Angaramɔ 49

Zakob wola dedewen hazu hio bewei pɛa bhukɔ zanga bwa

1Zakob saa hio bewei pɛa nɛ tɔ ha mbwa:

«Ɛnɛ wesiri tɛ ɛnɛ,

mi ngoy mɔ gbasi ha ɛnɛ

hio wi mɔ ka behɔ ha hio ma ngimɔ ka betɛ bin.

2Ɛnɛ wesirimay,

ɛnɛ ze, hio bewei pɛ Zakob,

ɛnɛ ze Israel bafa ɛnɛ!

3Mɛ, Ruben, mɛ nɛ kay bewei pɔm,

yo nɛ̂ mɛ ka dung nɛ ngaya tɛ mi.

Mɛ nɛ̂ bosi bem ka mi bhɛa ha ngimɔ

ka mi bhɔna nɛ ngatɛ zɛm.

Mɛ pena hio oloa fɛt nɛ zisotɛ,

banɛ ngatɛ.

4Mɛ dung tuka nanali ka fok nɛ dadaa.

Mɛ lɛm bhɔn tuka gasa ya hazu hio oloa na.

Mɛ fɛngsa mi nɛ wal ɔanu hinɛ ma ko mi

hazu yala1 pɔm bafa mɛ.

5Simeon hinɛ Levi nɛ hio gdiya ndang,

mbwa zeamay mɔ demɔ ngaya2 hatɛ hio wi.

6Mi ngoy de Sɔy hinɛ mbwa ha zang

deamɔ wuso pɛ mbwa na,

mi ngoy wesiri may hinɛ mbwa na.

Hazu ɛnɛ gbɛa wi ha zang ngambi pɛ ɛnɛ,

nɛ ha wen zu totɛ pɛ ɛnɛ,

ɛnɛ kɔmbara hio bafambu nday.

7Mi foma ngambi pɛ ɛnɛ ha wen zu

yo nɛ gdanga pentɛ!

Nɛ mi foma deamɔ ngambi pɛ ɛnɛ,

deamɔ pɛ ɛnɛ nɛ gdanga pentɛ!

Mi bekɛtini soko ɛnɛ

ha zu nu pɛ Zakob fɛt.

Mɛgi ɛnɛ begba soko ɛnɛ ha zang

le Israel fɛt ndang ndang.

8Zuda, hio yawa mɛ belukisi mɛ.

Mɛ be baa gɛl kɔ hio ngana pɛ mɛ,

hio bem pɛ bafa mɛ be gɔmzu mbwa hasi mɛ.

9Zuda, bewei pɔm, mɛ dung tuka ma bebe Dila3

ka gbɛ sari pɛa nɛ dak yo sinɛ ha bhandi ɔnu pɛa.

Wɛnɛ mbɔmbili tɛ, nɛ ɔnu sɛm, a dung tuka bafambu dila mana nanambu mbwa.

O ha betunsi wɛnɛ tuka nde wɛnɛ agu tɛ nde?

10Solo wan bebhɔn ha zang nam pɛ Zuda.

Hio bezang wa bedung kanɛ kongawan teee kanɛ̂

tɛ̂ wan betɛ yo nɛ̂ wɛnɛ ka hio kandɔ fɛt be ze nua.

11Wɛnɛ be hɛl toyfok pɛa hatɛ te vinye,

a behɛl betoyfok pɛa hatɛ dede te vinye.

Wɛnɛ befal la pɛa ha zang gbɛ li dɔkɔ,

a befal ngbala pɛa ha zang li waya vinye.

12Zangli wa bedung nɛ gbɛa hawen zu gbɛ dɔkɔ,

nɛ hio yini wa be dung nɛ bua nɛdedea pen li bele4 nday.

13Zabulon bede le hapɛtɛ nanali tɔng,

haki hio kuga bekpa nukolo pɛ mbwa ang.

Kandɔ pɛa benɛ gbo a ngbale Sidon.

14Issakar dung pɛa tuka ma ngay toyfok,

wɛnɛ dele hasoko hio ngalɔ bwa.

15A zɔka nde bhandia nɛ dedea,

lea fin nɛ dedea.

Mɛgi wɛnɛ yɛfafa gɛl wa hadɛl kade

ɛ gde hio zio toy ha yo.

Wɛnɛ bede nɛ tom bala.

16Dan bedung wan5 hazu hio wi pɛa,

mɔsoykisi tuka hio olo kandɔ Israel.

