Zozue 5

1Hio kongapora fɛt mɔ kandɔ Amori ka dungɔ ha wal ɔnu swe mɔ Zurdain nɛ hio kongapora pɛ hio bele mɔ Kanaan ha pɛtɛ gasa nana li tɔng Mediterane zea nde Wankpoo baɔsisi Zurdain mɔ ha liwal a hio wi mɔ Israel ha ngimɔ kuo li. Mbwa kio sila mbwa pentɛ nɛ mbwa bo nɛ ngaya na mɔ yol ha Sɔngsi hio wi mɔ Israel.

Hiowi mɔ Israel gɔna Sɔru mbwa ha Gilgal

2Ha ngimɔ ɛngɛ, Wankpoo tɔa ha Zozue: «Mɛ ku ta bhɔngiri nɛ pa mɛ gɔn nɛ Sɔru hio wi mɔ Israel fɛt mɔ tanga ɛngɛ.» 3Zozue kuo ta bhɔngiri nɛ hio pa nɛ a gɔna nɛ Sɔru hio wi mɔ Israel Ɛngi yo zɔk dɛl ha bhandi ka ɛ sa nde ngari gɔn Sɔru. 4-5Ha ngimɔ ka kandɔ Israel gboa ha Ezipte, hio wei fɛt ka kpa bɛlɛ bitumbɔ ɛ gɔna Sɔru mbwa, ma tanga ɛngɛ fɛt Fea ha kpɛ nu. Bi par-par, hio bewei ka ɛ bhɛa ha ngimɔ kuo kpɛnu ɛ tɛ gɔn Sɔru mbwa na. Nɛ ha wen hazua ha Zozue de nɛ̂ nɛ yo mɛgi. 6Hio wi mɔ Israel nɛa nɔ bɛlɛ bhukɔa nar ha kpɛnu. Ha kpogio ngimɔa, hio wei ka babi tumbɔ ha gboa ha Ezipte fɛt Fea, ha wen zu mbwa kafa nu Wankpoo. Wankpoo ba gɔn nu nde mbwa lɛm mɔ zɔk le ka ɛ haa nu ha hio gbabafa mbwa na, le ka li bele nday nɛ nɔ gɔlɔ fok fok ang. 7Ha bhandi pɛ mbwa ha Wankpoo gbosara liwal ha hio bem pɛ mbwa, yo nɛ mbwa ha Zozue gɔna suru mbwa ha wen zu ɛ tɛ gɔn Sɔru mbwa na. 8Ka ɛ gɔna Sɔru mbwa fɛt, mbwa bhɔna ha nu guru gboa ngimɔ ka dalɛa wea. 9Hapata Wankpoo tɔa ha Zozue: «Mɛsɛ, mi a kusi fɔy ka ɛnɛ baku ha Ezipte tɛnɛ yunɛ hatɛ ɛnɛ.»

Ha wen zua ɛ haa nɛ ling bhandia nde Gilgal1, lingha bhɔna gbo swe mɛsɛ.

Bosi yenga pake ha Kanaan

10Hio wi mɔ Israel ɔanu ha guru ha Gilgal, mbwa dea yenga Pake, ha yala bhukɔ gbala nar mɔ zea, nɛ wal mbolo hazang kisi mɔ Zeriko. 11Yala ndang a gdonga, mbwa yɔnga hio mampa ka ɛ de nɛ nana mbwa na nɛ hio gbala mɔ ka ɛ dɔa dɔ. 12Gbosising, mbwa yɔng fin man na. Ha be le ɛngɛ, mbwa yɔng nɛ hio wi mɔ ka kpɔ tɛ hazang le Kanaan.

Wan ka dung ha zu hio nasara pɛ Wankpoo

13Ma swe, Zozue nɛa sanga nɛ Zeriko, ka a zɔk ha Sɔngsi wa, ma wei a yola nɛ gbapa ha kɔ wa. Zozue tiko tɛ̂ ha pɛtɛ wa, nɛ a ana wɛnɛ: «Mɛ ha wal pɔ ɔ mana nɛ wal pɛ hio wan sɛn ɔ?» 14Wei ha kiforo wen: «Mi bo ha wal pɛ ma wi ndang na. Mi nɛ wan mɔ nasara pɛ Wankpoo, hɔa pɔm ga.» Mɛgi, Zozue gɛsa zu wa ha nu nɛ a tɔa: «Mi nɛ wantom pɛ mɛ, mɛ tɔa mi nɛ ge?» 15Wan ha zu nasara pɛ Wankpoo kiforo wen: «Kpɔsi nakala pɛ mɛ, hazu mɛ ha bhandi ka dung nɛ nzɔya.» Zozue dea tuka a tɔa.