Angaramɔ 50

Bhandi fio pɛ Zakob

1Zozɛf teka hazu wɔl bafa wa, a hea bafa wa nɛ zɔbhi mbuku bafa. 2Hapata, a haanu ha hio wan-nganga ka detom hasi wa nde: «Ɛnɛ bhɔngiri wɔl bafa kade ɔ gunɔ wɛnɛ.» 3Nɛ wal ndɔki deamɔ pɛ mbwa, hio wan-nganga dea yala bhukɔa nar hapɛtɛ wɔl Zakob ha hɔnga yo nɛ hio nɔ banɛ hio dede pɛl kulo liyama mɔ pam nɛ wɛnɛ. Hio wi mɔ Ezipte hea wɔl Zakob ha zang yala bhukɔa mɔrkɔ zu bhuze bwa.

4Ka yala he wɔl Zakob kara, Zozɛf haanu ha hio wantom ka dung hazang kin pɛ Faraon nde: «Ka ɛnɛ nɛ ngoy pɔm, ɛnɛ ku wen pɔm nɛnɛ ha kongapora. 5Ɛnɛ tɔ ha wɛnɛ nde mi tɔa nde: “Sɔngsi nde bafa mi afe, wɛnɛ dea nde mi a gɔn nu ha wɛnɛ nde mi begun wɛnɛ ha Kanaan ha zang kɔfio ka wɛnɛ wantɛ bhɔngara gde. Mi ngoya nɛa mɔ gun bafa mi sising, nɛ mi bepe hapata.”» 6Kongapora mɔ Ezipte tomsa mɔ tɔ ha Zozɛf nde: «Mɛ nɛ̂ nɛ gun bafa mɛ tuka mɛ tɔa.» 7Zozɛf pena hinɛ hio bui tom pɛ Faraon, banɛ hio ngbawi ka dung mɔzang kin pɛ kongapora, hinɛ hio ngbawi fɛt mɔ le Ezipte. 8A kuo hio nam pɛa fɛt nɛnɛ, hio ya wa banɛ hio ma nam pɛ bafa wa. Ha nu Gosen, mbwa gdea nɛ hio bem banɛ hio zugili namdalɛ. 9Hio puspus pɛ yanga banɛ hio wan baa yanga, nɛa hinɛ wɛnɛ. Mbwa tɛbonɛ ngba tululu zugili wi.

10Ka mbwa hɔa hazu gogo mɔ Atad ka dung ha kuli Zurdain, mbwa yola nɛ angara hea wɔl Zakob pentɛ fin. Zozɛf dea fin ngɔtɛ bafa wa ha zang yala mɔrkɔ zanga bwa. 11Ka hio wi mɔ Kanaan ka dele haki zɔka wal ka ɛ a hea nɛ wɔl Zakob, mbwa tɔa: «Ɛngɛ nɛ ngete gasa ngɔtɛ ha Ezipte!» Yo nɛ ɛngi ka ɛ saa nɛ ling bhandi nde: «Abel- Misraim1. »

12Hapata, hio bewei pɛ Zakob deamɔ ka bafa mbwa batɔ ha mbwa. 13Mbwa guo wɔl wa nɛnɛ ha Kanaan, nɛ gun wɛnɛ ha zang kɔfio2 ka dung ha Makpela, sanga nɛ Mamre. Yo nɛ bhandi ka Abraham bahɛ hakɔ Efron, wi mɔ Het, kade wɛnɛ adung wan kɔfio ndɔng. 14Hapata guno bafa mbwa, Zozɛf, hio ya wa, banɛ hio wi fɛt ka nɛa hinɛ mbwa ha guno Zakob, mbwa fɛt pea ha Ezipte.

Zozɛf haa tiso ha hio ya wa

15Hapata fio pɛ Zakob bafa mbwa, hio ya mɛ Zozɛf takaramɔ nde: «Sising Zozɛf bebaa ɔ tuka hio kɔmbɛ pɛa. Nɛ wɛnɛ bekifiri nɛ hio gdangamɔ ka ɔ dea hatɛ wa ha ɔ.» 16Mɛgi mbwa tomsa wen mɛngɛ ha Zozɛf: « Sɔngsi nde bafa mɛ afe, wɛnɛ haanu mɛgɛ: 17“Ɛnɛ tɔ ha Zozɛf nde mi tɔa: Mi baa nanga mɛ, mɛ haa tiso ha hio ya mɛ ha gdanga deamɔ pɛ mbwa, ha hio gdanga deamɔ fɛt ka mbwa dea ha tɛ mɛ!” Ɛy, mɛ haa tiso ha ɔ ha hio gdangamɔ ndɔng, ha ɔ ka gɔ ndangtɛ Sɔ mɔsoykisi nɛ bafa mɛ.» Ka Zozɛf zea hio wen ndɔng, a angara hea kwa3. 18Hio ya wa, mbwa wantɛ tɛa kpamay hinɛ wɛnɛ. Mbwa fɛt gɔsa hazu nanga wa nɛ tɔ ha wɛnɛ nde: «Ɔ nɛ hio bala pɛ mɛ!» 19Zozɛf kiforowen ha mbwa: «Ɛnɛ de ke na! Mi bo ha bhandi pɛ Sɔ na. 20Ɛnɛ ngoya mɔ de gdangamɔ hinɛ mi, maa Sɔ ngoya sanza yo nɛ dedemɔ. A ngoy mɔ kpasisi hio gili wi tuka ɛngɛ ka ɛnɛ ha zɔka mɛsɛ. 21Sising, ɛnɛ de ke na! Mi bezɔkmɔ hazu ɛnɛ hinɛ hio nam pɛ ɛnɛ fɛt.» Hapata, wen ngoy ɛngɛ ka Zozɛf tɔa ha hio ya wa, mbwa kpa bengaya.

Kpogio zunu pɛ Zozɛf

22Zozɛf banɛ hio nam pɛ bafa wa deale ha Ezipte. Zozɛf ɔa hazunu bɛlɛ gɔmmay ndang zu bhukɔ. 23Wɛnɛ zɔka hio bem hinɛ hio bewazang mɛ bewei pɛa Efraim. Wɛnɛ baa hio bem pɛ bewazang wa Makir, bewei pɛ Manasse.

24Ma swe ndang, Zozɛf tɔa ha hio ya wa nde: «Mi befe, maa mi ingo nde Sɔ begbakiri ɛnɛ. Wɛnɛ beku ɛnɛ gbonɛ ha le Ezipte yunɛ, nɛ wɛnɛ beku ɛnɛ sinɛ ha le ka wɛnɛ bagɔn nu wa ha Abraham, Izaak banɛ Zakob4. 25Ka Sɔ deamɔ mɛgi ha ɛnɛ, ɛnɛ kan Sɔ nde ɛnɛ beku wɔl mi sinɛ hinɛ ɛnɛ.»

26Zozɛf Fea ha Ezipte nɛ bɛlɛ gɔmmay ndang nɛ bhukɔ. Ɛ hɔnga wɛnɛ nɛ hio ma dede nɔ mɔ pam wɔl wa, hapata, ɛ gdea wɛnɛ ha zang ma kubha fio mɔ ta.