Angaramɔ 18

Sɔ gbasa nde Sara bebhɛ ma bewei

1Wankpoo gbasa tɛ ha wɛnɛ ha pɛtɛ hio te Sene mɔ Mamre ha ngimɔ ka Abraham ha dungɔ nu ha nûtwa go pɛa ha ngimɔ mɔgbɛng mɔ swe. 2A guo lî, nɛ zɔk hio wei tar ha dungɔ ha yola ha gɔn ha pɛtɛ wa. Ka wɛnɛ zɔka mbwa, a Sɔa wi nɛ̂ ha kpaa may hinɛ mbwa angiri ha nûtwa go pɛa, a hilo gbo ha nu 3nɛ a tɔa: «Gasawi, ka mɛ zɔk mi nɛ dede lî, mi baa nanga mɛ, mɛ pen nɛ nyɛa nɛ wantom pɛ mɛ na. 4Mɛgi, ɛ ku ma bebe li tɛ̂ nɛ̂ mɔ fal nɛ nanga ɛnɛ! Ɛnɛ ɔmtɛ ha si te kɛ. 5Mi benɛ ku ma titi mampa tɛ̂ nɛ̂ mɔ ngasisi nɛ ɛnɛ, hapata ɛnɛ lɛma pena ha wal pɛ ɛnɛ. Mɛgi ɛnɛ lɛm pen nɛ mɔsoykilea ha pɛ wantom pɛ ɛnɛ na. Mbwa kiforo wen: «Ɛy, de mɔ mɔsoykisi tuka mɛ tɔa.» 6Abraham nɛa nɛ hasa ha zang go pɛa ha pɛ Sara nɛ a tɔa: «Nɛ hasa, mɛ ku mɔ wekimɔ nɛ mɛ weki fok mɔ de nɛ mampa, kilo bhuzebwa zanga mɔrkɔ.» 7Abraham Sɔawi nɛ̂ ha bhandi pam hio namdalɛ pɛa, a kuo ma bɔm-bɔm be nday ka multɛ wa nɛ mɔka, nɛ ha yo ha ma pɔlɔmbɔ wantom pɛa nde wɛnɛ agi yo nɛ hasa. 8Abraham kuo ma zio nɔ mɔ libele nday, hinɛ ma libele nday, nɛ mul be nday ka ɛ bhɔngara nɛ gde ha lî hio gɛnɛ ndɔng. A dungɔ ha pɛtɛ mbwa, ha si te, nɛ mbwa yɔnga yo.

9Mɛgi, mbwa tɔa ha wɛnɛ: «Ko pɛ mɛ Sara ha ndo?» A kiforo wen: «Wɛnɛ haki, ha si go.» 10Ma gɛnɛ ndang ha soko mbwa tɔa: «Kpasawen, mi betɛ̂ fin ha pɛmɛ ha bɛlɛ mɔ pata: «Zɔk Sara, ko mɛ bebhɛ ma bewei ndang.» Sara dungɔ ha zea wena ha nûtwa go ka dung ha gdong Abraham.

11Abraham hinɛ Sara gbɛla kari, mbwa dungɔ nɛ dɔka bɛlɛ, nɛ Sara lɛm fin mɔ bhɛ ma bem na. 12A mama ha sila wa, nɛ a tɔa: «Sising, mi fabhala fɛt kari, mi fin nɛ ngaya mɔ de hɛl mɔ nde? wei pɔm fɛt gbɛla.» 13Wankpoo tɔa ha Abraham: «Ha wen ge ka Sara mama ha sila wa, nɛ a tɔa nde: “Tɛwen nde mi bebhɛ fin nɛ ma bem, mi ka gbɛla kari kɛ nde?” 14Ma mɔ gan Wankpoo ang nde? Ha bɛlɛ mɔ pata, ha ndangtɛ ngimɔ ɛngɛ, mi benduki tɛ̂ ha pɛ mɛ, nɛ Sara bebhɛ nɛ ma bewei.» 15Sara tɔa yɛlɛ nde: «Mi tɛ mam mami na», hazu a dungɔ nɛ ke. Wankpoo tɔa ha wɛnɛ: «Tɛwen, mɛ mama ha sila mɛ!»

