Angaramɔ 21

Bhɛ pɛ Izaac, bem pɛ Abraham hinɛ Sara

1Wankpoo dea dede mɔ ha tɛ Sara tuka wɛnɛ batɔ. A dea mɔ ha tɛ Sara lɛm nɛ gɔnanû pɛa. 2Sara tɛ bo nɛ zang, nɛ wɛnɛ bhɛa ma bewei ha Abraham ha zang gbɛl pɛa, lɛm nɛ ngimɔ ka Sɔ batɔ wena ha wɛnɛ. 3Abraham haa ling Izaak ha bewei ka Sara bhɛa ha wɛnɛ. 4Abraham gɔna Sɔru bewei pɛa Izaak ha yala mɔrkɔ zanga tar ha pata bhɛ pɛa tuka Sɔ tɔa ha wɛnɛ. 5Abraham dungɔ nɛ bɛlɛ gɔmmay ndang ka wɛnɛ bhɛa nɛ bewei pɛa Izaak. 6Yo dungɔ mɛgi ka Sara tɔ nɛ̂ nde: «Sɔ dea nde mi adung nɛ mami nɛ totɛ ha soko hio wi. Hio wi fɛt ka beze nde mi bhɛa, be dung nɛ mami nɛ totɛ. 7A tɔa fin: «O lɛma tɔa ha Abraham nde Sara beha bele ha hio bem o nde? Tangere, mi bhɛa ma bewei ha Abraham ha ngimɔ gbɛl pɛa.»

Agar ha kpɛnu

8Bema gasa, nɛ nana wa guo wɛnɛ ha bele yu nɛ̂. Ha ngimɔ guo wɛnɛ ha bele, Abraham dea ma yenga.

9Sara zɔka bem ka Agar, bebhoko mɔ Ezipte bhɛa ha Abraham. Bema ha mama Izaak. 10Sara tɔa ha Abraham: «Yin bala-bhoko kɛ hinɛ bem pɛa apen, hazu bem pɛ bala ɛngɛ, lɛm kapini hio wi mɔ pɛ mɛ ha pata fio pɛ mɛ hinɛ bem pɔm Izaak na.» 11Wen ɛngi yimɔ sila Abraham pentɛ, ha wen zu Ismael, bewei pɛa. 12Maa, Sɔ tɔa ha Abraham: «Ka sila mɛ ayim ha wen zu bewei ɛngɛ hinɛ bala-bhoko ɛngɛ na. Mɛkiri ha hio wen ka Sara betɔ ha mɛ fɛt, hazu yo nɛ wal Izaak ka mɛ bedung nɛ ma bezang ka beku ling mɛ tuka mi haa nɛ nû. 13Mi bede fin ma kandɔ nɛ wal bem pɛ bala-bhoko pɛ mɛ, hazu Ismael fin nɛ̂ bezang mɛ.»

14Abraham guo tɛ nɛ sutole sut, wɛnɛ kuo yɔng hinɛ ngobho mɔ kutu sari ka ɛ gdu li ang, haa ha Agar, nɛ a gdea yo ha zubhaka wa. Wɛnɛ haa fin bem kɛ ha Agar, nɛ a gdea wal ha mbwa mɔ pen. Agar pena, nɛ a yɔa mɔ ha zang kpɛnu bɛlɛ mɔ Beer-Seba. 15Ka li pɛa mɔ nɔ kara ha zang ngobhoa, wɛnɛ kuo bem pɛa gde ha si ma bebe te. 16Hapata, wɛnɛ nɛa nɛ dung nu nɛ be nyɛa, bɔya soko wa nɛ bema lɛma nɛ bɔya bhandi ka wi pi ndoro tek ang. Mɛgi, wɛnɛ ha takara mɔ, nɛ a tɔa nde: «Lɛma nde mi azɔk bem pɔm afe ha lî mi na!» Nɛ wɛnɛ ha yaka tututu nɛ gdɔra kwa.

