Angaramɔ 22

Abraham haa Izaak nɛ sadaka

1Hapata hio wi mɔ ndɔng, Sɔ wea sila Abraham. A tɔa ha wɛnɛ: «Abraham!» Abraham kɔa: «Mi ha dung ka!» 2Sɔ tɔa: «Mɛ ku bewei pɛ mɛ, ndanga bewei pɛ mɛ, Izaak, ka mɛ ngoy wɛnɛ pentɛ. Mɛ nɛ̂ ha le Moria, nɛ haki, mɛ ha wɛnɛ nɛ sadaka ka ɛ dɔ nɛ we ha mi ha zu ngari ka mi beosi ha mɛ.»

3Abraham guo tɛ nɛ sutole sut, wɛnɛ bhɔngara toyfok pɛa, nɛ a kuo hio pɔlombɔ wantom pɛa bwa hinɛ Izaak. A gbaa gwa mɔ nɛ dɔ nɛ sadaka ka ɛ dɔ nɛ we. Nɛ a pena nɛ̂ ha bhandi ka Sɔ ba osi ha wɛnɛ. 4Ha zetar yala, Abraham guo lî, nɛ a zɔka bhandi ka wɛnɛ nɛ̂ ang nɛ nyɛa.

5Mɛgi Abraham tɔa ha hio bengali wantom pɛa nde: «Ɛnɛ, ɛnɛ dung hakɛ hinɛ toyfok kɛ. Mi hinɛ bem pɔm, ɔ benɛ ha wal kala ha lukoso Sɔ, hapata ɔ benduki ha pɛtɛ ɛnɛ.»

6Abraham kuo gua mɔ dɔ nɛ sadaka ka ɛ dɔ nɛ we, gde ha zu bem pɛa Izaak, nɛ wɛnɛ baa we hinɛ pali ha kɔ̂. Mbwa bwa fɛt nɛa nɔ mɔsoykisi. 7Izaak tɔa wen ha bafa wa Abraham nde: «Bafa mi!» Abraham kiforo wen ha wɛnɛ: «Mi ka, bem pɔm! Izaak tɔa fin wen nde: «Zɔk we hinɛ gua ka, maa, besami mɔ dɔ de nɛ sadakaa ha ndo nde?» 8Abraham tɔa ha wɛnɛ nde: «Bem pɔm! Sɔ wantɛ bezɔk wal ka wɛnɛ beha nɛ besami mɔ sadakaa.»

Nɛ mbwa bwa fɛt nɛa nɔ mɔsoykisi. 9Ka mbwa hɔa ha bhandi ka Sɔ ba osi ha wɛnɛ, Abraham dea go haki, nɛ wɛnɛ gdea gua ha lîa. Hapata, wɛnɛ sanga bem pɛa Izaak nɛ pɛl, nɛ wɛnɛ gdea Izaak ha zu go ha zu hio gua. 10Hapata, Abraham yɛfafa kɔ̂ mɔ ku pali mɔ gɔn gɛl bem pɛa Izaak. 11Mɛgi, telenge pɛ Wankpoo saa Abraham ha ngɔn, nɛ a tɔa: «Abraham! Abraham!» Abraham kɔa sala: «Mi hakɛ!» 12Telenge tɔa ha wɛnɛ: «Ka mɛ yɛfifi kɔ̂ mɛ ha zu bengali ɛngɛ na, nɛ mɛ de mamɔ nɛ wɛnɛ na. Hazu mi ingɔ sising nde, mɛ nɛ̂ wi ka yu ke Sɔ. Mɛ tɛ̂ dɔ mi nɛ ndanga bewei pɛ mɛ na.»

13Abraham guo lî, nɛ wɛnɛ zɔka ma gasa bafambu sami ha gdong hio wa ka hio zak wa haka ha zang damɔ. Mɛgi, Abraham nɛa nɛ ku gasa bafambu sami kɛ, nɛ a kuo yo mɔ dɔ nɛ sadaka ka ɛ dɔ ha we ha Sɔ ha bhandi pɛ bem pɛa. 14Abraham haa ling bhandi ɛngi nde Wankpoo-Yire. Yo nɛ̂ ɛngi ka ɛ tɔ nɛ̂ mɛsɛ nde: «Ha zu ngarî pɛ Wankpoo, Sɔ beha.»

15Telenge pɛ Wankpoo saa Abraham mɔ zebwa ha ngɔn, 16nɛ a tɔa: «Mi kana tɛ mi wantɛ, ɛngɛ nɛ̂ wen nû Wankpoo! Hazu mɛ dea mɔ mɛgi, nɛ mɛ tɛ̂ kafi haa bem pɛ mɛ ha mi na, ndanga bem pɛ mɛ, 17mi betɔ dede wen ha zu mɛ pentɛ, nɛ mi bede nde bezang mɛ adung nɛ dɔka tuka hio Sɔla ha lîswe nɛ lembe ha nû nana li-tɔng. Hio bezang mɛ bezɔk mɔ ha zu hio ngana pɛ mbwa. 18Hio kandɔ mɔ zunu fɛt bekpa dede wen nɛ wal hio bezang mɛ, hazu mɛ zea nû mi.»

19Abraham kiforo ha pɛ hio pɔlɔmbɔ wantom, nɛ mbwa guo tɛ mɔ nɛ̂ mɔsoykisi ha Beer-Seba, hazu Abraham dungɔ ha ɔa haki.

20Ha pata hio wi mɔ ndɔng ka hɔa, hio wi tɛa tɛ tɔ pata wen ha Abraham mɛgi: «Milka, ko pɛ ya mɛ Nahor, bhɛa fin hio bewei ha wɛnɛ. 21Us bosi bem; hio ya wa nɛ̂ Buz nɛ Kemuel bafa mɛ Aram, 22Kessed, Hazo, Pildas, Idlaf, nɛ Betuel.» 23Betuel bhɛa Rebeka. Ɛ ndɔng nɛ̂ hio bem mɔrkɔ zanga tar ka Milka bhɛa ha Nahor, ya mɛ Abraham. 24Gula mɛ Milka, ko pɛ Nahor nɛ̂ Rema. A bhɛa fin hio bem: Teba, Gaham, Tahas nɛ Maaka.