Zozue

Zozue

Takarata pɛ Zozue osi nɛ kasi wen hazu baa le mɔ Kanaan pɛ hio wi mɔ Israel ka dung asi Zozue, wan sanzi Moize.

Takarata ɛngɛ kɛtana soko bwa. Bosia (1-12) osi nɛ baa nu ka Sɔ bagɔnanu mɔ haa hio wi mɔ Israel. Mbwa kuo nana li Zurdain nɛ Sɔ ha kɔ ha mbwa mɔ de hio dɔka hio mɔ kose. Nɛ wal dɔka hio mɔ kose ɛngi, mbwa baa ngbale mɔ Zeriko. Mbwa ganazu bulo ha Gabaon. Maa ka hio wi mɔ Israel karsa dea mbon hinɛ Sɔ, ɛ gana zu mbwa (bulo mɔ Ai, 7.1-12).

Ha zang ze bwa takarata (13-24), ɛ kapana nu ha hio kandɔ bhukɔ gbala bwa mɔ Israel. Lɛm nɛ haanu pɛ Wankpoo, sɔna nɛ hio wi pɛ Levi mbwa tɛ kpa nu na, hazu mbwa nɛ hio wan hasadaka. Mbwa beyambili hazang hio ngba le nɛtɛ nɛtɛ. Sɔ tɔa ha Zozue mɔ bhɔngiri hio ngbale pɛ hio gɛnɛ. Ka ma wi gbɛa danwa nɛ ngaya, wi ɛngi beyumɔ nɛ wusitɛ hazang ma lea dang.

Zozue kuo hio wen nu Sɔ fɛt nɛ wala nzeng nɛ tɔ ha hio kandɔ mɔ Israel. Zozue dea hio dedemɔ nɛ dɔka ha hio wi mɔ kandɔ mɔ Israel nɛ wɛnɛ ngasasa mbwa mɔ dung nɛ mboa zu ha li Sɔ. Sɔngsi nde Zozue ha fe, wɛnɛ tɔa ha hio kandɔ mɔ Israel: “Mɛgi, ɛnɛ sal hio sɔ ka ɛnɛ lɛma nɛ̂a gɔa mbwa mɛsɛ... Maa nam pɔm nɛ mi, ɔ bede tom pɛ Wankpoo.” (24.15)

Hio mɔ ngaya mɔ zang takarata ɛngɛ

Baa nu Kanaan 1-12

Ɛ gɔna soko nu Kanaan 13-21

Nu ha wal gutɛswe mɔ Zurdain 13

Nu a wal ɔnuswe mɔ Zurdain 14-19

Ngbale wusitɛ 20

Ngbale pɛ hio wi pɛ Levi 21

Hio kandɔ mɔ wal gutɛswe nduko ha pɛ mbwa 22

Kpogio wen pɛ Zozue sɔngsi nde wɛnɛ afe 23-24