16Hio wei ndɔng guo tɛ mɔ pen, nɛ mbwa zɔka mɔ nɛ wal le Sodome. Abraham nɛa gdea mbwa ha lîwal. 17Tangere Wankpoo batɔ: «Mi bewusi mɔ ka mi ngoy mɔ de nɛ Abraham nde? 18Abraham bedung nɛ̂ ma gasa kandɔ nɛ da. Nɛ wal wa ɛ bewol dede wen ha zu hio kandɔ mɔ zunu fɛt. 19Hazu mi weka wɛnɛ mɔ tɔ nde wɛnɛ aha nû ha hio bewei pɛa hinɛ hio nam pɛa ha pata wa mɔ pam lîwal pɛ Wankpoo, ha deamɔ ka dung nɛ dedea, nɛ nzengmɔ. Mɛgi, Wankpoo bede ha Abraham mɔ ka wɛnɛ batɔ ha zu wa. 20Wankpoo tɔa: «Mɔ ka ɛ tɔ ha zu Sodome nɛ Gomore nɛ dɔka gdang, nɛ sɛmbɔ pɛ mbwa zio pentɛ. 21Yo nɛ̂ ɛngi, mi bezil nɛ zɔk mana mbwa ha dea mɔ lɛm nɛ mɔ ka mi zea, nɛ ka yo bo mɛgi na, mi be ing yo fin.»

22Hio wei ndɔng yɔa mɔ ha bhandi ɛngi, nɛ mbwa nɛa ha Sodome. Maa, Abraham bhɔna yola ha lî Wankpoo. 23Abraham tiko tɛ̂ nɛ a tɔa: «Mɛ bede gdangamɔ ha tɛ nzeng wi hinɛ gdanga wi mɔsoykisi nde? 24Ɔ ing na, hio nzeng wi bhukɔa mɔrkɔ ang ha zang lea: «Mɛ bede gdanga ha tɛ mbwa fin, nɛ mɛ lɛm ha tiso ha le ɛngi ha wen zu hio nzeng wi bhukɔa mɔrkɔ ka dung ha ki na nde?» 25Mɛ lɛm de mɔ mɛgi na: Mɔ gde hio nzeng wi mɔsoykisi nɛ hio gdanga wi, tuka nde nzeng wi adung tuka gdanga wi, yo apen nɛ nyɛa nɛ mɛ! Wi ka gɔn kita ha zu nzan lɛm de mɔ nɛ wal mɔ ka dung nzeng na nde?» 26Wankpoo tɔa: «Ka mi kpaa hio nzeng wi bhukɔa mɔrkɔ ha zang lea, mi beha tiso ha lea ha wen zu mbwa.»

27Abraham kuo fin wen, nɛ a tɔa: «Zɔk mi guo nû tɔ wen ha Wankpoo, mi ka dung nɛ̂ gbutunu hinɛ bokwe. 28Ɔ ing na, mana mɔrkɔ ha soko hio nzeng wi bhukɔa mɔrkɔ bo ang na, ha wen zu hio wi mɔrkɔ, mɛ be bhondisi lea fɛt nde?» Nɛ Wankpoo tɔa: «Ka mi kpaa nzeng wi bhukɔa nar zanga mɔrkɔ mi lɛm bhondisi lea na.»

29Abraham bhɔna tɔawen ha Wankpoo mɛgi: «Ɔ ing na, mana hio dede wi ha lea nɛ bhukɔa nar!» Wankpoo tɔa: «Ka mi kpaa dede wi nɛ bhukɔa nar, mi lɛm bhondisi lea na.»

30Abraham tɔa: «Ka Wankpoo ade ngambi na, nɛ mi betɔ wen fin. Ɔ ing na ɛ bekpa kanɛ wi bhukɔa tar. Wankpoo tɔa: Ka mi kpaa hio nzeng wi bhukɔa tar, mi lɛm de mamɔ ndang na.»

31Abraham tɔa: «Zɔk mi guo nû mɔ tɔ wen ha gasa wan pɔm fin. Ɔ ing na, mana ɛ bekpa nzeng wi bhuzebwa haki.» Wankpoo tɔa: «Hawenzu hio nzeng wi bhuzebwa ndɔng, mi lɛm bhondisi lea na.»

32Abraham tɔa: «Mi ba nanga mɛ, gasa wan pɔm ka mɛ de ngambi na, nɛ mi betɔ wen nɛ mbinga. Ɔ ing na, mana ɛ bekpa nɛ̂ hio nzeng wi bhukɔ hazang lea.» Wankpoo tɔa: «Hawenzu hio nzeng wi bhukɔ ndɔng mi lɛm bhondisi lea na.»

33Wankpoo pena ha pata ka wɛnɛ karsa tɔa wen ha Abraham, nɛ Abraham nduko ha twa pɛa.