17Dan dung tuka gɔk hazu liwal,

tuka kolo ha pɛtɛ wal.

Wɛnɛ ha gɔma hio yanga ha nanga mbwa,

nɛ wi ka dung hazu yanga betek hanu.

18Wankpoo, mi ha zenga nde mɛ bekpasi mi.

19Gad, hio gdangawi teka hazu wa,

maa wɛnɛ dea ngayamɔ hatɛ mbwa nɛ a yinɔ pata mbwa.

20Azer bedung nɛ hio dede kpalmɔ pentɛ.

Hio yɔng pɛ hio kongapora bekpotɛ ha le pɛa.

21Neftali dung pɛa tuka madɛngbɛ

ka yal tuka sila wa ngoya.

A bebhɛ hio dede lɔka bem.

22Zozɛf dung tuka ma te ka be way nɛ dɔka,

nɛ te ɛngi dung hapɛtɛ li.

Hio gbakɔ te ɛngi bedung tuka

gbakɔ te ingi ka be pen zu hio ngeng ka kɛlkiti lea.

23Hio wan pi ndoro,

loa wɛnɛ nɛ hio li ndoro pɛ mbwa,

nɛ mbwa kio nu wa nɛ mbwa bio bulo hinɛ wɛnɛ.

24Maa kɔ wa ngaya hatɛ ndoro pɛa mɔsoykim,

kɔ wa bhɔna ang nɛ ngaya nɛ wal ngaya ka Sɔ haa wɛnɛ.

Wɛnɛ ka dung nɛ ngaya Sɔ pɛ Zakob,

wɛnɛ ka dung tuka zaoro-sami mana ta mɔ ka be pam hio wi mɔ Israel.

25Sɔ pɛ bafa mɛ be haa kɔ ha mɛ.

Sɔ ka ngaya pɛa pena hio olo ngaya fɛt.

Wɛnɛ bewol dedewen hazu mɛ,

nɛ dedewen ɛngi betɛ nɛwal kolo ka be ɔl,

yo betɛ nɛwal hio li ka begbo hasi hio nu pɛ mɛ,

nɛ wal bhɛ pɛ bhoko banɛ pɛ hio sari pɛ mɛ.

26Wola dedewen pɛ bafa mɛ hazu mi

pena dedewen pɛ hio na bhɛ mi.

Dedewen ɛngɛ pen hio dede kpalmɔ

mɔ zu hio dede koto ngarî fɛt.

Dedewen ɛngɛ bedung hazu Zozɛf,

wɛnɛ ka dung wan hazu hio olo ya wa fɛt.

27Benzamin dung tuka ma gdanga sari bɛlɛ

ka baamay hinɛ tolo bɛlɛ,

nɛ ka yɔng hio sari.

Nɛ sutele, wɛnɛ ha yɔnga hio sari ka wɛnɛ gbɛa,

nɛ mbolo, wɛnɛ ha kapana soko hio sari ka wɛnɛ gbɛa.»

28Ɛngɛ nɛ hio kandɔ bhukɔ zanga bwa kɔ. Ɛngɛ nɛ hio wen ka bafa ɛnɛ tɔa hazu ɛnɛ kɔ. A wola dedewen ɛngɛ hazu ɛnɛ ndang ndang kade hio dedewen ɛngɛ adung nɛtɛ nɛtɛ nɛ pɛ ya wa.

Fio pɛ Zakob

29Hapata, Zakob haanu mɛngɛ ha mbwa: «Ka mi Fea, ɛnɛ gun mi ha zang kɔfio pɛ hio ngbabafa mi. Yo nɛ ma gasa lokta ka dung ha zang fɔ pɛ Efron wi mɔ Het, 30ha Makpela, sanga nɛ Mamre ha Kanaan. Abraham bahɛse fɔ ɛngi hakɔ Efron kade ɛ gunɔ6 hio nam pɛa ang. 31Yo nɛ haki ka ɛ bagun Abraham hinɛ ko Sara, hapata, Izaak hinɛ ko pɛa Rebeka. Yo nɛ haki fin ka mi bagun Lea ang. 32Fɔ banɛ hio kɔfio ka dung haki, ɛ bahɛ yo hakɔ hio wi mɔ Het.» 33Hapata ka Zakob karsa tɔawen ha hio bewei pɛa, wɛnɛ ɔanu, nɛ si hapata hio ngbabafa wa.