17Sɔ zea gɛl bema, nɛ ma telenge pɛ Sɔ saa Agar nisi ha ngɔn, nɛ a tɔa ha wɛnɛ: «Nɛ̂ ngetɛmɔ ha de mɛ ge nde Agar? Ka ke ade mɛ na, hazu Sɔ zea gɛl bema ha bhandi ka wɛnɛ ang. 18Gu tɛ, mɛ ku bem kɛ, baa wɛnɛ ha kɔ̂, hazu nɛ wal wa, mi bede ma gasa kandɔ.» 19Sɔ gbosasa lî Agar, nɛ wɛnɛ zɔka ma kɔli. Wɛnɛ nɛa nɛ gdu lia donsi nɛ zang ngobho kutu sari mɔ li, nɛ a haa ma lia ha bema nɔ. 20Sɔ dungɔ hinɛ bema. Wɛnɛ gasa, wɛnɛ de le ha zang kpɛnu, nɛ wɛnɛ tɛ bo nɛ̂ wi mɔ pi ndoro. 21A de le ha zang kpɛnu mɔ Paran, nɛ nana haa ma bhoko mɔ le Ezipte ha wɛnɛ tuka ko.

Abraham dea mbon hinɛ Abimelɛk

22Ha ngimɔ ɛngi, Abimelɛk tɛa hinɛ Pikol, kagama mɔ zugili wan-bibulo pɛa, ha pɛ Abraham. Wɛnɛ tɔa wen ha Abram mɛgi: «Sɔ hinɛ mɛ ha zang hio wi mɔ fɛt ka mɛ de.»

23Sising hakɛ, mɛ kan tɛ mɛ ha mi nɛ ling Sɔ nde, mɛ lɛm mɔ osiri mi, hio bem pɔm, hinɛ hio bezang mbwa na. Gbesi tuka mi dea nɛ dedemɔ ha tɛ mɛ, mɛ fin mɛ bede dede mɔ ha tɛ mi, hinɛ ha tɛ hio wi mɔ le ka mɛ dung ha zanga.

24Abram tɔa: «Mikanatɛ mi.»

25Maa, Abraham fundɔ ha Abimelɛk wen kɔli ka hio wantom pɛ Abimelɛk baa yo nɛ ngaya ha kɔ̂ wa. 26Abimelɛk kiforo wen ha wɛnɛ nde: «Mi tɛ̂ ing wi ka dea mɔ ɛngi na. Pɔm, zea wena nɛ̂ mɛsɛ kɔ.» 27Mɛgi Abraham kuo hio ma bebe namdalɛ hinɛ hio gasa namdalɛ, nɛ haa mbwa ha Abimelɛk. Hapata, mbwa bwa fɛt dea mbon pɛ mbwa ha soko mbwa. 28Abraham gdea hio bebe nanambu sami mɔrkɔ zanga bwa nɛtɛ. 29Nɛ Abimelɛk tɔa ha Abraham: «Goto hio bebe nanambu sami mɔrkɔ zanga bwa ɛngɛ ka mɛ gdea nɛtɛ nɛ̂ ge?» 30Abraham kiforo wen nde: «Mɛ beku hio nanambu sami ndɔng ha kɔ̂ mi tuka mɔ kɛmɔ nde mi ha gdɔy kɔli ɛngɛ.» 31Yo nɛ̂ ɛngi, ka ɛ sa nɛ ling bhandi ɛngi nde Beer-Seba1. Hazu yo nɛ̂ ha bhandi ɛngi, ka mbwa bwa fɛt, gɔna nɛ nû ha may. 32Mɛgi, mbwa dea mbon pɛ mbwa ha Beer-Seba. Hapata, Abimelɛk guo tɛ hinɛ Pikol, kagama mɔ zugili wan-bibulo pɛa, mbwa nduko ha le pɛ hio wi mɔ Filisti. 33Abraham gunɔ ma te ka ɛ sa nde tamaris ha Beer-Seba, nɛ a sombala ling Wankpoo, Sɔ ka dung kpoo nɛ kpoo. 34Abraham dea le ha le pɛ hio wi mɔ Filisti pata nyɛa.