Angaramɔ 20

Abraham, Sara hinɛ Abimelɛk

1Abraham guo tɛ ha bhandi ka wɛnɛ dungɔ ha yo mɔ pen ha le Negeb. Wɛnɛ dea le ha soko Kades hinɛ Sur, hapata wɛnɛ gbinɔ le nɛ̂ ha Gerar. 2Abraham tɔa ha hio wi nde: «Sara nɛ̂ ya mi mɔ bhoko.» Abimelɛk, kongapora mɔ le Gerar tomsa hio wi mɔ ku Sara tɛ̂ nɛ̂ ha wɛnɛ. 3Maa, Wankpoo nɛa ha pɛ Abimelɛk nɛ wal lîSɔ nɛ zɛ nɛ tɔ ha wɛnɛ: «Mɛ befe ha wen zu bhoko ka mɛ kuo, hazu wɛnɛ nɛ ko pɛ wi.» 4Abimelɛk ka tɛ̂ tɛ sanga nɛ Sara na, kiforo wen: «Wankpoo, mɛ bebhondisi ma kandɔ ngase kandɔ ɛngi nɛ̂ nzeng nde?» 5Yo bo ma nɛ̂ wɛnɛ nɛ tɛ wa ha tɔ ha mi nde: «Yo nɛ̂ ya mi mɔ bhoko.» Nɛ Sara nɛ tɛ wa tɔa mɔsoykisi ha hio wi nde: «Yo nɛ̂ ya mi mɔ wei?» Mi dungɔ nɛ saa sila, nɛ kɔ̂ mi de gdangamɔ kade mi ade mɔ ɛngi na. 6Sɔ kiforo wen ha wɛnɛ ha zang lîSɔ: «Mi ingɔ nɛ dedea nde mɛ dungɔ nɛ dede sila ha mɔ ka mɛ dea. Fin, mi tɛ gdɔki wal ha mɛ mɔ de sɛmbɔ sungiri nɛ mi na. Yo nɛ̂ ɛngi, ka mi tɛ gde wal ha mɛ mɔ ndɔ tɛ wa na. 7Sising, mɛ kifiri nɛ bhokoa ha wei ɛngɛ. Hazu wɛnɛ nɛ̂ wan-tɔkuliwen, a begɔ Sɔ mɔ ha zumɛ, nɛ mɛ bedung nɛ tunɔ. Maa ka mɛ kifiri nɛ wɛnɛ na, mɛ ing nde, mɛ befe hinɛ hio wi mɔ ka mɛ dung nɛ yo fɛt.»

8Abimelɛk guo tɛ nɛ sutole sut. Wɛnɛ sa hio wantom pɛa, nɛ a tɔa ha mbwa hio wi mɔ ndɔng fɛt. Nɛ gasa ke baa mbwa. 9Hapata, Abimelɛk sa fin Abraham, nɛ a tɔa ha wɛnɛ nde: «Ge ka mɛ dea nɛ ɔ mɛgi nde? Nɛ mi dea nɛ̂ ngete sɛmbɔ sungiri mɛ, kade mɛ aku mi hinɛ hio wi mɔ kongakandɔ pɔm, mɔ pi ha zang gasa sɛmbɔ nde? Hio mɔ ka mɛ dea ha tɛ mi bo nɛ̂ dede mɔ ka wi lɛm mɛkiri yo na.» 10Hapata Abimelɛk tɔa ha Abraham: «Mɛ takara nɛ ngete mɔ mɔ de ɛngi nde?» 11Mɛgi Abraham kiforo wen nde: «Mi tɔa ha sila mi nde ma wi ka yu ke Sɔ hakɛ bo na, nɛ ɛ be nɛ gbɛ mi ha wen zu ko mi. 12Ha zua fɛt, yo nɛ kpasawen nde wɛnɛ nɛ̂ ya mi mɔ bhoko, bem pɛ bafa mi. Sɔna wɛnɛ bo nɛ̂ bem pɛ nana mi na, nɛ wɛnɛ tɛ bo nɛ̂ ko mi. 13Ha ngimɔ ka Sɔ dea nde mi apen ha yambala nɛ nyɛa nɛ nam pɔm, mi tɔa ha Sara nde: «Mɛ de dede sila ha mi ha bhandi fɛt ka ɔ ha nɛa ha yo, mɛ tɔ ha hio wi fɛt nde mi nɛ̂ ya mɛ mɔ wei.»

14Abimelɛk kuo hio bebe namdalɛ nɛ hio gasa namdalɛ, hio bala mɔ wei nɛ mɔ bhoko, wɛnɛ haa mbwa ha Abraham. Wɛnɛ kiforo nɛ Sara, ko pɛ Abraham ha wɛnɛ. 15Abimelɛk tɔa: «Zɔk, le pɔm ha lî mɛ kɔ̂, mɛ de le ha bhandi ka mɛ ngoya.» 16Wɛnɛ tɔa ha Sara: «Mi ha haa ha ya mɛ hio kɔfɔrɔ mɔ mbɔli tommay ndang. Yo nɛ mɔ osi ha hio wi ka dung ha pɛtɛ mɛ nde wen bo ha zu mɛ na. Mɛgi, ziomɔ pɛ mɛ bebhɔn tuka mɔ Sɔngsi.» 17Abraham gɔa Sɔ nɛ wɛnɛ guo zɛlɛ yu nɛ̂ ha tɛ Abimelɛk, ko pɛa, hinɛ hio wantom pɛa mɔ bhoko, nɛ mbwa lɛma bhɛ bem. 18Hazu Wankpoo bagdɔki wal bhɛ pɛ hio wi mɔ twa pɛ Abimelɛk, ha wen zu Sara, ko pɛ Abraham.