Angaramɔ 33

Zakob kpamay hinɛ Ezau

1Zakob guo li wa ha zɔka Ezau ha tɛa nɛ hio wi pɛa ha gdo wa gɔmmay nar. Wɛnɛ kapana soko hio bem pɛa ha Lea, Rasɛl hinɛ hio bhoko wantom pɛa, Bela hinɛ Zilpa. 2A gdea hio bhoko wantom pɛa mbwa bwa ha Sɔngsi, hapata mbwa nɛ Lea hinɛ hio bem pɛa, banɛ Rasɛl ha kpogio hinɛ Zosɛf. 3Hapata, Zakob pena ha Sɔngsi hio bhoko ndɔng hinɛ hio bem pɛ mbwa. A gɔma zu wa zemɔrkɔ zanga bwa ha nu Sɔngsi nde wɛnɛ ahɔ sanga nɛ ya wa. 4Maa Ezau Sɔa wi mɔ kpamay hinɛ Zakob. A fuko Zakob ha zang kɔ̂ wa, nɛ zɔbhi mbuku wa. Mbwa bwa fɛt gdea tɛ ha hea kua. 5Ka Ezau zɔk hio bhoko hinɛ hio bem, a anamɔ: «Ɛngɛ nɛ hio ngete wi ha pɛtɛ mɛ nde?» Zakob kiforowen nde: «Yo nɛ hio bem ka Sɔ haa mi.»

6Bila hinɛ Zilpa tɛa hinɛ hio bem pɛ mbwa. Nɛ mbwa gɔmazu hasi Ezau. 7Lea tɛa hinɛ hio bem pɛa, hapata, Zosɛf hinɛ Rasɛl, nɛ mbwa fanamay hinɛ Ezau mɔsoykisi tuka hio oloa. 8Ezau anamɔ: ‹‹Mɛ ngoya mɔ de ge nɛ hio zugili namdalɛ ndɔng ka mi kpamay hinɛ mbwa haki nde?» Zakob kiforowen: « Wan pɔm, mi ngoya nde mɛ ade dedemɔ hinɛ mi.» 9Ezau nɛ tɔa fin: « Ya mi, mi nɛ hio dɔka mɔ. Mɛ pam hio wi mɔ ka dung nɛ pɛmɛ, nɛ pɛmɛ.» 10Zakob tɔa: « Way, mi baa nanga mɛ fɛt! Ka mɛ ngoy ma mɔ nɛ mi fin na, lɛma nde mɛ amɛkiri nɛ hio wi mɔ ka mi ha haa mɛ. Zanglî mɛ dung tuka pɛ Sɔ. Hazu mɛ dea dedemɔ nɛ mi. 11Mɛkiri hio wi mɔ ka mi tomsa ha mɛ. Yo nɛ̂ Sɔ ha ha yo ha mi. Nɛ mi nɛ hio dɔka mɔ ka lɛma nɛ mi.»

Zakob baa nanga Ezau nɛ ngaya, mɛgi Ezau mɛkara hio wi mɔ ka Zakob tomsa ha wɛnɛ. 12Ezau tɔa ha Zakob nde: « Ɔ agbin gurua pen! Mi benɛ hinɛ mɛ.» 13Zakob kiforowen ha Ezau: «Wan pɔm, mɛ ingɔ nɛ dedea nde tɛ hio bem ndɔng ngay na. Lɛma nde ɔ apangay hinɛ hio nana sami hinɛ hio nana nday ka bhɔna ha haa lî bele ha hio bea. Ka ɔ nɔsasa mbwa mɔ nɛnɔ n ɛasa, ngase yo nɛ̂ mɔ yala ndang, mbwa befe. 14Mi baa nanga mɛ Ezau, pen ha Sɔngsi. Mi benɛ pɔm nɛ hɔn hinɛ hio namdalɛ pɔm banɛ hio bem pɔm kanɛ̂ ɔ hɔa ha pɛ mɛ, ha le Seir.» 15Ezau tɔa: « Mi begde hio ma zugili wi pɔm hinɛ mɛ.» Nɛ Zakob kiforowen nde: « Yo de ma mɔ na, ngaya mɔ nɛ kɔbhɛtɛ mi ka mɛ dea.»

16Ha swe ɛngi, Ezau nduko ha le Seir. 17Zakob pɛa, pena ha Sukot1. Haki, a bɛa twa pɛa hinɛ hio go pɛ hio zugili namdalɛ pɛa. Yo nɛ̂ ɛngi ka ɛ sa nɛ ling bhandi ɛngi nde Sukot, ɛngi tɔ nde: «Hio Gbamsa».

Zakob ha le Kanaan

18Ka Zakob pea nɛ̂ ha wal le Mezopotamii mɔ kala, a pea nɛ dede tɛ. Ha le Sisem mɔ Kanaan. Wɛnɛ bɛa guru pɛa sanga nɛ lea. 19Yo nɛ̂ Hamor ha de le Sisem. Nɛ Zakob hɛa ha kɔ̂ mbwa nu ɛngɛ ka wɛnɛ bɛa twa pɛa ang nɛ ling hio bezang wa. Wɛnɛ futo yo nɛ faranga gɔmmay ndang2. 20Ha bhɔngara ma go ha bhandi ɛngi, nɛ ha saa ling nde El, Sɔ Israel.