Zozue 6

Hio wi mɔ Israel baa Zeriko

1Hio nu twa le Zeriko ngɛrɛrɛ nɛ nɔka ha wen zu hio wi mɔ Israel. Wi ndang lɛm mɔ le na nɛ wi ndang lɛm mɔ gbo na. 2Wankpoo tɔa ha ngimɔ ɛngɛ ha Zozue: «Zɔk, mi begde le Zeriko nɛ kongapora pɛa nɛ hio nga wan bibulo pɛa ha kɔmɛ. 3Mɛ nɛ hio zugili bulo pɛ mɛ fɛt ɛnɛ benɛ nɔ zikiri nɛ lea, ɛnɛ bezikiri ze ndang hazang yala ndang, gboa yala mɔrkɔ zanga ndang. 4Wan hasadaka mɔrkɔ zanga bwa wi ndang ndang beku hio mbia mbwa bedung ha Sɔngsi kubha mɔ mbon. Ha yala mɔrkɔ zanga bwaa, ɛnɛ bezikiri ngba lea ze mɔrkɔ zanga bwa ha ngimɔ ka hio wan hasadaka bedɔm mbia. 5Ka mbwa zea gba mbia pata nyɛa, mbwa fɛt a gdɔri nɛ ngaya nɛ ngeng ka zikoro ngba lea beyangili ha nu. Mɛgi, hio wi mɔ Israel bele hazang lea wi ndang ndang nzeng ha liwa. 6Zozue, bem pɛ Nun, saa hio wan-hasadaka a tɔa ha mbwa: «Ɛnɛ gu hazu gdaka ɛnɛ kubha mɔ mbon pɛ Wankpoo nɛ hio ma wi mɔrkɔ zanga bwa ha soko ɛnɛ a ku mbia mɔrkɔ zanga bwa adung nɛ hali.» 7Hapata a haa nu ha mbwa: «Ha liwal! Ɛnɛ zikiri ngba le. Hio zugili bulo a dung a Sɔngsi kubha pɛ Wankpoo.»

8Mbwa dea mɔa fɛt tuka ɛngɛ ka Zozue bahaa nɛ nu ha mbwa. Hio wan-hasadaka mɔrkɔ zanga bwa hio na toe nzanga tiko nɛ dɔma mbia dungɔ ha Sɔngsi kubha mɔ mbon pɛ Wankpoo. 9Hio zugili bulo ka baa zua bedung ha Sɔngsi hio wan-hasadaka ka dɔm mbia. Hio zugili bulo bedung a gdong kubha mɔ mbon mɔsoykisi nɛ hio wan dɔm mbia. Ka mbwa ha nɛ̂a-nɔ gɛl mbia ha gdɔra. 10Ma Zozue haa nu ha kandɔa «Ɛnɛ dung gbilik nɛ ɛnɛ gdɔri na gboa ngimɔ ka mi behaa nu ha ɛnɛ ing.» 11Mbwa zikoro ze ndang nɛ kubha hazang le, hapata mbwa kiforo ha guru nɛ ɔnu.

