Angaramɔ 17

Mɔweka mɔ mbon pɛ Sɔ hinɛ Abram, nɛ ling Abram tɛ bo nɛ̂ Abraham

1Ka Abram kpaa bɛlɛ bhukɔa mɔrkɔ zu bhukɔa nar zanga mɔrkɔ gbala nar (99), Wankpoo gbasa tɛ ha wɛnɛ, nɛ a tɔa ha wɛnɛ: «Mi nɛ̂ Sɔ Wan-Ngaya. Mɛ dung ha lî mi nzeng nɛ hio wi mɔ pɛmɛ fɛt dung nɛ walaa. 2Mi benɔ mbon pɔm ha soko mi hinɛ mɛ, nɛ mi bedɔksi hio bezang mɛ kade mbwa ayɛbhi.

3Abram teka, gok lî wa ha nu, nɛ Sɔ tɔa wen ha wɛnɛ mɛgi: 4«Pɔm, mɛ zɔk mbon ka mi bhɔngara ha soko mi hinɛ mɛ: Mɛ bedung bin nɛ̂ bafa mɛ hio dɔka kandɔ. 5Ɛ lɛm sa fin mɛ nɛ ling Abram na, maa, ling mɛ bedung nɛ̂ Abraham, hazu mi bede nde mɛ adung bafa mɛ hio dɔka kandɔ. 6Mi bede nde mɛ bhɛ hio bem nɛ dɔka. Mi bede nde mɛ bhɛ hio kandɔ nɛ hio kongapora begbo ha zang mɛ. 7Mi beyolsi mbon pɔm hinɛ mɛ nɛ hio bezang mɛ ha pata mɛ, ha zang hio tanga mbwa fɛt: Yo bedung nɛ̂ ma mbon mɔ kpoo nɛ kpoo, nɛ wal yo, mi bedung nɛ̂ Sɔ pɛ mɛ, nɛ Sɔ pɛ hio bezang mɛ ka betɛ ha pata mɛ. 8Mi beha le ka mɛ dungɔ ang tuka gɔngɛnɛ wi, hio le mɔ Kanaan fɛt, ha mɛ hinɛ hio bezang mɛ ha pata mɛ. Yo bedung nɛ pɛ ɛnɛ kpoo nɛ kpoo, nɛ mi bedung nɛ̂ Sɔ pɛ mbwa.»

9Sɔ tɔa ha Abraham: «Mɛ, mɛ bepam mbon pɔm, mɛ hinɛ hio bezang mɛ ha pata mɛ ha zang Sɔy bhɛ pɛ mbwa fɛt.» 10Zɔk wal ka ɛnɛ bepam nɛ mbon ka mi ha nɔa hinɛ ɛnɛ, nɛ hinɛ hio bezang mɛ ha pata mɛ nɛ̂ ɛngɛ: «Hio bewei fɛt ha soko ɛnɛ agɔn Sɔru mbwa. 11Ɛnɛ begɔn Sɔru ɛnɛ tuka mɔweka mɔ mbon ha soko ɛnɛ hinɛ mi. 12Ha pata yala mɔrkɔ zanga tar mɔ bhɛ, ɛ begɔn Sɔru hio bewei ka dung ha soko ɛnɛ, ha zang hio Sɔy bhɛ pɛ mbwa fɛt. Ɛnɛ begɔn mɔsoykisi Sɔru hio bala ka ɛ bhɛa mbwa ha zang twa pɛ ɛnɛ, hinɛ hio ɛndɔng ka ɛnɛ hɛa mbwa ha kɔ̂ hio gɔngɛnɛ wi ka mbwa bo nɛ mɔ zang kandɔ pɛ ɛnɛ na. 13Lɛma nde ɛ gɔn Sɔru wi ka ɛ bhɛa wɛnɛ ha zang twa pɛ mɛ, hinɛ wi ka ɛ hɛa wɛnɛ nɛ mbɔli pɛ mɛ. Yo bedung nɛ̂ mɔweka mɔ mbon mɔ kpoo nɛ kpoo ha multɛ ɛnɛ. 14Wei ka ɛ tɛ̂ gɔn Sɔru wa na, ɛ beyin wɛnɛ yu nɛ̂ ha soko hio dan wa, hazu a gdangsa wen mbon pɔm.»

