Angaramɔ 19

Sodom hinɛ Gomor

1Hio telenge bwa hɔa ha Sodom nɛ mbolo. Lot dungɔ ha dungɔ nu ha nû le mɔ Sodom. Ka wɛnɛ zɔka mbwa, a guo tɛ nɛ̂ ha kpaa may hinɛ mbwa, nɛ a hilo nɛ mɛndi gɔk lî wa ha nu ha lî mbwa. 2Hapata a tɔa: «Mi baa nanga ɛnɛ, hio gasawi pɔm! Yo nɛ dedea nde ɛnɛ tɛ̂ tɛ ɔ nu ha twa pɛ wantom pɛ ɛnɛ, ɛnɛ fal nanga ɛnɛ. Ɛnɛ begu tɛ bhisiri nɛ sutole, nɛ ɛnɛ bepen ha nɔ pɛ ɛnɛ gele.» Nɛ mbwa kiforo wen ha wɛnɛ nde: «Dalo! Ɔ be ɔ nu ha bhandi ka hio wi wesirimay ayo.» 3Maa, Lot nɔsasa mbwa pentɛ, nɛ mbwa nduko nɛ̂ ha twa pɛa. Nɛ a gio yɔngamɔ ha mbwa nɛ dɔka, a dɔa mampa ka ɛ de nɛ nana mbwa na ha mbwa, nɛ mbwa yɔnga yo.

4Ka mbwa tɛ ɔnu na, hio wi mɔ lea, hio wei mɔ Sodom, zikoro pɛtɛ twa, angiri ha tɛ hio pɔlɔmbɔ gbo ha tɛ hio gbɛl wi, hinɛ hio wi mɔ zang lea fɛt. 5Mbwa saa Lot, nɛ tɔ ha wɛnɛ: «Hio wei ka lea ha twa pɛ mɛ nɛ zɛ kɛ ha ndo? Gbosisi mbwa ha dɛl ha ɔ, kade ɔ ɔ nɛ mbwa.» 6Lot gboa ha dɛl ha nûtwa ha pɛ mbwa, nɛ a gdɔka nûtwa ha gdong wa. 7A tɔa: «Hio ya mi, mi baa nanga ɛnɛ, ɛnɛ de gdangamɔ na! 8Ɛnɛ zɔk, mi baa nanga ɛnɛ: Mi nɛ hio bebhoko bwa ka tɛ ing wei na, mi beku mbwa tɛ̂ nɛ̂ nɛ̂ ha ɛnɛ ha dɛl, nɛ ɛnɛ bede mɔ ka ɛnɛ ngoya ha tɛ mbwa. Kanɛ mɔ ndang Sɔna, ɛnɛ de ma mɔ ha tɛ hio wei ndɔng na, hazu mbwa tɛa ha si twa pɔm.» 9Mbwa tɔa: «Pen haki!» Mbwa tɔa fin: «Mɛ ka dung nɛ̂ gɔngɛnɛ wi, mɛ tɛ̂ ha osa lîwal ha ɔ! Mɛgi ɔ bede gdangamɔ ha tɛ mɛ pen mɔ ka ɔ ngoya mɔ de ha tɛ hio wei ndɔng.» Mbwa ilo Lot nɛ ngaya, nɛ mbwa tiko sanga nɛ nûtwa nde mbwa a gbin yo. 10Hio telenge ndɔng yɛfafa kɔ̂, mbwa daka Lot pe nɛ̂ ha pɛtɛ mbwa ha zang twa nɛ mbwa gdɔka nûtwaa. 11Mbwa dea nde lî hio wi ka dung ha nûtwa adung nɛ tumtum, angiri ha tɛ hio pɔlɔmbɔ gbo ha tɛ hio gasa wi, tuka nde mbwa akpa nûtwaa na.

