Angaramɔ 35

Zakob bɛa ma go ha Sɔ ha Betɛl

1Ma swe, Sɔ tɔa ha Zakob nde: « Gutɛ! Mɛ nɛ ha Betɛl nɛ mɛ bhɔn haki. Mɛ bebɛ ma go ha mi. Yo nɛ ha bhandi ɛngi ka mi gbasa tɛ mi ha mɛ ha ngimɔ ka mɛ ha yuose ke ya mɛ Ezau.»

2Mɛgi, Zakob tɔa ha hio nam pɛa hinɛ hio wi ka ndari wɛnɛ nde: «Ɛnɛ gu hio bebeSɔ pɛ hio tombo1 ndɔng ka dung ha twa pɛ nɛ yunɛ̂. Ɛnɛ sasisi tɛ ɛnɛ, nɛ ɛnɛ asanzi hio la tɛ ɛnɛ. 3Ɛnɛ bhɔngiri tɛ ɛnɛ, ɔ pen ha Betɛl. Haki mi bebɛ ma go ha Sɔ. Hazu yo badung nɛ̂ wɛnɛ ha kifiriwen ha mi ha ngimɔ ka mi dungɔ ha zang ngaya ngimɔ. Yo nɛ wɛnɛ ha pam mi ha hio wal fɛt ka mi ha pena ang.»

4Mɛ hio wia wesara hio bebeSɔ ndɔng fɛt, hio wi mɔgɛl, hio wi mɔ kɔ ka mbwa yol hatɛ nɛ haa yo ha Zakob. A gunɔ yo hasi ma gasate sanga nɛ Sisem. 5Ka Zakob hinɛ hio bem pɛa ha gbino le mɔ pen ha Betɛl, Sɔ gdea ma gasa ke ha sila hio kɔmbɛ pɛ mbwa tuka nde mbwa angbabhiki mbwa nɛ bulo na.

6Zakob hinɛ hio wi ka nɛ hinɛ wɛnɛ hɔa ha le Luz ka ɛ saa fin nde Betɛl, ha kandɔnu Kanaan. 7A bɛa ma go haki nɛ wɛnɛ saa ling bhandi ɛngi nde «Sɔ Betɛl», hazu Sɔ ba ositɛ wa ha wɛnɛ haki ha ngimɔ ka wɛnɛ ba yuo ke ya wa Ezau.

8Debora, bhoko ka pam Rebeka Fea, nɛ ɛ guno wɛnɛ ha Betɛl nɛ wal gdɔk hasi ma gasa te. Angiri ha yala ɛngi, ɛ saa ling te ɛngi nde «te milkua».

9Ha ngimɔ ka Zakob pea nɛ ha wal Mezopotamii, Sɔ osatɛ ha wɛnɛ fin. Nɛ wɛnɛ wola dedewen hazu wa. 10Atɔa ha wɛnɛ: « Ling mɛ nɛ Zakob. Maa ɛ lɛm saa fin mɛ tuka ɛngi na. Angiri sising, ling mɛ nɛ dung nɛ Israel2.» Mɛgi Sɔ saa wɛnɛ nɛ ling Israel. 11Sɔ tɔa ha wɛnɛ fin nde: «Mi nɛ Sɔ, Wan-ngaya. Mi be haa mɛ dɔka hio bem. Mɛgi mɛ be dung nɛ ngbabafa ma kandɔ nɛ mɔ zugili hio dɔka kandɔ. Nɛ hio kongapora be tɛ nɛ wal pɛlbhɛ pɛ mɛ. 12Nû ɛngɛ ka mi bahaa ha Abraham hinɛ Izaak, mi behaa yo ha mɛ, nɛ ma swe mi behaa yo ha hio bem zang mɛ hinɛ hio bewazang mbwa.»

13Hapata Sɔ pena yunɛ ha bhandi ka wɛnɛ nɛ wen ha Zakob. 14Zakob bɛa ma gasa ta ha bhandi ɛngi. Wɛnɛ aa nɔ hinɛ gbɛ li dɔkɔ tikiring hazu ta ɛngi, tuka yo adung nɛ nzoya. 15Bhandi ɛngɛ ka Sɔ tɔa wen ha Zakob ang, Zakob saa yo nde Betɛl, ɛngɛ ngoy mɔ tɔ nde «Twa pɛ Sɔ».

Rasɛl Fea ha ngimɔ ka wɛnɛ bhɛa nɛ Benzamin

16Zakob hinɛ hio nam pɛa gdea le Betɛl gde pen. Mbwa tɛbo nɛ nyan nɛ Efrat ha ngimɔ ka Rasɛl bhɛa nɛ ma bem. Bhɛa badung nɛ ngaya. 17Ka Rasɛl ha bhɛa gan gan, bhoko baa-bema tɔa wɛnɛ: «Mɛ de ke na, yo nɛ ma bewei.» 18Ngiri Rasɛl gɔna. Nɛ ha ngimɔ ka Rasɛl ngoy mɔ fe, a saa ling bewei ɛngɛ nde Ben-Oni, yo ngoy mɔ tɔ nde «Bewei bɔnɛ pɔm». Maa Zakob saa wɛnɛ nde Benzamin, yo ngoy mɔ tɔ nde «Bewei weikɔ»3 19Rasɛl Fea nɛ ɛ guno wɛnɛ ha pɛtɛ wal ka nɛ ha Efrat ka ɛ saa fin nde Bɛtɛlhɛm4 20Zakob bɛa ma gasa ta hazu pisi pɛ Rasɛl. Yo nɛ ta zupisi pɛ Rasɛl. Yo bhɔna gbo swee mɛsɛ. Ruben dea kpandele sungiri bafa wa

21Zakob pena nɛ bɛ go pɛa ha gdong mɔ nɛ wal Migdal-Eder. 22Ka wɛnɛ ha ɔa haki, Ruben, bewei pɛa, ɔanu hinɛ Bila, wanza pɛ bafa. Ka Zakob zeawen ɛngɛ, zu wa tɛbo yembele yembele.

Hio bewei bhuko zanga bwa ka Zakob bhɛa.

Zakob bhɛa hio bewei bhuko gbala bwa: 23Lea bhɛa pɛa Ruben, kay bewei pɛ Zakob, Simeon, Levi, Izakar, banɛ Zabulon. 24Rasɛl bhɛa pɛa Zozɛf hinɛ Benzamin. 25Bela, bhoko wantom pɛ Rasɛl bhɛa Dan hinɛ Neftali. 26Zilpa, bhoko wantom pɛ Lea bhɛa Gad hinɛ Azer. Ɛngɛ nɛ hio bewei pɛ Zakob ka ɛ bhɛa mbwa Mezopotamii.

Fio pɛ Izaak

27Zakob hɔa ha pɛ bafa wa ha Mamre sanga nɛ kiriat-Arba. Mɛsɛ ling le ɛngɛ tɛbo nɛ Hebron. Abraham hinɛ Izaak ba ɔ haki. 28Izaak kpa bɛlɛ gɔmmay dang zu bhukɔa mɔrkɔ zu bhukɔa tar 180 ha ngimɔ ka wɛnɛ Fea nɛ. 29Ɔmi pɛa kara. Wɛnɛ Fea, nɛ a naka pata hio ngbabafa wa hapata dɔka bɛlɛ mɔ gbɛl. Hio bewei pɛa Ezau hinɛ Zakob gunɔ wɛnɛ.