12Ha mɔsa nɛ sutele sut, Zozue gutɛ ba nɛ hio wan hasadaka mbwa toya nɛ mbinga kubha mɔ mbon ha zu bhaka mbwa. 13Hio wan-hasadaka mɔrkɔ zanga bwa nɛ mbia angara fin nɛa nɔ ha Sɔngsi kubha nɛ dɔma mbia. Hio zugili bulo ka bazua ha liba nɛ hio ma ha gdong kubha. Ha ngimɔ ka mbwa a nɛ̂a nɔ, mbwa a dɔma mbia. 14Ha bwa yala ɛngɛ, mbwa zikoro ze ndang fin ngbale, hapata mbwa sio ha guru. Mbwa dea mɛgi gboa yala mɔrkɔ zanga ndang. 15Ha yala mɔrkɔ zanga bwa, mbwa gutɛ ha nu ngimɔ, mbwa zikoro ze mɔrkɔ zanga bwa lea, tuka ɛngɛ ka mbwa bade Sɔngsi. Ka nɛ yala ɛngɛ ha mbwa zikoro kina ze mɔrkɔ zanga bwa. 16Mɔ ze mɔrkɔ zanga bwaa, ha ngimɔ ka hio wan-hasadaka a dɔma mbia, Zozue tɔa ha mbwa: «Ɛnɛ gdɔri nɛ ngaya! Wankpoo haa ngbale ha ɔ kari! 17Lea nɛ hio mɔ fɛt ka dung hazanga beyangili, hazu lea nɛ pɛ Wankpoo. Ɔ begde nɛ tunɔ Rahab, bhoko de wanza, nɛ hio wi fɛt ka dung hazang twa pɛa, ha wen zu aba usi hio wan mbarimɔ ka ɔ batomsi mɔ swe ki. 18Ma kpɛ! Ɛnɛ ku hio mɔ ka ɛ gdea gdangsi na, ki na ɛnɛ beku ngɔtɛ nɛ gdangamɔ tɛnɛ hazang guru pɛ hio wi mɔ Israel. 19Mbɔli fɛt nɛ or, nɛ hio mɔ fɛt ka ɛ de nɛ gbɛ bolo mana nɛ bolo bedung nɛ tɛ ha wal pɛ Wankpoo nɛ be dung hazang twa pam mɔ pɛa.»

20Hio wan-hasadaka dɔma mbia ha ngimɔ ka mbwa zea dɔma mbiaa, mbwa gdɔra nɛ ngaya nɛ nzɛng ka zikoro gbalea gbinɔ. Sising-sising, hio wi mɔ Israel danga gbutukulu, hazang ngbale, wi ndang ndang nzeng ha liwa, nɛ mbwa baa lea. 21Mbwa gbɔndasa hio be le fɛt, wei, bhoko, pɛ pɔlɔmbɔ nɛ gbɛl, nday, sami, nɛ hio toefok.

Zozue gdea Rahab nɛ tunɔ

22Zozue tɔa ha hio wei bwa ka ba tɛ se tɛ mbarimɔ hazang le Zeriko: «Ɛnɛ nɛ hazang twa pɛ Rahab bhoko de wanza ɛnɛ gbosisi wɛnɛ nɛ hio nam pɛa fɛt, tuka ka ɛnɛ bagɔn nɛ nu ha wɛnɛ.» 23Mbwa nɛ̂a nɛ ku Rahab, hio bafa wa nɛ nana wa, hio yawa mɔ wei nɛ mɔ bhoko nɛ hio olo wi fɛt ka dung hazang nam pɛa. Mbwa kuo mbwa nɛ gde ha gdong guru pɛ hio wi mɔ Israel. 24Hapata mbwa besasa ngbalea nɛ hio wi mɔ fɛt ka dung hazanga, mɔ ka mbwa gdea nɛ mbɔli, or, nɛ hio wi mɔ ka dung nɛ mɔ ɔr nɛ mɔ bolo, ka ɛ kuo gde hazang gasa twa pam mbɔli mɔ twa pɛ Wankpoo. 25Zozue gdea Rahab nɛ tunɔ, bhoko de wanza, nɛ hio wi fɛt hazang nam pɛa, ha wen zu a ba usi hio wan mbarimɔ ka ba nɛ ha kio zu go to le Zeriko. A ɔanu ha soko hio wi mɔ Israel, nɛ hio bezang wa bhɔna gbo mɛsɛ. Ha wen zu aba uso hio wan mbarimɔ ka Zozue a tomsi ha kio zu goto le Zeriko.

26Ha ngimɔ ɛngɛ Zozue gɔna kole ha wen le Zeriko: «Wankpoo befom, wi ka bewe mɔ ki liwal mɔ bhɔngiri lea. A beza nanga nɛ fio pɛ kay bem, a begde nu twa lea nɛ fio pɛ kpogio bem pɛa.»

27Wankpoo dungɔ nɛ Zozue, ling wa baa zang le fɛt.