12Hio wei ndɔng tɔa ha Lot: « Hio o ha dung hakɛ ha pɛ mɛ fin o nde? Hio folo mɛ, hio bewei pɛ mɛ, hio bebhoko pɛ mɛ, nɛ hio wi mɔ pɛ mɛ fɛt ka dung ha zang lea, mɛ ku mbwa gbo nɛ ha bhandi ɛngɛ yu nɛ̂. 13Hazu ɔ bebhondisi bhandi ɛngɛ, hazu ha lî Wankpoo, mɔ ka ɛ tɔ wena sungiri nɛ hio wi mɔ lea nɛ gdanga pentɛ. Wankpoo tomsa ɔ mɔ bhondisi lea.» 14Lot gboa ha dɛl mɔ tɔ wen ha hio folo wa ka sio hio bebhoko pɛa, nɛ a tɔa ha mbwa: «Ɛnɛ gu tɛ, ɛnɛ gbo yu nɛ̂ ha le ɛngɛ, hazu Wankpoo be bhondisi lea.» Maa, hio folo wa zɔka pɛ mbwa wena tuka sɛkalamɔ. 15Ka mɔ saa, hio telenge nɔsasa Lot nde: «Gu tɛ, mɛ ku ko mɛ, hinɛ hio bebhoko pɛ mɛ bwa ka dung hakɛ, ɛnɛ pen, hazu nde ɛnɛ betɛ̂ kpa fio mɔsoykisi nɛ hio wi mɔ le sɛmbɔ ɛngɛ na.» 16Maa, ka Lot bhɔna ha ziko, hio telenge ndɔng baa wɛnɛ ha kɔ̂, ko pɛa, hinɛ hio bebhoko pɛa bwa, gbo nɛ mbwa ha zang lea yu nɛ̂, hazu Wankpoo ngoya mɔ kpasisi wɛnɛ. Mbwa kuo wɛnɛ gbo nɛ̂ nɛ gde wɛnɛ nɛtɛ nɛ lea. 17Ka hio telenge gboa nɛ mbwa ha lea yu nɛ̂, ma telenge ndang ha soko mbwa bwa tɔa: «Yu mɔ pen mɔ kpasisi nɛ tunɔ pɛ mɛ. Ka mɛ zɔk mɔ ha pata mɛ na, nɛ mɛ yol ha zang kpɛmyɛkɛ bɛlɛ ndang na. Mɛ yu mɔ pen nɛ wal zu ngari, hazu mɛ be nɛ kpa fio.» 18Lot tɔa ha mbwa: «Oh! Dalo, yo bo mɛgi na, gasawi! 19Mi baa nanga mɛ: Wantom pɛ mɛ kpaa dede sila pɛ mɛ, nɛ mɛ osa gasa ngoy pɛ mɛ ha mi nɛ wal kpasasa tunɔ pɔm. Maa mi, mi lɛm yu mɔ nɛ̂ ha wal zu ngari Sɔngsi nde gdangamɔ akpa nɛ mi na. Mɛgi na mi be fe ha wal! 20Mɛ zɔk le ki, yo nɛ̂ sanga hakɛ kade mi anɛ̂ mɔ de le ha yo, nɛ lea nɛ bebea. Oh! Gde mi aSɔ wi nɛ̂ haki kade mi a bhɔn nɛ zutunɔ!» 21Mɛgi telenge tɔa ha wɛnɛ: «Zɔk! Mɔ zisi mɛ, mi lɛm bhondisi le ka mɛ ha tɔa wena kɛ na. 22Nɛ hasa, yumɔ nɛ haki, hazu mi lɛm de ma mɔ Sɔngsi nde mɛ ahɔ haki na.» Yo nɛ̂ ɛngi, ka ɛ haa nɛ ling lea nde Soar1.

