Zozue 1

Sɔ baa Zozue hapata Moize

1Hapata fio pɛ Moize, wan-tom pɛ Wankpoo, Wankpoo tɔa ha Zozue, bem pɛ Nun ka wɛnɛ ha dea tom ha pɛtɛ Moize: 2«Moize wan tom pɔm fea kari. Sising, gutɛ mɛ ku hio kandɔ Israel mɛ ku nɛ li Zurdain, nɛ̂ nɛ ha le ka mi haa ha hio wi mɔ Israel. 3Bhandi fɛt ka ɛnɛ be gde nanga ha yo, mi behaa yo a ɛnɛ, tuka ɛngɛ ka mi ba gɔn nɛ nu ha Moize. 4Ha wal gdɔk ha wal kala le pɛ ɛnɛ be gasi ha kpɛnu gboa hio ngari mɔ Liban. Ha wal gutɛ swe ha wal ɔnu swe gboa nana li Efrat, ha nana li tɔng mɔ Mediterane gboa pɛ hio wi mɔ le Het. 5Ha zu nû pɛmɛ ma wi lɛm mɔ simbi ha li mɛ na. Mi bedung nɛ mɛ tuka ɛngɛ ka mi badung nɛ Moize, mi lɛm mɔ gde mɛ na. 6Mɛ dung nɛ da nɛ ngaya, hazu nɛ mɛ ha be haa le ɛngɛ ha mbwa, le ka mi gɔnanû mɔ haa ha hio gbabafa mbwa. 7Lɛma nde mɛ a dung nɛ da nɛ ngaya mɔ de mɔ fɛt ka lɛma nɛ mbonga ka wan tom pɔm Moize osa ha mɛ: Yak tɛ mɛ na, mɛgi hio wi mɔ fɛt ka mɛ bede, yo be tɛ nɛ dedea. 8Ka takarata mɔ osimɔ ha dung nɛ nyɛa nɛ mɛ na. Mɛ ba zu mɛ ayo swe nɛ zɛ, mɔ tɔnde mɛ ki liwal mɔ de hio wi mɔ fɛt ka yo lɛma nɛ hio wen ka ɛ ngɛraka hazang takarataa. Mɛgi ing hio wi mɔ fɛt ka mɛ ngoy mɔ de, bekpɔtɛ. 9Ka tazu mɛ abisi na, mi haa nû ha mɛ mɔ dung nɛ da nɛ ngaya. Mɛ yak na, hazu mi Wankpoo, Sɔ pɛ mɛ, mi bedung hinɛ mɛ a bhandi fɛt ka mɛ benɛ̂.»

Zozue bhɔngara kuo li Zurdain

10Zozue haa nû ha hio kapita ka dung ha zu hio bele mɔ Israel 11«Ɛnɛ nɛ hazang guru ɛnɛ haa nu ha hio wi mɔ Israel: “Ɛnɛ bhɔngiri hio yɔngamɔ, hazu hazang yala tar, ɛnɛ be nɛ̂ ha li Zurdain mɔ nɛ̂ ha le ka Wankpoo Sɔ pɛ ɛnɛ haa ha ɛnɛ.’’›› 12Hapata Zozue tɔa ha hio wei mɔ kandɔ pɛ Ruben hinɛ pɛ Gad nɛ bɔngɔrɔ kandɔ pɛ Manase, Zozue tɔa ha mbwa: 13«Ɛnɛ gba-tazu ɛnɛ nɛ bhɔngara mɔ ka Moize, wan-tom pɛ Wankpoo, ka tɔa ha ngimɔ ka a gbasa: “Wankpoo, Sɔ pɛ ɛnɛ zea may ha le ɔmtɛ ha wal gutɛ swe mɔ li Zurdain.’’ 14Hio kô pɛ ɛnɛ, hio bem pɛ ɛnɛ nɛ hio sari pɛ ɛnɛ be bhɔn ha le ka Moize kuo ɛnɛ gde ang. Ma pɛ ɛnɛ, hio wei ha ngimɔ bulo, nɛ hio ngâri pɛ ɛnɛ, ɛnɛ be ku li ha li hio ya ɛnɛ. Ɛnɛ behaa kɔ ha mbwa 15gboa ngimɔ ka Wankpoo Sɔ pɛ ɛnɛ haa mbwa bhandi ɔmtɛ, tuka ka adea nɛ ɛnɛ, nɛ mbwa fin a nɛ̂ ha le ka ɛ̂ haa ha mbwa. Hapata ɛnɛ bepe nɛ pata, tɛ̂ ha le ka Moize baa, wan-tom pɛ Wankpoo, kaa kapana haa ɛnɛ ha wal gutɛ swe mɔ li Zurdain.»

16Mbwa kiforo wen ha Zozue: «Ɔ bede mɔ fɛt ka mɛ behaa-nû nde ɔ de, ɔ benɛ̂ ha bhandi fɛt ka mɛ betomsi ɔ ang. 17Ɔ beze mbɔla pɛ mɛ tuka ka ɔ zea nɛ Moize. Wankpoo, Sɔ pɛ mɛ bedung nɛ mɛ tuka ka ha baadung nɛ Moize. 18Wi fɛt ka bekafi zea mbɔla pɛmɛ a, ɛ begbɛ wɛnɛ. Mɔ pɛ mɛ, dung nɛ da nɛ ngaya!»