15Sɔ tɔa fin ha Abraham: «Pɛ ko pɛ mɛ Sarai, mɛ lɛm sa fin wɛnɛ nde Sarai na, maa, ling wa bedung nɛ̂ Sara. 16Mi bewol dede wen ha zu wa, nɛ mi beha ma bewei ha mɛ nɛ wal wa. Mi bewol dede wen ha zu wa nɛ wɛnɛ bebhɛ hio kandɔ, hio kongapora mɔ hio dɔka kandɔ begbo ha zang wa. 17Abraham teka gok lî ha nu. Nɛ a mama mami nɛ a tɔa ha sila wa: «Ma wei mɔ bɛlɛ gɔmmay ndang bebhɛ fin bewei nde? Nɛ Sara ka dung nɛ bɛlɛ bhukɔa mɔrkɔ zubhukɔa nar gbala mɔrkɔ zanga nar bebhɛ fin nde?» 18Hapata, Abraham tɔa ha Sɔ: «Oh! Lɛma nde Ismael adung nɛ zutunɔ ha lî mɛ!». 19Maa, Sɔ tɔa: «Kpasawen, ko pɛ mɛ Sara bebhɛ ma bewei ha mɛ, nɛ mɛ beha ling Izaak1 ha wɛnɛ. Mi benɔ mbon pɔm tuka ma mbon mɔ kpoo nɛ kpoo hinɛ wɛnɛ banɛ hio bezang wa ha pata wa. 20Hazu Ismael, mi zea wen pɛ mɛ. Mi bewol dede wen ha zu wa, mi bede nde wɛnɛ adung nɛ bhɛ nɛ mi, Mi bede mbon pɔm hinɛ mɛ, nɛ mi bedɔksi hio bezang mɛ. Mbwa bebhɛ hio bewan bhukɔ gbala bwa nɛ mi bede wɛnɛ adung nɛ̂ ma gasa kandɔ. 21Maa, ka bo nɛ̂ pɛ mbon pɔm, mi beyolsi yo hinɛ Izaak ka Sara bebhɛ ha mɛ ha bɛlɛ mɔ pata ha ndangtɛ ngimɔ ɛngɛ.

22Ka Sɔ karsa tɔa wen ha Abraham, a guo tɛ ha zu Abraham nɛ pen. 23Abraham kuo bewei pɛa Ismael, hio wi ndɔng fɛt ka ɛ bhɛa ha zang twa pɛa, hinɛ hio wei ka wɛnɛ hɛa nɛ mbɔli pɛa, hio wei fɛt ka dung ha soko hio wi mɔ zang twa pɛa, wɛnɛ gɔna Sɔru mbwa ha ndangtɛ swe ɛngi tuka Sɔ tɔa nɛ wena ha wɛnɛ. 24Abraham dungɔ nɛ bɛlɛ bhukɔa mɔrkɔ zubhukɔa nar zanga mɔrkɔ gbala nar ha ngimɔ ka ɛ gɔna nɛ Sɔru wa. 25Bewei pɛa Ismael dungɔ nɛ bɛlɛ bhukɔ gbala tar ka ɛ gɔna nɛ Sɔru wa. 26Ha ndangatɛ yala ɛngi, ɛ gɔna Sɔru Abraham mɔsoykisi nɛ pɛ bewei pɛa Ismael. 27Gbesi, hio wei mɔ twa pɛa, ka ɛ bhɛa ha zang twa pɛa, mana hio wei ka wɛnɛ hɛa nɛ mbɔli ha kɔ̂ hio gɔngɛnɛ wi, ɛ gɔna Sɔru mbwa hinɛ wɛnɛ.