23Ka swe ha guo tɛ, Lot lea pɛa le Soar. 24Mɛgi Wankpoo dea nde ma gasa bok agu tɛ ha ngɔn nɛ ma gasa we ka gu tɛ nɛ wal pɛ Wankpoo atek ha zu Sodom nɛ Gomor. 25Wɛnɛ yangala hio lea, kpɛmyɛkɛ bɛlɛ fɛt, hio wi mɔ hio lea fɛt, hinɛ hio kpalmɔ ka gbo ha zunua fɛt. 26Ko pɛ Lot zɔka mɔ ha pata wa, nɛ a tɛ bo tuka kili tɔng ka dung tuka ma sɛkate.

27Abraham guo tɛ nɛ sutole sut mɔ nɛ̂ ha bhandi ka wɛnɛ badung ang ha lî Wankpoo. 28Wɛnɛ zɔka mɔ ha wal Sodom nɛ Gomor, nɛ ha zu hio le mɔ kpɛmyɛkɛ bɛlɛ, nɛ a zɔka zɛwe ha guo tɛ ha ngɔn tuka zɛwe mɔ lembe we. 29Ka Sɔ bhondasa hio le mɔ kpɛmyɛkɛ bɛlɛ ɛngi, Sɔ gbata zu wa nɛ Abraham nɛ wɛnɛ guo Lot ha zang gdangamɔ yu nɛ̂ ha ngimɔ ka wɛnɛ yangala nɛ hio le ka Lot badung ha ɔa ha yo.

Lot hinɛ hio bebhoko pɛa

30Lot guo tɛ ha Soar mɔ nɛ̂ hinɛ hio bebhoko pɛa ha ɔa ha zu ngari, hazu wɛnɛ dungɔ nɛ ke mɔ ɔ ha Soar. Mbwa ɔa ha zang ma lokta. 31Mɛgi, kay bebhoko pɛ Lot tɔa ha bebe yawa nde: «Bafa ɔ gbɛla kari, nɛ hio wei bo ha le ɛngɛ mɔ si ɔ na, tuka ɛngɛ ka hio wi ha dea. 32Tɛ! Ɔ ha gbɛlî dɔkɔ ha bafa ɔ, wɛnɛ anɔ, nɛ ɔ a ɔnu nɛ wɛnɛ kade wɛnɛ akpa ma bezang ha gdong wa. 33Mɛgi, mbwa haa gbɛlî dɔkɔ ha bafa mbwa ha zang zɛ ɛngi, wɛnɛ nɔa, nɛ kay bebhokoa nɛa nɛ ɔnu hinɛ bafa wa. Bafa wa tɛ ing tɛa pɛ kay bebhoko pɛa ha ɔa nu mana ha guo tɛ na. 34Yala ndang ha pata, kay bebhokoa tɔa ha bebe ya wa nde: «Mi ɔa nu hinɛ bafa mi ha zɛ ɛngɛ ka pena kɛ, ɔ ha fin ma dɔkɔ ha wɛnɛ ha zɛ ɛngɛ mɛsɛ, wɛnɛ ɔnɔ, nɛ mɛ ɔ nu hinɛ wɛnɛ, kade mɛ abhɛ ma bezang ha bafa ɔ.» 35Ha zɛ ɛngi, mbwa haa gbɛlî dɔkɔ fin ha bafa mbwa nɔ, nɛ bebe ya wa guo tɛ mɔ ɔnu ha pɛtɛ wa. Bafa wa tɛ̂ ing tɛa pɛ bwa bebhokoa ha ɔa nu mana ha guo tɛ na. 36Hio bebhoko pɛ Lot bwa fɛt baa zang hatɛ pɛ mbwa. 37Kay bebhokoa bhɛa nɛ bewei, nɛ wɛnɛ saa wɛnɛ nde Moab2: Yo nɛ̂ ngbabafa mɛ hio wi mɔ le Moab ka bhɔna gbo mɛsɛ. 38Bwa bebhokoa bhɛa fin nɛ bewei, nɛ wɛnɛ saa wɛnɛ nde Ben-Ammi3. Wɛnɛ nɛ̂ ngbabafa mɛ hio wi mɔ le Ammon ka bhɔna fin gbo mɛsɛ.