sɔngsi hio wi mɔ Heth ka dung ha kandɔnu ɛngi. 8A tɔa ha mbwa mɛgi: «Ka yo nɛ̂ dede sila pɛ ɛnɛ nde mi agun ko mi hakɛ, nɛ gde wɛnɛ nɛ nyɛa nɛ mi, ɛnɛ ze mi, ɛnɛ osi anamɔ pɔm ha Efron, bem pɛ Soar. 9Wɛnɛ aha ma lokta mɔ Makpela ha mi ka dung ha nûfɔ pɛa nɛ gɛnɛ mɔ sila wa, kade yo a dung nɛ pɔm mɔ gun hio fio ha yo ha soko ɛnɛ.»

10Efron dungɔ ha soko hio wi mɔ Heth. Wɛnɛ kiforo wen ha lî hio wi mɔ kandɔ mɔ Heth ha Abraham, nɛ ha lî hio wi fɛt ka dungɔ ha lea nɛ wal nû lea: 11«Way, kongawan pɔm, ze mi! Mi haa fɔ, nɛ lokta ka dung ang ha mɛ. Mi haa yo ha mɛ ha lî hio wi mɔ le pɔm. Mɛ gun ko pɛ mɛ ang.»

12Abraham hilo nɛ mɛndi gɔm Sɔngsi wa ha nu ha si hio wi mɔ lea. 13Hapata, a wolamɔ mɛgi ha Efron, ha lî hio wi mɔ lea: «Yo nɛ̂ pɛ mɛ fin mɔ ze mi! Mi ha futɔ mbɔli fɔa ha mɛ. Mɛ ku mbolia ha kɔ mi kade mi agun ko mi ang.» 14Maa, Efron kiforo wen ha Abraham: 15«Ze mi, kongawan pɔm! Nu mɔ mbɔli gɔmmay nar bo nɛ̂ ma mɔ ha soko mi hinɛ mɛ na. Mɛ gun wɔl ko mɛ ha yo!»

16Abraham zea Efron, nɛ a tɔla mbɔli ka wɛnɛ ngoy mɔ ha ha Efron ha lî hio wi pɛ Heth. Dɔka mbɔlia fɛt nɛ gɔmmay nar ka hio wi dungɔ ha hɛa nɛ mɔ ha ngimɔ ɛngi.

17Mɛgi, fɔ pɛ Efron ha Makpela ka zɔk may nɛ le Mamre, fɔ hinɛ lokta ka dung ang, nɛ hio te fɛt ka dung ha hio lingia fɔa, 18tɛ bo nɛ̂ pɛ Abraham, ha lî hio wi mɔ Heth, nɛ hio wi fɛt ka dungɔ ha lea ha nû lea.

19Hapata ɛngi, Abraham gunɔ ko pɛa ha zang lokta mɔ fɔ ha Makpela ka zɔk may nɛ le Mamre, ka ɛ sa nde Hebron, ha le Kanaan. 20Fɔ hinɛ lokta ka dung ha zanga, tɛ bo nɛ̂ pɛ Abraham tuka bhandi mɔ gun hio fio pɛa ha yo.