Zozue 11

Bulo ha nanga li mɔ Merom

1Tangere Yabin, kongapora mɔ Hasor zea wen gana zu pɛ Zozue, wɛnɛ tomsa hio wan-nɛtom pɛa ha Yabab, kongapora mɔ Madon, kongapora mɔ Simron nɛ kongapora mɔ Akesaf. 2Wɛnɛ tomso ha hio kongapora ndɔng fin ka ɔnu ha kandɔnu mɔ zu ngari nɛ wal kala ha bikɔnu mɔ Zurdain nɛ wal gdɔk ha tɔkli mɔ Genezaret, kandɔnu mɔ gdɔk nɛ bhalkɔa sanga nɛ le mɔ Dor, ha wal ɔnu swe. 3Hio wi mɔ Kanaan ɔ pɛ mbwa nɛ wal gutɛ swe fin nɛ wal ɔnu swe mɔ Zurdain, hio wi mɔ Amori, hio wi hio wi mɔ Het, hio wi mɔ Perizi, hio wi mɔ Yebus ɔnu ha kandɔnu mɔ zu ngari. Hio wi mɔ Hivi ɔnu ha nanga ngari hio wi mɔ Hermon, ha kandɔnu mɔ Mispa. 4Hio kongapora fɛt gutɛ hinɛ hio zugili nasara ka ɛ lɛm tɔl zu mbwa na, tuka gbala lembe mɔ pɛtɛ nanali tɔng nɛ gili yanga nɛ hio wi mɔ baa toy pɛ mbwa. 5Hio kongapora wesara may nɛ hio nasara fɛt mbwa nɛ̂a nɛ baaguru ha pɛtɛ bebe li mɔ Merom, mɔ sungiri nɛ hio wi mɔ Israel.

6Wankpoo tɔa ha Zozue: «De ke pɛ mbwa na, hazu mɔsa, ha ngimɔ ɛngi, mi begdongi mbwa fɛt, mɛ bekɔmbiri mbwa gdea fio, ha kɔ̂ kandɔ mɔ Israel. Mɛgi mɛ begɔn nik singanza hio yanga pɛ mbwa nɛ mɛ be besisi hio wi mɔ baa toy pɛ mbwa.» 7Zozue nɛ hio nasara pɛa nɛ̂a nɛ wang hio gana pɛ mbwa nɛ bulo ha pɛtɛ bebe li mɔ Merom. 8Wankpoo baagdongi mbwa ha hio wi mɔ Israel nde ɛ gbɛ mbwa nɛ ɛ naka gdong mbwa nɛ wal kala gboa ngbale mɔ Sidon, nɛ Misrefot-Maim, gboa bikɔnu mɔ Mispe nɛ wal gutɛ swe. Ɛ gbɛa mbwa nɛ dɔka pentɛ nɛ ɛ tɛ gde ma wi ndang nɛ zutunɔ na. 9Zozue dea mɔsoykisi tuka ɛngi ka Wankpoo haanu ha wɛnɛ mɛgi: wɛnɛ gɔna nik singanza hio yanga pɛ mbwa nɛ wɛnɛ besasa mɔ baa toy pɛ mbwa.

Hio wi mɔ Israel baa le mɔ Hasor

10Ha ngimɔ ɛngi, Zozue kiforo nɛ pata nɛ baa ngbale mɔ Hasor, ka badung Sɔngsi nɛ ngbale mɔ konga-kadɔnu mɔ wal kala. Wɛnɛ gbɛa kongapora mɔ le ɛngi 11nɛ wɛnɛ gbɛa fin hio wi fɛt ka ɔnu hazang le ɛngi, ma ndang bhɔn nɛ zutunɔ na nɛ ɛ besasa ngbalea. 12Zozue baa hio kongapora nɛ hio le pɛ mbwa fɛt. Wɛnɛ gbɛa hio kongapora ndɔng nɛ hio wi ndɔng fɛt ka ɔnu hazang lea tuka ɛngi ka Moize, wan-tom pɛ Wankpoo, baa haanu ha wɛnɛ mɔ de yo. 13Mɛgi, hio wi mɔ Israel tɛ besisi hio le mɔ zu ngari ndɔng na, ka nɛ ngbale mɔ Hasor Sɔna ka Zozue besasa. 14Hio wi mɔ Israel baanɛ hio dede toy nɛ nday ka mbwa kpaa hazang hio lea Sɔna. Ma mbwa gbɛa hio wi mɔ zang le ɛngi fɛt na, ma wi ndang tɛ bhɔn nɛ zutunɔ na. 15Moize batɔ ha Zozue hio hanu ka Wankpoo baahaa ha wɛnɛ hazu wen ɛngi, nɛ Zozue dea lɛm fɛt hɛr.

Zozue baa kandɔnu mɔ Kanaan fɛt

16Zozue baa kandɔnu fɛt tuka ɛngi: Wɛnɛ baa kandɔnu mɔ zu ngari, kandɔnu mɔ wal gdɔk, kandɔnu mɔ Gosen, le mɔ wal gdɔk, bikonu mɔ li Zurdain banɛ kandɔnu mɔ zu ngari nɛ tɛlfɛn nu mɔ wal kala. 17Wɛnɛ gana zu mbwa nɛ wɛnɛ gbɛa hio kongapora ndɔng fɛt ka ɔnu ha soko ngari mɔ bhatɔ sanga nɛ Seir nɛ wal gdɔk, nɛ Baal-Gad ka dung hazang bikonu mɔ Liban, ha nanga ngari mɔ Hermon nɛ wal kala. 18Wɛnɛ bio bulo ha ki ngimɔ nɛ dɔka. 19Sɔna nɛ wi mɔ Hivi ka ɔnu ha Gabaon abhɔngiri gaamɔ ha soko mbwa nɛ hio wi mɔ Israel. Hio olo ngbalea fɛt nasara mɔ Israel baanɛ bulo. 20Tangere Wankpoo ngasasa sila hio wi mɔ lea nde mbwa a zati nɛ bulo ha li hio wi mɔ Israel pata nyen. Mɛgi, hio wi mɔ Israel adung nɛ ke gbɛa mbwa na, nɛ ɛ karsi mbwa fɛt tuka ɛngi ka Wankpoo baatɔ nɛ ha Moize.

21Ngimɔ ɛngi, Zozue nɛ̂a ha bio bulo nɛ hio wi mɔ Anak ka ɔnu ha zu ngari mɔ hio wi Hebron, mɔ Debir, mɔ Anab nɛ hio kandɔnu mɔ zu ngari fɛt mɔ Zuda nɛ mɔ Israel. Wɛnɛ gbɛa mbwa gboa kpogio, nɛ wɛnɛ bhondasa hio le pɛ mbwa fɛt. 22Ma wɛnɛ gbɛa hio kandɔ mɔ Anak fɛt hazang le mɔ Israel. Nɛ hio ma wia ndang-ndang bhɔna Sɔna hazang le mɔ Gaza, mɔ Gat nɛ mɔ Asdod. 23Mɛgi, Zozue baa kandɔnu ndɔng fɛt, tuka ɛngi ka Wankpoo baa haa nɛ nu ha Moize nde wɛnɛ de. Wɛnɛ haa hio nu ndɔng fin ha hio wi mɔ Israel nde mbwa kapini yo sɛkɛ-sɛkɛ lɛm nɛ hio pɛl nam pɛ mbwa. Mɛgi, hio pɛl nam pɛ mbwa akpaa gaamɔ ha soko may.