Angaramɔ 9

Sɔ dea mbon hinɛ Noe

1Sɔ wola dede wen ha zu Noe, hinɛ hio bewei pɛa, nɛ a tɔa ha mbwa: «Ɛnɛ dung nɛ bhɛ, nɛ ɛnɛ bhɛ nɛ dɔka, nɛ ɛnɛ ayɛbhi don nu.» 2Hio sari fɛt mɔ zu nu, hio nɔy fɛt mɔ ngɔn, hio ɛ ndɔng ka hay nɛ nu fɛt hinɛ hio kɔyɔ mɔ hio nanali tɔng, mbwa be dung nɛ gasa ke tɛ ɛnɛ. Mi gdea mbwa ha zang kɔ̂ ɛnɛ. 3Hio mɔ fɛt ka hay nɛ nu, nɛ ka mbwa nɛ tunɔ, be dung nɛ̂ yɔngamɔ pɛ ɛnɛ: Mi haa yo ha ɛnɛ tuka ka mi haa nɛ hio wakpo ha ɛnɛ. 4Maa, ɛnɛ lɛm yɔng mul sari ka tunɔa bhɔn a zanga na, hazu tunɔ pɛa dung ha zang tɔk tɛ wa. 5Mi be ani tɔktɛ ɛnɛ, ka dung nɛ tunɔ, mi be ani yo ha kɔ̂ hio sari fɛt, nɛ hio wi fɛt ka begbɛ ma mbing wi ka dung nɛ̂ yawa.

6Wi ka be gɔsi tɔktɛ ma wi,

ma mbing wi fin be gɔsi tɔktɛ wa,

hazu Sɔ dea wi nɛ tɛ̂ zizitɛ wa.

7Nɛ pɛ ɛnɛ, ɛnɛ bhɛ, ɛnɛ dung nɛ dɔka pentɛ, ɛnɛ yɛbhi don zu nu hɛr.

8Sɔ tɔa fin wen ha Noe hinɛ hio bewei pɛa nde: 9«Mi bede mbon pɔm hinɛ ɛnɛ, banɛ hio bezang ɛnɛ ka betɛ̂ ha pata ɛnɛ, 10hinɛ hio wi mɔ fɛt ka dung nɛ tunɔ hinɛ ɛnɛ: hio nɔy, hio namdalɛ, hio sari kumbɔ ka dungɔ hapɛtɛ ɛnɛ, hinɛ hio sari ka gboa ha zang kuga hinɛ ɛnɛ, nɛ hio sari mɔ zu nu fɛt. 11Mi bede mbon pɔm hinɛ ɛnɛ: Ɛ lɛm gbɛ fin hio wi mɔ ka dung nɛ tunɔ nɛ mbengli na, nɛ mbeng lɛm dung fin ang mɔ bhondisi mɔ ha zu nu na.» 12Sɔ tɔa fin: «Ɛngɛ nɛ̂ ma mɔ weka mɔ mbon ka mi gdea ha soko mi hinɛ ɛnɛ, hinɛ hio wi mɔ fɛt ka dung nɛ tunɔ, nɛ ka dung hinɛ ɛnɛ kpoo nɛ kpoo. 13Mi gdea ndumbe pɔm ha zang kutu, nɛ a bedung nɛ̂ mɔ weka mɔ mbon ha soko mi hinɛ hio wi mɔ ka dung ha zu nu. 14Ka mi bewesiri hio kutu ha ngɔn ha zu nu, ndumbe be gbasitɛ ha zang kutu. 15Nɛ tazu mi begba nɛ mbon pɔm ha soko mi hinɛ ɛnɛ, nɛ hio wi mɔ fɛt ka dung nɛ zutunɔ, nɛ hio li fɛt lɛm kifiritɛ mbwa fin nɛ gasa mbengli mɔ bhondisi nɛ hio wi mɔ ka dung nɛ zutunɔ na. 16Ndumbe be dung ha zang kutu, nɛ mi be zɔk yo mɔ gba nɛ tazu mi nɛ mbon ka be bhɔn kpoo nɛ kpoo ha soko mi hinɛ hio wi ka dung nɛ zutunɔ nɛ hio wi mɔ fɛt ka dung ha nɛ tunɔ ha zu nu.» 17Sɔ tɔa ha Noe: «Ɛngɛ nɛ mɔ weka mɔ mbon ka mi gdea ha soko mi hinɛ hio wi mɔ fɛt ka dung nɛ zu tunɔ ha zu nu.»

Noe hinɛ hio bewei pɛa

18Hio bewei pɛ Noe ka gboa ha zang kuga dungɔ nɛ̂ Sem, Ham, hinɛ Zafet. Ham dungɔ nɛ̂ bafa mɛ Kanaan.

19Nɛ wal hio bem pɛ Noe tar, wi dona nu fɛt fin nɛ dɔka pentɛ pɛp.

20Noe gdea tɛ ha gɔma nu, nɛ gun kpal vinye ha yo. Wɛnɛ dungɔ nɛ̂ bosi wan-gɔmfɔ vinye. 21Ka wɛnɛ nɔa gbɛlî dɔkɔ, yo dea wɛnɛ, nɛ wɛnɛ kpɔsa la ha tɛ wa, dung nɛ Sɔngɛrɛ hasi go pɛa. 22Ham, bafa mɛ Kanaan, zɔka bafa wa nɛ Sɔngɛrɛ, nɛ wɛnɛ gboa nɛ tɔ we na ha hio ya wa bwa ha dɛl. 23Sem hinɛ Zafet kuo gasa gbambusa la pɛ bafa mbwa tikoso nɛ gdong, nɛ guri nɛ Sɔngɛrɛ tɛ bafa mbwa, hazu mbwa benɛ zɔk Sɔngɛrɛtɛ wa. Mbwa zɔk mɔ ha ma bhandi nɛtɛ, mbwa zɔk Sɔngɛrɛtɛ bafa mbwa na. 24Ka dɔkɔ kara ha lî Noe, nɛ ka wɛnɛ zea wen mɔ ka kpogio bewei pɛa dea ha tɛ wa. 25Mɛgi a tɔa: «Fomi atɛ̂ ha zu Kanaan! Wɛnɛ bedung nɛ̂ bala pɛ hio bala pɛ hio ya wa!»

26Hapata a tɔa:

«Lukosomɔ ha Wankpoo, Sɔ pɛ Sem,

lɛma nde Kanaan adung bala pɛa!

27Lɛma nde Sɔ ade nde hio bezang Zafet ayɛbhi don nu.

Wɛnɛ adung ha twa pɛ Sem

kade Kanaan adung bala pɛ mbwa!»

28Noe ɔa ha zu nu ha gdong gasa mbengli ka dea fɛt nɛ̂ bɛlɛ gɔmmay tar nɛ bhukɔa mɔrkɔ (350). 29Noe dea fɛt nɛ bɛlɛ gɔmmay mɔrkɔ zanga nar nɛ bhukɔa mɔrkɔ (950) ha zu nu, hapata a Fea.